NEET UG 2026:ટેસ્ટિંગ એજન્સી (NTA) એ મેડિકલ પ્રવેશ પરીક્ષા NEET-UG 2026ની નવી તારીખ જાહેર કરી દીધી છે. પેપર લીક થવાને કારણે 12 મેના રોજ રદ કરાયેલી આ પરીક્ષા હવે 21 જૂન, 2026 (રવિવાર) ના રોજ યોજાશે. અગાઉ 3 મેના રોજ લેવાયેલી પરીક્ષામાં દેશભરના 23 લાખ ઉમેદવારો બેઠા હતા, જેમને હવે ફરીથી પરીક્ષા આપવી પડશે.
NEET UG 2026: CBI તપાસમાં ચોંકાવનારા ખુલાસા: રાજસ્થાન કનેક્શન સામે આવ્યું
CBI દ્વારા આ મામલે સઘન તપાસ હાથ ધરવામાં આવી રહી છે. અત્યાર સુધીમાં મહારાષ્ટ્ર, રાજસ્થાન અને હરિયાણામાંથી કુલ 7 લોકોની ધરપકડ કરવામાં આવી છે.
- પીડીએફ બનાવી પેપર વાયરલ કર્યું: તપાસમાં જાણવા મળ્યું છે કે આરોપી વિકાસ બિન્વાલના પિતા દિનેશે પ્રશ્નપત્રની હાર્ડ કોપી સ્કેન કરી PDF બનાવી હતી.
- કોચિંગ સેન્ટરોમાં વિતરણ: આરોપીઓએ પહેલા પ્રશ્નપત્ર હાથથી લખ્યું અને ત્યારબાદ રાજસ્થાનના સીકરના કોચિંગ સેન્ટરોમાં ફેલાવ્યું.
- 180 માંથી 150 પ્રશ્નો મેચ: સીકરના એક કોચિંગ સેન્ટર પાસે જે ‘ગેસ પેપર’ મળ્યું હતું, તેમાં મૂળ પેપરના 180 માંથી 150 પ્રશ્નો બેઠઠા હતા.
- રૂપિયાની લેતીદેતી: વિદ્યાર્થીઓ પાસેથી પેપર આપવાના બદલામાં 2 થી 5 લાખ રૂપિયા વસૂલવામાં આવ્યા હતા.
NEET UG 2026: રાજકીય કનેક્શન અને ધરપકડ
દિલ્હી પોલીસે આ કૌભાંડમાં સામેલ એક સંગઠિત ગેંગનો પર્દાફાશ કર્યો છે, જે MBBS માં એડમિશન અપાવવાના નામે 20-30 લાખ રૂપિયા પડાવતી હતી.
- RJD નેતાની સંડોવણી: આ કેસમાં RJDના રાષ્ટ્રીય સચિવ સંતોષ કુમાર જયસ્વાલ સહિત 4 લોકોની ધરપકડ કરવામાં આવી છે. પોલીસ જયસ્વાલને આ સમગ્ર કૌભાંડનો મુખ્ય સૂત્રધાર માની રહી છે.
NEET UG 2026: દેશભરમાં વિરોધ પ્રદર્શન
પેપર લીકની ઘટના બાદ દેશભરના વિદ્યાર્થીઓમાં ભારે રોષ જોવા મળી રહ્યો છે. અમદાવાદમાં NSUI કાર્યકરોએ કેન્દ્રીય શિક્ષણ મંત્રી ધર્મેન્દ્ર પ્રધાનના કાફલાને રોકવાનો પ્રયાસ કર્યો હતો અને કાળા ઝંડા બતાવી વિરોધ નોંધાવ્યો હતો. ત્યારબાદ પોલીસે પ્રદર્શનકારીઓની અટકાયત કરી હતી.
એક નજરે ઘટનાક્રમ:
| તારીખ | વિગત |
| 3 મે | દેશભરમાં NEET-UG પરીક્ષાનું આયોજન થયું. |
| 12 મે | પેપર લીકના પુરાવા મળતા NTA દ્વારા પરીક્ષા રદ કરાઈ. |
| 13 મે | CBI દ્વારા વિવિધ રાજ્યોમાં દરોડા અને 5 લોકોની ધરપકડ. |
| 15 મે | ભારત સરકારની મંજૂરી બાદ 21 જૂન નવી તારીખ તરીકે જાહેર. |
વધુ સમાચાર વાંચવા માટે અંહી ક્લિક કરો: અમદાવાદની ગુજરાત કોલેજમાં મોટું કૌભાંડ આર્મી-એરફોર્સમાં નોકરીની લાલચ આપી પ્રોફેસર 30 વિદ્યાર્થીઓના 8 લાખ લઈ ફરાર
