Noida Unrest: દિલ્હીને અડીને આવેલા નોઈડામાં છેલ્લા બે દિવસથી ફેક્ટરી કર્મચારીઓએ પગાર વધારાની માંગ સાથે ભારે હોબાળો મચાવ્યો છે. મંગળવારે પણ પોલીસ અને પ્રદર્શનકારીઓ વચ્ચે હિંસક અથડામણ થઈ હતી. જોકે, વધતા જતા આક્રોશને જોઈને ઉત્તર પ્રદેશ સરકારે સોમવારે મોડી રાત્રે કર્મચારીઓના પગારમાં ₹3000 સુધીનો વધારો કરવાની જાહેરાત કરી દીધી છે.
Noida Unrest: હિંસાનું કારણ: હરિયાણાનો એક નિર્ણય
આ સમગ્ર આંદોલન પાછળ પાડોશી રાજ્ય હરિયાણાનો એક નિર્ણય જવાબદાર છે. હરિયાણા સરકારે તાજેતરમાં શ્રમિકોના પગારમાં 35%નો વધારો કર્યો હતો. આ સમાચાર નોઈડા પહોંચતા જ અહીંના 42,000 કર્મચારીઓ પણ સમાન પગારની માંગ સાથે રસ્તા પર ઉતરી આવ્યા હતા.
Noida Unrest: બીજા દિવસે પણ રણમેદાન જેવી સ્થિતિ
- પથ્થરમારો: મંગળવારે સવારથી જ સેક્ટર-81 અને ફેઝ-2માં કર્મચારીઓ રસ્તા પર ઉતરી આવ્યા હતા. પોલીસ પર પથ્થરમારો કરવામાં આવ્યો અને ગાડીઓને નિશાન બનાવવામાં આવી.
- ધરપકડ: પોલીસ કમિશનર લક્ષ્મી સિંહે જણાવ્યું કે અત્યાર સુધીમાં 300થી વધુ તોફાનીઓની ધરપકડ કરવામાં આવી છે.
- ડ્રોન નજર: આખા વિસ્તારમાં આરએએફ (RAF) અને પીએસી (PAC) તૈનાત કરવામાં આવી છે. ડ્રોન અને સીસીટીવી દ્વારા તોફાનીઓની ઓળખ કરવામાં આવી રહી છે.
Noida Unrest: સરકારનો મોટો નિર્ણય: ₹3000નો પગાર વધારો
પરિસ્થિતિ કાબૂ બહાર જતી જોઈ સરકારે રાત્રે દોઢ વાગ્યે આદેશ જારી કર્યો:
- વેતન વધારો: લઘુત્તમ વેતનમાં ₹3000 સુધીનો વધારો મંજૂર કરાયો.
- અમલીકરણ: આ વધારો 1 એપ્રિલથી લાગુ ગણવામાં આવશે.
- નવી સુવિધા: ઓવરટાઇમની બમણી ચુકવણી અને ઇપીએફ-ઇએસઆઇ જેવી સુવિધાઓ કડક રીતે લાગુ કરાશે.
Noida Unrest: 3000 કરોડનો બિઝનેસ ઠપ
સોમવારે ભીડે જે રીતે 350થી વધુ ફેક્ટરીઓમાં તોડફોડ કરી અને 50થી વધુ વાહનો સળગાવ્યા, તેનાથી ઉદ્યોગ જગત ધ્રૂજી ઉઠ્યું છે. એક જ દિવસમાં નોઈડાના ઉદ્યોગોને અંદાજે ₹3000 કરોડનું નુકસાન થયું હોવાનું એસોસિએશને જણાવ્યું છે.
ષડયંત્રની આશંકા?
ડીજીપી રાજીવ કૃષ્ણએ જણાવ્યું કે આ આંદોલન પાછળ કોઈ મોટું ષડયંત્ર હોઈ શકે છે. 50 જેટલા સોશિયલ મીડિયા (X) હેન્ડલ્સની ઓળખ થઈ છે જે છેલ્લા 24 કલાકમાં જ બનાવવામાં આવ્યા હતા અને તેના દ્વારા અફવાઓ ફેલાવીને મજૂરોને ઉશ્કેરવામાં આવ્યા હતા. એસટીએફ (STF) હવે આ ડિજિટલ ટ્રેલની તપાસ કરશે.
વધુ સમાચાર વાંચવા માટે અંહી ક્લિક કરો
