Election Commission of India (EC): દેશના કેટલાક ભાગોમાં સામાન્ય કરતા વધુ તાપમાન અને ગરમીના મોજાની અસર લોકસભા ચૂંટણી 2024માં જોવા મળી રહી છે. પ્રથમ તબક્કાનું મતદાન 19 એપ્રિલે થયું હતું, આકરી ગરમીને કારણે ઓછા મતદારો બૂથ પર પહોંચ્યા હતા.
ભારતીય હવામાન વિભાગ (IMD) એ આગામી કેટલાક દિવસો માટે ગરમી અને હીટવેવની આગાહી કરી છે. ચૂંટણી પંચે ઓછા મતદાન પર ચિંતા વ્યક્ત કરી છે. હીટવેવના જોખમને ઘટાડવા માટે ચૂંટણી પંચે સોમવારે હવામાન વિભાગના અધિકારીઓ સહિત અનેક હિતધારકો સાથે ઉચ્ચ સ્તરીય બેઠક યોજી હતી.
હવામાન વિભાગ, નેશનલ ડિઝાસ્ટર મેનેજમેન્ટ ઓથોરિટી અને આરોગ્ય અને પરિવાર કલ્યાણ મંત્રાલયના અધિકારીઓએ આ બેઠકમાં ભાગ લીધો હતો. મુખ્ય ચૂંટણી કમિશનર રાજીવ કુમારે ચૂંટણી કમિશનર જ્ઞાનેશ કુમાર અને સુખબીર સિંહ સંધુ સાથે બેઠકની અધ્યક્ષતા કરી હતી.
મોટાભાગના રાજ્યોના CEO એ હીટવેવને લઈને વ્યવસ્થા સુધારવાની ખાતરી આપી છે. બીજા તબક્કામાં 26 એપ્રિલે મતદાન થવાનું છે. તેથી, રાજ્ય સરકારો પણ વધુ સારી વ્યવસ્થા માટે પગલાં લેશે. સૂત્રોના હવાલાથી આ માહિતી બહાર આવી છે.
IMD ચૂંટણી પંચ (EC)ના સતત સંપર્કમાં
હવામાનશાસ્ત્રના મહાનિર્દેશક (IMD) મૃત્યુંજય મહાપાત્રાએ જણાવ્યું હતું કે, “IMD ચૂંટણી પંચ (EC) ના સતત સંપર્કમાં છે. મોસમી આગાહીની સાથે, અમે માસિક, સપ્તાહવાર અને દૈનિક આગાહીઓ કરી રહ્યા છીએ. તેમને હીટવેવ અને ભેજની આગાહી આપીએ છીએ. જે જગ્યાઓ પર બહુવિધ તબક્કામાં ચૂંટણી યોજાવાની છે તેના વિશે EC ને ઇનપુટ્સ અને આગાહીઓ આપી રહ્યા છે.”
વડાપ્રધાન મોદીએ પણ બેઠક યોજી
આ પહેલા 11 એપ્રિલે વડાપ્રધાન નરેન્દ્ર મોદીએ ઉનાળાની ઋતુની તૈયારીઓની સમીક્ષા કરવા માટે એક બેઠકની અધ્યક્ષતા કરી હતી. મીટિંગમાં પીએમ મોદીને એપ્રિલથી જૂન 2024ના સમયગાળાના તાપમાન વિશે માહિતી આપવામાં આવી હતી જેમાં ગરમ હવામાનની આગાહી પણ સામેલ હતી.
ઉંચુ તાપમાન લોકોની મુશ્કેલીમાં કરી શકે છે વધારો
હવામાન વિજ્ઞાનના મહાનિર્દેશક (IMD) મૃત્યુંજય મહાપાત્રાનું કહેવું છે કે આ ગરમીની મોસમ દરમિયાન પશ્ચિમ હિમાલયન ક્ષેત્ર, ઉત્તર-પૂર્વીય રાજ્યો અને ઉત્તર ઓડિશાના કેટલાક ભાગોમાં તાપમાનમાં વધારો થવા જઈ રહ્યો છે. તેમણે કહ્યું, “હીટવેવ દરમિયાન તાપમાનમાં વધારો થવાથી જોખમ ઊભું થાય છે. તેનાથી વૃદ્ધો, બાળકો અને પહેલાથી જ બીમાર લોકોને સમસ્યા થઈ શકે છે.”
4 રાજ્યો માટે હીટવેવ એલર્ટ
દરમિયાન, IMD એ દેશના 4 રાજ્યો માટે હીટવેવ એલર્ટ જાહેર કર્યું છે. જેમાં બિહાર, ઉત્તર પ્રદેશ, ઓડિશા અને પશ્ચિમ બંગાળનો સમાવેશ થાય છે. આ રાજ્યોની સાથે છત્તીસગઢ, મધ્યપ્રદેશ, ઝારખંડ, તેલંગાણા, આંધ્રપ્રદેશ અને તમિલનાડુના ઘણા જિલ્લાઓમાં રવિવારે તાપમાન 42 ડિગ્રીને પાર કરી ગયું હતું.
ઓડિશાના કેટલાક જિલ્લાઓમાં તાપમાન 43 ડિગ્રીની નજીક છે. અહીં હીટવેવના કારણે શાળાના સમયમાં ફેરફાર કરવામાં આવ્યો છે.
24 એપ્રિલ સુધી ઓડિશામાં તમામ શાળાઓ સવારે 6.30 થી 10.30 સુધી જ ખુલશે. દરમિયાન 25 એપ્રિલથી ઉનાળાની રજાઓ જાહેર કરવામાં આવી છે. આ સિવાય છત્તીસગઢની તમામ શાળાઓમાં આજથી 15 જૂન સુધી રજા જાહેર કરવામાં આવી છે.
આ રાજ્યોમાં વરસાદનું એલર્ટ
IMD અનુસાર, 23 રાજ્યોમાં વરસાદની આગાહી કરવામાં આવી છે. જેમાં અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરા, પશ્ચિમ બંગાળ, સિક્કિમ, ઓડિશા, ઝારખંડ, જમ્મુ કાશ્મીર, હિમાચલ પ્રદેશ, ઉત્તરાખંડ, રાજસ્થાન, ઉત્તર પ્રદેશ, મહારાષ્ટ્ર, છત્તીસગઢ, તમિલનાડુ, કેરળ, કર્ણાટકનો સમાવેશ થાય છે. આંધ્રપ્રદેશ અને તેલંગાણાનો સમાવેશ થાય છે.
બીજા અને ત્રીજા તબક્કાની ચૂંટણી ક્યારે છે?
લોકસભા ચૂંટણીના બીજા તબક્કામાં 26 એપ્રિલે મતદાન થશે. આ પછી ત્રીજા તબક્કામાં 7 મેના રોજ, ચોથા તબક્કામાં 13 મેના રોજ, પાંચમા તબક્કામાં 20 મેના રોજ, છઠ્ઠા તબક્કામાં 25 મેના રોજ અને સાતમા તબક્કામાં 1 જૂનના રોજ મતદાન થશે. 2019ની છેલ્લી સામાન્ય ચૂંટણીઓ પણ સાત તબક્કામાં યોજાઈ હતી.
લેટેસ્ટ સમાચાર માટે અહી કલિક કરો
યુ-ટ્યુબ ચેનલમાં શોર્ટ્સ જોવા અહીં કલિક કરો
ગુજરાતના મહત્વના સમાચાર માટે અહીં ક્લિક કરો
રોમાંચક સમાચાર માટે અહીં ક્લિક કરો
Discover more from VR LIVE GUJARAT: Gujarat News
Subscribe to get the latest posts to your email.