Nitin Gadkari Visit Uttarakhand Tunnel : કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી (Nitin Gadkari) એ રવિવારે કહ્યું હતું કે જો કાટમાળમાં ડ્રિલિંગ ઓગર મશીન યોગ્ય રીતે કામ કરવાનું ચાલુ રાખશે, તો બચાવ ટીમ આગામી બે દિવસમાં ઉત્તરાખંડમાં સુરંગની અંદર 41 ફસાયેલા કામદારો જે 170 કલાકથી વધુ સમયથી અંદર છે તેમણે બચાવી લેવાશે.
નીતિન ગડકરી (Nitin Gadkari) અને મુખ્યમંત્રી પુષ્કર સિંહ ધામીએ રવિવારે ટનલ તૂટી પડવાના સ્થળની મુલાકાત લીધી હતી. ત્યાં 41 લોકોના જીવ જોખમમાં છે. ઉત્તરકાશી અને યમુનોત્રીને જોડવા માટે નિર્માણાધીન ટનલનો એક ભાગ ગયા રવિવારે ભૂસ્ખલનને પગલે તૂટી પડ્યો હતો, જેમાં કામદારો ટનલની અંદર ફસાયા હતા. આ ટનલનું નિર્માણ કેન્દ્ર સરકારના મહત્વકાંક્ષી ચારધામ પ્રોજેક્ટ હેઠળ કરવામાં આવી રહ્યું છે.
ગયા અઠવાડિયે, વિસ્તારની ટોપોગ્રાફી અને ખડકોની પ્રકૃતિ સહિત અનેક પડકારોને કારણે કામદારોને બચાવવાના પ્રયાસો વારંવાર નિષ્ફળ ગયા હતા. કામદારોને ખોરાક, પાણી અને ઓક્સિજનનો સતત સપ્લાય કરવામાં આવી રહ્યો છે. તેમને બચાવવા માટે રેસ્ક્યુ ટીમ દિવસ-રાત કામ કરી રહી છે.
મીડિયા સાથે વાત કરતા ગડકરી (Nitin Gadkari) એ કહ્યું કે, કામદારોના જીવ બચાવવાની પ્રાથમિકતા છે. તેમણે કહ્યું, “જો ઓગર મશીન યોગ્ય રીતે કામ કરશે, તો અમે આગામી બેથી અઢી દિવસમાં તેમના સુધી પહોંચી શકીશું. BRO (બોર્ડર રોડ ઓર્ગેનાઈઝેશન) દ્વારા ખાસ મશીન લાવવા માટે રસ્તાઓ બનાવવામાં આવી રહ્યા છે. ઘણા મશીનો અહીં આવી ગયા છે. “હાલમાં બચાવ માટે બે ઓગર મશીન કામ કરી રહ્યા છે.”
દરેકનો જીવ બચાવવો એ અમારી પ્રથમ પ્રાથમિકતા છેઃ પુષ્કર સિંહ ધામી
મુખ્યમંત્રી પુષ્કર સિંહ ધામીએ જણાવ્યું કે, તેમની સરકાર બચાવ એજન્સીઓને મદદ કરવા તૈયાર છે. તેમણે કહ્યું, “દરેક વ્યક્તિનો જીવ બચાવવો એ અમારી પ્રથમ પ્રાથમિકતા છે. આ માટે, રાજ્ય સરકાર તમામ એજન્સીઓને શક્ય તેટલી બધી મદદ કરવા તૈયાર છે. હું ભગવાનને પ્રાર્થના કરીશ કે તેઓ જલ્દીથી બચી જાય, કારણ કે દરેક પસાર થતા દિવસ સાથે તેમના સમસ્યાઓ વધી રહી છે.”
આ પડકારજનક બચાવ કામગીરી માટે ઘણી એજન્સીઓની ટીમો સ્થળ પર હાજર છે. જેમાં વડાપ્રધાન કાર્યાલય (PMO)ના અધિકારીઓ પણ સામેલ છે. વડા પ્રધાનના ભૂતપૂર્વ સલાહકાર ભાસ્કર ખુલ્બેએ જણાવ્યું હતું કે, “નિષ્ણાતો સહમત છે કે એક યોજના પર કામ કરવાને બદલે, આપણે શક્ય તેટલી વહેલી તકે ફસાયેલા કામદારો સુધી પહોંચવા માટે એક સાથે પાંચ યોજનાઓ પર કામ કરવું જોઈએ.”
ખુલ્બેએ કહ્યું કે ચાર-પાંચ દિવસમાં કામદારોને બચાવી લેવામાં આવે તેવી અપેક્ષા છે. તેણે કહ્યું, “પરંતુ જો ભગવાન દયાળુ હોય, તો તે પહેલા પણ થઈ શકે છે.”
