Vande Bharat Train Trial:ભારતીય રેલવેની સ્વદેશી ટેકનોલોજીની વધુ એક મોટી સિદ્ધિ સામે આવી છે. પશ્ચિમ-મધ્ય રેલવેના કોટા મંડળમાં વંદે ભારત સ્લીપર ટ્રેન (વર્ઝન-2)નું ફાઇનલ હાઈ સ્પીડ ટ્રાયલ સફળતાપૂર્વક પૂર્ણ કરવામાં આવ્યું છે. ટ્રાયલ દરમિયાન ટ્રેન 180 કિલોમીટર પ્રતિ કલાકની ઝડપે દોડી હતી અને આશ્ચર્યજનક રીતે ગ્લાસમાં રાખેલું પાણી પણ ઢોળાયું નહોતું.
Vande Bharat Train Trial:16 કોચની નવી પેઢીની ટ્રેનનો સફળ પરીક્ષણ
મંગળવારે કોટા-નાગદા રેલવે ટ્રેક પર યોજાયેલા ટ્રાયલ દરમિયાન 16 કોચની વંદે ભારત સ્લીપર ટ્રેનને 180 કિલોમીટર પ્રતિ કલાકની ટોચની ઝડપ સુધી દોડાવવામાં આવી. આ ટ્રાયલ સ્વદેશી ટેકનોલોજીથી બનેલી ન્યૂ જનરેશન ટ્રેન માટે મહત્વપૂર્ણ માનવામાં આવે છે.
Vande Bharat Train Trial:હાઈ સ્પીડમાં પણ શાનદાર સ્ટેબિલિટી
ટ્રાયલ દરમિયાન લોકો પાયલટે ટ્રેનમાં ચાર ગ્લાસમાં પાણી રાખ્યું હતું. 180 કિમી પ્રતિ કલાકની ઝડપ હોવા છતાં ગ્લાસમાંથી પાણી છલકાયું નહોતું, જે ટ્રેનની ઉત્તમ સ્ટેબિલિટી અને રાઈડ ક્વોલિટીને દર્શાવે છે.
Vande Bharat Train Trial:સ્પીડ, બ્રેક અને સેફ્ટી સિસ્ટમની કડક તપાસ
વરિષ્ઠ મંડળ વાણિજ્ય પ્રબંધક સૌરભ જૈને જણાવ્યું કે ટ્રાયલ માટે સાંજે લગભગ 4 વાગ્યે ટ્રેનને કોટાથી નાગદા (લગભગ 225 કિલોમીટર) માટે રવાના કરવામાં આવી હતી. રામગંજમંડી બાદ ટ્રેનને 180 કિલોમીટર પ્રતિ કલાકની ઝડપે દોડાવવામાં આવી.
આ દરમિયાન ટ્રેનની સ્થિરતા, કંપન, ઈમરજન્સી બ્રેક સિસ્ટમ, સુરક્ષા વ્યવસ્થા અને અન્ય મહત્વપૂર્ણ તકનીકી પાસાઓનું વિસ્તૃત પરીક્ષણ કરવામાં આવ્યું. ઊંચી ઝડપે પણ ટ્રેનનું પ્રદર્શન સંપૂર્ણપણે સંતોષકારક હોવાનું અધિકારીઓએ જણાવ્યું.
રેલ મંત્રીએ કહ્યું – ન્યૂ જનરેશન ટ્રેન
વંદે ભારત સ્લીપર ટ્રેનના સફળ ટ્રાયલને લઈને રેલ મંત્રી દ્વારા તેને ‘ન્યૂ જનરેશન ટ્રેન’ તરીકે ઓળખાવવામાં આવી છે. આ ટ્રેન ભવિષ્યમાં લાંબા અંતરના મુસાફરો માટે વધુ આરામદાયક, ઝડપી અને સુરક્ષિત મુસાફરીનો અનુભવ આપશે.
ટૂંક સમયમાં કમર્શિયલ દોડની શક્યતા
ફાઇનલ હાઈ સ્પીડ ટ્રાયલ સફળ થતાં હવે વંદે ભારત સ્લીપર ટ્રેનને ટૂંક સમયમાં વ્યાવસાયિક સેવા માટે તૈયાર કરવામાં આવશે. આ ટ્રેન ભારતીય રેલવેના આધુનિકીકરણ અને ‘મેક ઇન ઇન્ડિયા’ અભિયાનનું શક્તિશાળી પ્રતીક બની રહી છે.
