Tragedy in Mehsana: મહેસાણાના સોમનાથ રોડ પર આવેલી પંડિત દીનદયાલ નગર આવાસ યોજનાની બિલ્ડિંગમાં આજે વહેલી સવારે એક અત્યંત હૃદયદ્રાવક અને આઘાતજનક ઘટના સામે આવી છે. અહીં નજીકની સોસાયટીમાં રહેતી અને ધોરણ-૭માં અભ્યાસ કરતી એક કિશોરીએ અગમ્ય કારણોસર આવાસના છઠ્ઠા માળેથી મોતની છલાંગ લગાવીને પોતાનું જીવન ટૂંકાવી લીધું છે. આ ઘટનાને પગલે સમગ્ર પંથકમાં અરેરાટી વ્યાપી ગઈ છે.
Tragedy in Mehsana: વહેલી સવારે બની કરુણ ઘટના
મળતી માહિતી મુજબ, આ કરુણ ઘટના આજે વહેલી સવારે આશરે ૭:૦૦ વાગ્યાની આસપાસ બની હતી. આવાસ યોજનાની બાજુમાં જ આવેલી શિવકૃપા સોસાયટીમાં રહેતી કિશોરી સવારના સમયે દીનદયાલ નગર આવાસની બિલ્ડિંગ પર પહોંચી હતી અને છઠ્ઠા માળેથી નીચે ઝંપલાવ્યું હતું.
વહેલી સવારે બનેલી આ ઘટનાને પગલે આસપાસના વિસ્તારમાં ભારે ચકચાર મચી ગઈ હતી અને મોટી સંખ્યામાં સ્થાનિક લોકો ઘટનાસ્થળે એકઠા થઈ ગયા હતા.
Tragedy in Mehsana: એસોસિએશનના પ્રમુખનું નિવેદન
“સવારે ૭:૩૦ વાગ્યાની આજુબાજુ આ દુઃખદ ઘટના બની હોવાની જાણ થઈ હતી. શિવકૃપા સોસાયટીમાં રહેતી અને ધોરણ-૭માં ભણતી વિદ્યાર્થિનીએ અગમ્ય કારણોસર અહીં આવીને આત્મઘાતી પગલું ભર્યું હતું. ઘટનાની જાણ થતાં જ અમે તાત્કાલિક પોલીસને ઇન્ફોર્મ કરી હતી. ત્યારબાદ બાળકીના માતા-પિતાને પણ આ અંગે વાયા-વાયા જાણ થઈ હતી.” — કલ્પેશ રાઠોડ, પ્રમુખ (પંડિત દીનદયાલ નગર એસોસિએશન)
Tragedy in Mehsana: પોલીસ ઘટનાસ્થળે, કારણ હજુ અકબંધ
ઘટનાની જાણ થતાં જ પોલીસ કાફલો અને ૧૦૮ની ટીમ તાત્કાલિક ઘટનાસ્થળે દોડી આવી હતી. પોલીસે મૃતક કિશોરીના વહેલાસર પોસ્ટમોર્ટમ માટેની અને અન્ય કાયદેસરની જરૂરી કાર્યવાહી હાથ ધરી છે.
- આત્મહત્યાનું કારણ: અજ્ઞાત (હજુ સુધી જાણી શકાયું નથી)
- પોલીસ કાર્યવાહી: ગુનો નોંધીને આગળની સઘન તપાસ શરૂ કરાઈ
ધોરણ-૭માં ભણતી આ માસૂમ બાળકીએ કયા સંજોગોમાં અને કયા કારણોસર આટલું મોટું અને આત્મઘાતી પગલું ભર્યું, તે અંગે પોલીસ તેના પરિવારજનો અને આસપાસના લોકોની પૂછપરછ કરી રહી છે. એક હસતી-રમતી દીકરીના આવા આકસ્મિક અંતથી પરિવાર માથે આભ તૂટી પડ્યું છે અને સમગ્ર વિસ્તારમાં શોકનું મોજું ફરી વળ્યું છે.
વધુ સમાચાર વાંચવા માટે અંહી ક્લિક કરો
