Traffic Alert: જો તમે વાહન લઈને રસ્તા પર નીકળવાના હોવ તો ટ્રાફિકના તમામ નિયમોનું પાલન કરજો, નહીંતર ખિસ્સું ખાલી કરવું પડી શકે છે. રાજ્યમાં માર્ગ અકસ્માતોની વધતી સંખ્યાને નિયંત્રણમાં લાવવા માટે રાજ્ય પોલીસવડા ડો. કે. એલ. એન. રાવે આજથી એટલે કે 25 ફેબ્રુઆરીથી 10 માર્ચ સુધી સમગ્ર ગુજરાતમાં ખાસ ટ્રાફિક ડ્રાઈવનું આયોજન કરવાની સૂચના આપી છે.
Traffic Alert: પોલીસની નજર કયા નિયમો પર રહેશે?
આ 15 દિવસની ખાસ ઝુંબેશ દરમિયાન પોલીસ નીચે મુજબના નિયમ ભંગ કરનારાઓ સામે લાલ આંખ કરશે:
- નંબરપ્લેટ વિનાનાં વાહનો: નંબરપ્લેટ વગર ફરતા વાહનચાલકો સામે કાર્યવાહી.
- કાળા કાચ (Tinted Glass): ગાડીમાં બ્લેક ફિલ્મ લગાવનાર સામે દંડ.
- રોંગ સાઈડ ડ્રાઈવિંગ: અકસ્માતનું મુખ્ય કારણ બનતા રોંગ સાઈડ ડ્રાઈવિંગ પર કડક નજર.
- હેલ્મેટ અને સીટબેલ્ટ: સુરક્ષાના નિયમોનું ઉલ્લંઘન કરનારાઓને પકડવામાં આવશે.
- ડ્રિંક એન્ડ ડ્રાઈવ: નશો કરીને વાહન ચલાવનારાઓ સામે જેલ ભેગા કરવાની તૈયારી.
- ઓવરલોડિંગ: પેસેન્જર વાહનોમાં ક્ષમતા કરતા વધુ પેસેન્જરો બેસાડવા બદલ કાર્યવાહી.
Traffic Alert: કેમ લેવાયો આ નિર્ણય?
રાજ્ય પોલીસવડા દ્વારા તમામ પોલીસ કમિશનરો અને જિલ્લા પોલીસવડાઓને લખેલા પત્રમાં જણાવાયું છે કે, ગત વર્ષની સરખામણીએ આ વર્ષે માર્ગ અકસ્માતોની સંખ્યામાં ચિંતાજનક વધારો થયો છે. સમયાંતરે ડ્રાઈવ યોજવા છતાં લોકોમાં જાગૃતિના અભાવે અકસ્માતો ઘટી રહ્યા નથી, જેથી હવે કાયદાનું કડક પાલન કરાવવા માટે પોલીસના ધાડાં રસ્તા પર ઉતારવામાં આવ્યા છે.
Traffic Alert: રોજિંદી કામગીરીનો રિપોર્ટ સોંપવો પડશે
આ ડ્રાઈવ માત્ર નામની ન રહે તે માટે ઉચ્ચ અધિકારીઓ દ્વારા કડક સૂચના અપાઈ છે કે, દરેક શહેર અને જિલ્લામાં કેટલી કામગીરી થઈ, કેટલા મેમો ફાડવામાં આવ્યા અને કેટલો દંડ વસૂલાયો તેની વિગતો નિયત પત્રકમાં દરરોજ ગાંધીનગર હેડક્વાર્ટર ખાતે મોકલવાની રહેશે.
