Suspected Arson in Germany: જર્મનીના બોખુમ શહેરમાં એક રહેણાંક ઇમારતમાં લાગેલી ભીષણ આગમાં ત્રણ ભારતીય નાગરિકોનાં મોત થતાં ભારતીય સમુદાયમાં શોકની લાગણી ફેલાઈ છે. આ દુર્ઘટનામાં અન્ય પાંચ લોકો ઘાયલ થયા છે. ઘટનાની તપાસ દરમિયાન પોલીસે ઇમારતમાં રહેતા 41 વર્ષના રોમાનિયન નાગરિકની હત્યાની શંકાના આધારે ધરપકડ કરી છે. તપાસકર્તાઓ આગ પાછળ કોઈ વ્યક્તિનો હાથ હોવાની શક્યતાની તપાસ કરી રહ્યા છે.
Suspected Arson in Germany: ત્રણ ભારતીય નાગરિકોએ જીવ ગુમાવ્યા
આગ 13 ઓક્ટોબર, 2026ના રોજ વહેલી સવારે બોખુમના હોફસ્ટેડે વિસ્તારમાં આવેલી બહુમાળી રહેણાંક ઇમારતમાં લાગી હતી. આગ બુઝાવવાની કામગીરી દરમિયાન બીજા માળે આવેલા એક ફ્લેટમાંથી ત્રણ ભારતીય નાગરિકોના મૃતદેહ મળી આવ્યા હતા.
મૃતકોમાં 25 અને 27 વર્ષની બે યુવતીઓ તથા 26 વર્ષનો એક યુવક સામેલ છે. આગ અને ધુમાડાના કારણે અન્ય પાંચ લોકોને પણ અસર થઈ હતી. તેમને સારવાર માટે હોસ્પિટલમાં ખસેડવામાં આવ્યા હતા.
Suspected Arson in Germany: ટેકનિકલ ખામી નકારી કઢાઈ, આગજનીની આશંકા
પ્રાથમિક તપાસ દરમિયાન નિષ્ણાતોએ આગનું કારણ કોઈ ટેકનિકલ ખામી હોવાનું નકારી કાઢ્યું છે. ત્યારબાદ તપાસકર્તાઓએ આગ ઇરાદાપૂર્વક લગાવવામાં આવી હોવાની શક્યતા પર ધ્યાન કેન્દ્રિત કર્યું છે.
પોલીસે આ કેસમાં ઇમારતમાં રહેતા 41 વર્ષના રોમાનિયન નાગરિકની ધરપકડ કરી છે. તેની સામે હત્યાની શંકાના આધારે તપાસ હાથ ધરવામાં આવી છે. જોકે, આગ કેવી રીતે લાગી, આરોપીની ચોક્કસ ભૂમિકા શું હતી અને ઘટનાનો હેતુ શું હતો તે અંગે તપાસ ચાલુ છે.
Suspected Arson in Germany: આગ પહેલાં પણ ઇમારતમાં વિવાદ થયો હતો
જર્મન અહેવાલો અનુસાર, આગની ઘટના પહેલાં પણ આ જ ઇમારતમાં વિવાદને લઈને પોલીસ પહોંચી હતી. તપાસકર્તાઓ હવે અગાઉના વિવાદ અને આગની ઘટના વચ્ચે કોઈ સંબંધ છે કે નહીં તેની તપાસ કરી રહ્યા છે. જોકે, બંને ઘટનાઓ વચ્ચે સીધો સંબંધ હોવાની હજી સુધી પુષ્ટિ થઈ નથી.
Suspected Arson in Germany: બચાવ કામગીરીમાં મુશ્કેલી
આગ ઇમારતની સીડીમાંથી ઉપરની તરફ ફેલાતાં બચાવકર્મીઓને ઉપરના માળે રહેતા લોકોને બહાર કાઢવામાં મુશ્કેલી પડી હતી. ફાયર બ્રિગેડની ટીમે સીડીવાળા વાહન, પોર્ટેબલ સીડી અને અન્ય બચાવ સાધનોની મદદથી લોકોને સુરક્ષિત બહાર કાઢ્યા હતા.
હાલમાં પોલીસ અને તપાસ એજન્સીઓ આગ લાગવાનું ચોક્કસ કારણ, આરોપીની સંડોવણી અને ઘટનાની પાછળના સંભવિત હેતુ અંગે તપાસ કરી રહી છે. ત્રણ ભારતીય નાગરિકોનાં મોતને પગલે આ કેસ પર ભારત અને જર્મની બંને દેશોના લોકોની નજર છે.
વધુ સમાચાર વાંચવા માટે અંહી ક્લિક કરો: અમૂલ-મધર ડેરીને ટક્કર આપવા રિલાયન્સ મેદાનમાં: ₹20માં જોયલેન્ડ ફ્લેવર્ડ મિલ્ક લોન્ચ
