Rinku Singh:ભારતીય ક્રિકેટ ટીમના સ્ટાર બેટર અને વિસ્ફોટક ફિનિશર રિંકુ સિંહના પરિવાર પર દુઃખનો પહાડ તૂટી પડ્યો છે. T20 વર્લ્ડ કપની મહત્વની મેચો વચ્ચે રિંકુના પિતા ખાનચંદ સિંહનું શુક્રવારે વહેલી સવારે 4:36 વાગ્યે નિધન થયું છે. તેઓ છેલ્લા ઘણા સમયથી ચોથા સ્ટેજની ગંભીર બીમારી ‘લિવર કેન્સર’ સામે લડી રહ્યા હતા.
Rinku Singh:વેન્ટિલેટર પર હતા પિતા, રિંકુ ટીમ છોડીને દોડી આવ્યા હતા
ખાનચંદ સિંહની તબિયત વધુ લથડતા તેમને ગ્રેટર નોઈડાની ખાનગી હોસ્પિટલમાં વેન્ટિલેટર સપોર્ટ પર રાખવામાં આવ્યા હતા. પિતાની ગંભીર હાલતના સમાચાર મળતા જ રિંકુ સિંહ મંગળવારે ચેન્નઈમાં ટીમ ઈન્ડિયાનું પ્રેક્ટિસ સેશન છોડીને તાત્કાલિક ઘરે પહોંચ્યા હતા. જોકે, પિતાની તબિયત થોડી સ્થિર જણાતા તેઓ 25 ફેબ્રુઆરીએ ફરી ટીમ સાથે જોડાયા હતા, પરંતુ નિયતિને કંઈક બીજું જ મંજૂર હતું.
Rinku Singh:સંઘર્ષની ગાથા: સિલિન્ડર ડિલિવરીથી સ્ટેડિયમ સુધીની સફર
રિંકુ સિંહની સફળતા પાછળ તેમના પિતાનો મોટો ફાળો રહ્યો છે, ભલે શરૂઆતમાં પિતાને રિંકુનું રમવું પસંદ નહોતું.
- ગરીબીમાં વીત્યું બાળપણ: રિંકુના પિતા ગેસ સિલિન્ડર ડિલિવરીનું કામ કરતા હતા. રિંકુ અને તેના પાંચ ભાઈઓ પણ બાઇક પર સિલિન્ડર લાદીને હોટલો અને ઘરોમાં પહોંચાડવા જતા હતા.
- માતાનો સાથ: જ્યારે પિતા ક્રિકેટ રમવાની ના પાડતા, ત્યારે માતાએ દુકાનમાંથી 1000 રૂપિયા ઉધાર લઈને રિંકુને ટુર્નામેન્ટ રમવા મોકલ્યો હતો.
- સરકારી સ્ટેડિયમથી સફર: ક્લબ ક્રિકેટના પૈસા ન હોવાથી રિંકુ સરકારી સ્ટેડિયમમાં કાર્ડ બનાવી પ્રેક્ટિસ કરતો હતો.
વર્લ્ડ કપમાં રિંકુનું નબળું ફોર્મ, માનસિક તણાવ કારણભૂત?
ચાલુ T20 વર્લ્ડ કપ રિંકુ માટે બેટિંગની દૃષ્ટિએ કપરો સાબિત થઈ રહ્યો છે. કદાચ પિતાની માંદગીની ચિંતા તેના પ્રદર્શન પર પણ જોવા મળી રહી છે:
- વર્લ્ડ કપ સ્કોર: 5 મેચમાં માત્ર 24 રન. (સ્કોર: 6, 1, 11, 6, 0).
- દક્ષિણ આફ્રિકા સામેની છેલ્લી મેચમાં રિંકુ શૂન્ય રને આઉટ થયો હતો.
- 26 ફેબ્રુઆરીએ ઝિમ્બાબ્વે સામેની સુપર-8 મેચમાં તે પ્લેઈંગ ઈલેવનમાં નહોતો, પરંતુ સબસ્ટિટ્યૂટ ફિલ્ડર તરીકે મેદાન પર ઉતરીને પોતાની ફરજ બજાવી હતી.
આ પણ વાંચો :અફઘાનિસ્તાનનો પાકિસ્તાન પર મોટો હુમલો, 55 સૈનિકોનાં મોતનો દાવો; સામસામી એરસ્ટ્રાઈકથી યુદ્ધ જેવી સ્થિતિ
