Patan Mass Wedding: પાટણ જિલ્લાના સાંડેર બોડલધામ ખાતે 42 લેઉવા પાટીદાર સમાજ દ્વારા 74 યુગલના ભવ્ય સમૂહ લગ્નોત્સવનું આયોજન કરવામાં આવ્યું છે. ત્રણ દિવસ સુધી ચાલનારા આ ભવ્ય આયોજનનો પ્રારંભ 20 નવેમ્બરથી થયો છે, જ્યારે 22 નવેમ્બરે મુખ્ય સમૂહ લગ્નવિધિ યોજાશે. સામાજિક એકતા, સેવા અને સંસ્કૃતિના સંદેશ સાથે યોજાઈ રહેલા આ લગ્નોત્સવમાં મોટી સંખ્યામાં લોકો જોડાવાની અપેક્ષા છે. આ આયોજનને ભવ્ય બનાવવા માટે વિશાળ લગ્નમંડપ, આકર્ષક પ્રવેશદ્વાર અને આધુનિક સુવિધાઓ ઊભી કરવામાં આવી છે. ખાસ વાત એ છે કે આ સમૂહ લગ્નોત્સવમાં 74 યુગલોના નવા જીવનની શરૂઆત સામાજિક સહયોગ અને સેવાભાવના માહોલમાં થશે.

Patan Mass Wedding: ત્રણ દિવસનો કાર્યક્રમ, 22 નવેમ્બરે મુખ્ય લગ્નવિધિ
લગ્નોત્સવના પ્રથમ દિવસે એટલે કે 20 નવેમ્બરે સાંજે ગણેશ સ્થાપનનો કાર્યક્રમ યોજાયો છે. ત્યારબાદ 21 નવેમ્બરે મંડપ મુહૂર્તની ધાર્મિક વિધિ કરવામાં આવશે. જ્યારે 22 નવેમ્બરે રાત્રે 74 યુગલનાં સમૂહ લગ્ન યોજાશે. આ સમગ્ર આયોજન માટે વિશાળ વિસ્તારમાં લગ્નમંડપ અને વિવિધ વ્યવસ્થાઓ ઊભી કરવામાં આવી છે. અંદાજે 23 લાખ ચોરસ ફૂટના વિસ્તારમાં ગ્રામ્ય થીમ આધારિત આયોજન કરવામાં આવ્યું છે, જે આ સમૂહ લગ્નોત્સવનું વિશેષ આકર્ષણ બન્યું છે.
Patan Mass Wedding: દરેક કન્યાને પાંચ લાખની કરિયાવરની ભેટ
આ સમૂહ લગ્નોત્સવમાં 74 નવદંપતીઓને વિશેષ આર્થિક સુરક્ષા આપવાનું આયોજન પણ કરવામાં આવ્યું છે. દરેક કન્યાને અંદાજે પાંચ લાખ રૂપિયાની કરિયાવરની ભેટ આપવાની વ્યવસ્થા કરવામાં આવી છે. આ ઉપરાંત 74 નવદંપતીઓને કુલ 22 કરોડ રૂપિયાનું વીમા કવચ પૂરું પાડવાની પણ જાહેરાત કરવામાં આવી છે. આ પહેલથી નવદંપતીઓને લગ્નજીવનની શરૂઆતમાં આર્થિક સુરક્ષા અને સહયોગ મળી રહે તેવો હેતુ છે. સમૂહ લગ્નોત્સવમાં માત્ર લગ્નવિધિ જ નહીં, પરંતુ નવદંપતીઓના ભવિષ્યને ધ્યાનમાં રાખીને કરવામાં આવેલી આ વ્યવસ્થા પણ નોંધપાત્ર છે.
Patan Mass Wedding: 400 સ્વયંસેવકો સહિત સુવિધાઓની વિશેષ વ્યવસ્થા
આટલા મોટા આયોજનને સફળ બનાવવા માટે અંદાજે 400 સ્વયંસેવકોની ટીમ કાર્યરત રહેશે. મહેમાનો અને જાનૈયાઓની સુવિધા માટે 35 લક્ઝરી બસોની વ્યવસ્થા કરવામાં આવી છે. વડીલો અને સિનિયર સિટીઝનો માટે ઈ-રિક્ષા તથા વ્હીલચેરની સુવિધા પણ ઉપલબ્ધ કરાવવામાં આવશે. સાથે જ આરોગ્ય, ભોજન અને ટેકનિકલ ટીમોને પણ જવાબદારી સોંપવામાં આવી છે. આ પ્રસંગે જયેશભાઈ રાડડિયા, મહેશ સવાણી સહિતના મહાનુભાવો ઉપસ્થિત રહેવાના છે. લગ્ન નોંધણી સહિતની સરકારી યોજનાઓનો લાભ સ્થળ પર જ મળી રહે તેવી વ્યવસ્થા પણ કરવામાં આવી છે. સામાજિક સહયોગ, આર્થિક સુરક્ષા અને ભવ્ય આયોજનના સમન્વય સાથે યોજાઈ રહેલો આ સમૂહ લગ્નોત્સવ અન્ય સમાજો માટે પણ પ્રેરણારૂપ બની શકે છે.
વધુ સમાચાર વાંચવા માટે અંહી ક્લિક કરો

