Market Bloodbath: ભારતીય શેરબજાર માટે આજનો શુક્રવાર ‘બ્લેક ફ્રાઈડે’ સાબિત થયો છે. પશ્ચિમ એશિયામાં વધતા ભૂ-રાજકીય તણાવ અને ખાસ કરીને ઈરાન યુદ્ધની દહેશતને કારણે દલાલ સ્ટ્રીટમાં ભૂકંપ જેવી સ્થિતિ જોવા મળી હતી. સતત ત્રીજા ટ્રેડિંગ દિવસે બજાર લાલ નિશાનમાં બંધ રહ્યું હતું, જેમાં રોકાણકારોની સંપત્તિમાં ગણતરીના કલાકોમાં જ ₹10 લાખ કરોડનો જંગી ઘટાડો થયો છે.
Market Bloodbath: બજારની સ્થિતિ એક નજરે
શુક્રવારે કારોબારના અંતે બજારમાં સર્વત્ર વેચવાલીનું દબાણ જોવા મળ્યું હતું:
- BSE સેન્સેક્સ: 1470.50 પોઈન્ટના ઘટાડા સાથે 74,563 પર બંધ.
- NSE નિફ્ટી: 488.05 પોઈન્ટ ગગડીને 23,151.10 ના સ્તર પર સ્થિર.
Market Bloodbath: બજારમાં કડાકાના 4 મુખ્ય કારણો
1. કાચા તેલના ભાવમાં ભડકો: ઈરાન દ્વારા ઓઈલ ટેન્કરો પરના હુમલા બાદ સપ્લાય ખોરવાવાની ભીતિ સેવાઈ રહી છે. બ્રેન્ટ ક્રૂડના ભાવ 100.5 ડોલર પ્રતિ બેરલને પાર કરી ગયા છે. ભારત તેની જરૂરિયાતનું મોટાભાગનું તેલ આયાત કરતું હોવાથી મોંઘવારી વધવાની આશંકાએ બજાર ગભરાયું છે.
2. વૈશ્વિક બજારોમાં નબળાઈ: માત્ર ભારત જ નહીં, પરંતુ સમગ્ર વિશ્વના બજારોમાં નબળાઈ જોવા મળી રહી છે. અમેરિકાનો Dow Jones આ વર્ષે પ્રથમ વખત 47,000ની નીચે સરક્યો છે. જાપાનનો નિક્કી અને હોંગકોંગનો હેંગસેંગ ઇન્ડેક્સ પણ મોટા ઘટાડા સાથે બંધ રહ્યા હતા.
3. વિદેશી રોકાણકારો (FII) ની ભાગબટાઈ: વિદેશી સંસ્થાકીય રોકાણકારો ભારતીય બજારમાંથી સતત નાણાં ખેંચી રહ્યા છે. માત્ર માર્ચ મહિનામાં જ FII એ ₹39,000 કરોડ થી વધુની વેચવાલી કરી છે, જે બજાર માટે મોટો ઝટકો છે.
4. રૂપિયાનું ઐતિહાસિક પતન: ડોલર સામે ભારતીય રૂપિયો નબળો પડીને 92.37 ના ઓલ-ટાઈમ લો લેવલ પર પહોંચી ગયો છે. રૂપિયાના મૂલ્યમાં ઘટાડાને કારણે વિદેશી રોકાણકારોમાં ફાળફાટ વ્યાપી છે.
આ પણ વાંચો :પાકિસ્તાન અને અફઘાનિસ્તાન વચ્ચે યુદ્ધ જેવી સ્થિતિ, કંધારમાં તેલના ડેપો પર એરસ્ટ્રાઈક
