IPL ૨૦૨૩ની ૨૨મી મેચ મુંબઈના વાનખેડે સ્ટેડીયમમાં મુંબઈ ઇન્ડિયન્સ અને કોલકત્તા નાઈટ રાઈડર્સ વચ્ચે રમાઈ હતી. આ મેચમાં મુંબઈના તુફાન સામે કોલકત્તાની ટીમ ડગમગી ગઈ હતી. આ મેચમાં ૧૪ બોલ પહેલા જ મુંબઈનો શાનદાર વિજય થયો છે. આ મેચમાં મુંબઈએ ટોસ જીતીને પ્રથમ બોલિંગ કરવાનો નિર્ણય લીધો હતો અને કોલકત્તાને પ્રથમ બેટિંગ માટે આમંત્રણ આપ્યું હતું. આ મેચમાં કોલકત્તા તરફથી વેંકટેશ ઐયરે શાનદાર શતક ફટકાર્યું હતું. ઐયરે ૫૧ બોલમાં ૧૦૪ રન ફટકાર્યા હતા, પરંતુ તેની આ સેન્ચ્યુરી કોલકત્તાને કામે લાગી નહોતી. આ મેચમાં કોલકત્તાએ ૨૦ ઓવરના અંતે ૬ વિકેટના ભોગે ૧૮૫ રન ફટકાર્યા હતા. જેના જવાબમાં મુંબઈએ માત્ર ૧૭ ઓવર અને ૪ બોલમાં જ આ લક્ષ્ય હાંસલ કર્યું હતું. મુંબઈએ ૫ વિકેટના ભોગે ૧૮૬ રન ફટકારીને મેચમાં જીત પોતાના નામે કરી હતી. મુંબઈ તરફથી ઇશાન કિશને ૨૫ બોલમાં ૫૮ રન, જ્યારે સૂર્યકુમારે ૨૫ બોલમાં ૪૩ રન ફટકાર્યા હતા. મુંબઈ તરફથી શોકીને ૨ વિકેટ ઝડપી હતી, જ્યારે કોલકત્તા તરફથી સુનિલ નારાયણે ૨ વિકેટ ઝડપી હતી.
