Indian Tourist Attack :થાઈલેન્ડના પ્રખ્યાત ટૂરિસ્ટ શહેર પટાયામાં એક ભારતીય પ્રવાસી પર થયેલા જીવલેણ હુમલાનો ચોંકાવનારો કિસ્સો સામે આવ્યો છે. મસાજ સર્વિસ લીધા બાદ પેમેન્ટ ચૂકવવાની ના પાડતા ટ્રાન્સજેન્ડર મહિલાઓના એક જૂથે ભારતીય નાગરિકને ગાડીમાંથી બહાર ખેંચી લઈ નિર્દયતાથી માર માર્યો હતો. આ સમગ્ર ઘટનાનો વીડિયો સોશિયલ મીડિયા પર વાયરલ થયો છે.
Indian Tourist Attack :27 ડિસેમ્બરની રાત્રે બની ઘટના
સ્થાનિક મીડિયા રિપોર્ટ અનુસાર, આ ઘટના 27 ડિસેમ્બરની રાત્રે બની હતી. મારપીટનો ભોગ બનેલા ભારતીય નાગરિકની ઓળખ 52 વર્ષીય રાજ જસૂજા તરીકે થઈ છે. વીડિયોમાં સ્પષ્ટ રીતે જોઈ શકાય છે કે ત્રણ ટ્રાન્સજેન્ડર મહિલાઓ રાજ જસૂજા પાસે પૈસાની માગ કરી રહી છે.
Indian Tourist Attack :કારમાંથી બહાર ખેંચી કરી મારપીટ
જ્યારે રાજ જસૂજાએ પેમેન્ટ કરવાનો ઇનકાર કર્યો અને પોતાની કાર લઈને ત્યાંથી નીકળવાની કોશિશ કરી, ત્યારે વિવાદ ઉગ્ર બની ગયો. આરોપ છે કે ટ્રાન્સજેન્ડર મહિલાઓના જૂથે તેમને કારમાંથી બહાર ખેંચી રસ્તા પર જ ધીબેડી નાખ્યા. ઘટના દરમિયાન રસ્તા પર લોકોની અવરજવર હોવા છતાં કોઈએ વચ્ચે પડવાનો પ્રયાસ કર્યો નહોતો અને ઘણા લોકો તમાશો જોતા રહ્યા.
ચહેરા અને માથામાં ગંભીર ઈજા
મારપીટમાં રાજ જસૂજાના ચહેરા અને માથામાં ગંભીર ઈજા પહોંચી હતી. બાદમાં ઈમરજન્સી રેસ્ક્યુ ટીમ ઘટના સ્થળે પહોંચી અને તેમને બચાવી સારવાર માટે પટ્ટામાકુન હોસ્પિટલમાં ખસેડવામાં આવ્યા હતા. હાલ તેમની સ્થિતિ સ્થિર હોવાનું જાણવા મળ્યું છે.
સ્વસ્થ થયા બાદ ફરિયાદ નોંધાવશે
થાઈ પોલીસના જણાવ્યા અનુસાર, રાજ જસૂજા સંપૂર્ણ સ્વસ્થ થયા પછી તેમની ઔપચારિક ફરિયાદ લેવામાં આવશે. ફરિયાદ બાદ સમગ્ર મામલાની તપાસ થાઈ કાયદા હેઠળ હાથ ધરવામાં આવશે. વાયરલ વીડિયો બાદ થાઈલેન્ડમાં પ્રવાસીઓની સુરક્ષાને લઈને ફરી એકવાર સવાલો ઉઠી રહ્યા છે.
