Himanta Biswa Sarma: આસામના આગામી મુખ્યમંત્રી પદને લઈને છેલ્લા કેટલાક સમયથી ચાલી રહેલી તમામ અટકળો પર આજે પૂર્ણવિરામ મુકાયું છે. ભાજપ ધારાસભ્ય દળની બેઠકમાં હિમંતા બિસ્વા સરમાને સર્વાનુમતે નેતા તરીકે પસંદ કરવામાં આવ્યા છે. ભાજપના રાષ્ટ્રીય અધ્યક્ષ જે.પી. નડ્ડાએ સત્તાવાર રીતે તેમના નામની જાહેરાત કરી છે, જેની સાથે જ સરમા સતત બીજી વખત આસામના મુખ્યમંત્રી બનવા જઈ રહ્યા છે.
Himanta Biswa Sarma: શપથવિધિની વિગતો
હિમંતા બિસ્વા સરમા 12 મે 2026ના રોજ સવારે 11:00 વાગ્યે આસામના મુખ્યમંત્રી તરીકે શપથ ગ્રહણ કરશે. આ ભવ્ય સમારોહમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ અને NDAના અન્ય દિગ્ગજ નેતાઓ હાજર રહે તેવી પ્રબળ શક્યતા છે.
Himanta Biswa Sarma: હાઈકમાન્ડનો અતૂટ વિશ્વાસ
ભાજપ હાઈકમાન્ડે ફરી એકવાર હિમંતા બિસ્વા સરમાની વહીવટી કુશળતા અને મજબૂત નેતૃત્વ પર ભરોસો મૂક્યો છે. પૂર્વોત્તર ભારતમાં ભાજપના સૌથી કદાવર નેતા ગણાતા સરમાએ છેલ્લા પાંચ વર્ષમાં રાજ્યના વિકાસ અને સંગઠનને જે ગતિ આપી છે, તેનું જ આ પરિણામ છે.
Himanta Biswa Sarma: હિમંતા બિસ્વા સરમા: એક નજર રાજકીય સફર પર
હિમંતા બિસ્વા સરમાની રાજકીય સફર સંઘર્ષ અને વ્યૂહરચનાથી ભરેલી રહી છે. તેમની કારકિર્દીના મુખ્ય પડાવો નીચે મુજબ છે:
- શરૂઆત (1990-2001): કોંગ્રેસના વિદ્યાર્થી સંગઠન NSUI થી રાજકારણમાં પ્રવેશ. હિતેશ્વર સૈકિયાના માર્ગદર્શન હેઠળ યુવા નેતા તરીકે ઉભરી આવ્યા.
- અજેય ધારાસભ્ય (2001): ગુવાહાટીની જલુકબારી બેઠક પરથી પ્રથમવાર ધારાસભ્ય બન્યા. ત્યારથી આજ સુધી તેઓ આ બેઠક પર ક્યારેય હાર્યા નથી.
- મંત્રી તરીકેનો અનુભવ (2002-2014): કોંગ્રેસ શાસનમાં કૃષિ, આરોગ્ય અને શિક્ષણ જેવા મહત્વના વિભાગો સંભાળ્યા.
- ભાજપમાં પ્રવેશ (2015): તત્કાલીન CM તરુણ ગોગોઈ સાથેના મતભેદો બાદ ઓગસ્ટ 2015માં ભાજપમાં જોડાયા. આ એક એવો વળાંક હતો જેણે આખા પૂર્વોત્તર ભારતનું રાજકારણ બદલી નાખ્યું.
- સત્તાના સૂત્રધાર (2016): આસામમાં ભાજપની પ્રથમ સરકાર બનાવવામાં મુખ્ય ભૂમિકા ભજવી અને NEDA ના કન્વીનર તરીકે પૂર્વોત્તરમાં કેસરીયો લહેરાવ્યો.
- મુખ્યમંત્રી તરીકેની પ્રથમ ટર્મ (2021): 10 મે 2021ના રોજ આસામના 15માં મુખ્યમંત્રી તરીકે શપથ લીધા.
- ઐતિહાસિક બીજી ટર્મ (2026): પોતાની વહીવટી ક્ષમતાના જોરે હવે 12 મેના રોજ ફરી સત્તાના સિંહાસન પર બિરાજશે.
વધુ સમાચાર વાંચવા માટે અંહી ક્લિક કરો
