Fatal Encounter with Stray Cattle: સાણંદ-બાવળા હાઈવે પર રખડતા ઢોરનો ત્રાસ વાહનચાલકો માટે જીવલેણ સાબિત થઈ રહ્યો છે. ગત ૧૬ જુલાઈની રાત્રે પીંપણ ગામ નજીક રસ્તાની વચ્ચે અડીંગો જમાવીને બેઠેલી રખડતી ગાયો સાથે બાઈક અથડાતા એક યુવકનું ગંભીર ઈજાઓને કારણે ઘટનાસ્થળે જ મોત નીપજ્યું હતું. આ સમગ્ર ઘટના નજીકમાં લાગેલા સીસીટીવી (CCTV) કેમેરામાં કેદ થતા લોકોમાં ભારે રોષ જોવા મળી રહ્યો છે.
Fatal Encounter with Stray Cattle: અંધારામાં કાળ બનીને આવી ગાયો
મળતી માહિતી મુજબ, ૧૬ જુલાઈના રોજ રાત્રે આશરે સાડા આઠ વાગ્યાના સુમારે એક યુવક પોતાના બાઈક પર સાણંદ-બાવળા રોડ પરથી પસાર થઈ રહ્યો હતો. રાત્રિના અંધારામાં રોડની વચ્ચે બેઠેલી ૧૦થી વધુ ગાયોનું ટોળું બાઈકસવારને દેખાયું ન હતું, જેના કારણે બાઈક સીધું જ ગાયો સાથે ધડાકાભેર અથડાયું હતું.
Fatal Encounter with Stray Cattle: સીસીટીવીમાં કેદ થઈ હૃદયદ્રાવક દ્રશ્યો
આ અકસ્માતના સીસીટીવી ફૂટેજમાં જોઈ શકાય છે કે યુવક ફૂલ સ્પીડમાં જઈ રહ્યો છે અને અચાનક ગાયો સામે આવી જતાં તે કાબૂ ગુમાવે છે. ટક્કર એટલી પ્રચંડ હતી કે યુવક હવામાં ફંગોળાઈને દૂર જઈને પટકાયો હતો. માથા અને શરીરના અન્ય ભાગોમાં ગંભીર ઈજાઓ થવાના કારણે યુવકે સ્થળ પર જ દમ તોડી દીધો હતો. અકસ્માત બાદ ગાયો પણ ડરીને ઊભી થતી દ્રશ્યોમાં જોવા મળે છે.
Fatal Encounter with Stray Cattle: તંત્ર સામે સ્થાનિકોમાં આક્રોશ
આ દુર્ઘટના બાદ મૃતકના પરિવાર પર આભ તૂટી પડ્યું છે. સ્થાનિક લોકોમાં તંત્રની નિષ્ક્રિયતા સામે ભારે રોષ જોવા મળી રહ્યો છે. રહેવાસીઓનું કહેવું છે કે:
- આ રોડ પર રખડતા ઢોરનો ત્રાસ કાયમી બની ગયો છે, છતાં તંત્ર કોઈ કડક પગલાં લેતું નથી.
- તમામ રખડતા ઢોરને પકડીને સુરક્ષિત ગૌશાળા કે પાંજરાપોળમાં ખસેડવામાં આવે.
- રસ્તા પર પશુઓને રખડતા મૂકનાર બેજવાબદાર પશુમાલિકો સામે કડક કાયદેસરની કાર્યવાહી કરવામાં આવે.
આ ઘટનાએ ફરી એકવાર રખડતા ઢોરના મુદ્દે વહીવટીતંત્રની ગંભીરતા પર સવાલો ઉભા કર્યા છે. શું હવે તંત્ર કોઈ નક્કર પગલાં લેશે કે પછી કોઈ અન્ય નિર્દોષ વ્યક્તિએ જીવ ગુમાવવો પડશે?
વધુ સમાચાર વાંચવા માટે અંહી ક્લિક કરો
