Bullet Train Progress: દેશના પ્રથમ બુલેટ ટ્રેન પ્રોજેક્ટમાં અમદાવાદના આંગણે વધુ એક સીમાચિહ્નરૂપ કામગીરી પૂર્ણ થઈ છે. સાબરમતી નદી પર બની રહેલો બુલેટ ટ્રેનનો પુલ હવે આકાર લઈ રહ્યો છે, જેની ઊંચાઈ અને અદ્યતન ટેકનોલોજી સૌ કોઈને દંગ કરી દે તેવી છે.
Bullet Train Progress: પુલની વિશેષતાઓ અને ઊંચાઈ
- 12 માળ જેટલી ઊંચાઈ: સાબરમતી નદી પર બનેલા આ પુલની ઊંચાઈ 36 મીટર (આશરે 118 ફૂટ) છે. જે સામાન્ય રીતે 12 માળની રહેણાંક ઇમારત જેટલી થાય છે.
- વિશાળ સંરચના: 480 મીટર લાંબા આ પુલ માટે કુલ 8 વર્તુળાકાર પિયર્સ બનાવવામાં આવ્યા છે, જેનો વ્યાસ 6 થી 6.5 મીટર જેટલો વિશાળ છે.
- લોકેશન: આ પુલ પશ્ચિમ રેલવેની અમદાવાદ-દિલ્હી મેઈન લાઈનની બિલકુલ બાજુમાં સ્થિત છે, જે સાબરમતી સ્ટેશનથી 1 કિમી અને અમદાવાદ સ્ટેશનથી 4 કિમીના અંતરે છે.
Bullet Train Progress: ‘બેલેન્સ્ડ કેન્ટિલીવર’ ટેકનોલોજીનો ઉપયોગ
આ પુલના નિર્માણમાં અત્યાધુનિક ‘બેલેન્સ્ડ કેન્ટિલીવર’ (Balanced Cantilever) પદ્ધતિનો ઉપયોગ કરવામાં આવ્યો છે. આ ટેકનોલોજીમાં નદીના પાણીમાં નીચેથી કોઈ ટેકો આપ્યા વગર, પિયરની બંને બાજુએ સંતુલન જાળવીને સેગમેન્ટ્સ જોડવામાં આવે છે. આ પદ્ધતિ ઊંડા પાણી અને લાંબા સ્પાન માટે સૌથી સુરક્ષિત અને શ્રેષ્ઠ માનવામાં આવે છે.
Bullet Train Progress: પર્યાવરણની જાળવણી
બાંધકામ દરમિયાન સાબરમતી નદીના કુદરતી પ્રવાહમાં કોઈ વિક્ષેપ ન પડે તેની ખાસ તકેદારી રાખવામાં આવી છે. નદીના પટમાં હ્યુમ પાઈપ કલ્વર્ટ્સ ગોઠવીને પાણીનો પ્રવાહ મુક્ત રીતે વહેતો રાખવામાં આવ્યો છે.
વર્તમાન સ્થિતિ
પુલના પાયા અને સબસ્ટ્રક્ચરનું તમામ કામ સો ટકા પૂર્ણ થઈ ગયું છે. 76 મીટરના ત્રણ સ્પાન તૈયાર છે, જ્યારે બાકીના સ્પાન અને સેગમેન્ટ કાસ્ટિંગની કામગીરી હાલમાં યુદ્ધના ધોરણે ચાલી રહી છે.
વધુ સમાચાર વાંચવા માટે અંહી ક્લિક કરો
