Ahmedabad News:શહેરના અમરાઈવાડી વિસ્તારમાં એક હૃદયદ્રાવક અને ચોંકાવનારો કિસ્સો પ્રકાશમાં આવ્યો છે. પોતાની અઢી મહિનાની માસૂમ દીકરી પાણીની ટાંકીમાં પડી ગયા બાદ તેને બચાવવાને બદલે, પોતાની ભૂલ છુપાવવા માટે માતાએ ટાંકીનું ઢાંકણું બંધ કરી ઉપર તગારું મૂકી દીધું હતું. આ મામલે અમરાઈવાડી પોલીસે નિર્દયી માતા સામે સાપરાધ મનુષ્ય વધનો ગુનો નોંધી તેની ધરપકડ કરી છે.
Ahmedabad News:શું હતી સમગ્ર ઘટના?
અમરાઈવાડીના સિદ્ધેશ્વરી નગરમાં રહેતા અને લેથ મશીન ઓપરેટર તરીકે કામ કરતા દીપક મકવાણાએ પોતાની પત્ની મોનિકા વિરુદ્ધ ફરિયાદ નોંધાવી છે. દીપક જ્યારે ગેસ સિલિન્ડર બુક કરાવવા લાઈનમાં ઉભો હતો, ત્યારે પડોશીએ ફોન કરીને જાણ કરી કે ઘરે કંઈક અઘટિત બન્યું છે. દીપક ઘરે પહોંચ્યો ત્યારે બાળકી પાણીમાં પડી હોવાનું જાણવા મળ્યું હતું. હોસ્પિટલ લઈ જતા ડોક્ટરોએ બાળકીને મૃત જાહેર કરી હતી.
Ahmedabad News:માતાની કબૂલાત: “આરોપ ન આવે એટલે ઢાંકણું બંધ કર્યું”
બાળકીના મોત બાદ પત્ની મોનિકાએ રડતા-રડતા પતિ સામે જે હકીકત જણાવી તે સાંભળીને સૌ કોઈ સ્તબ્ધ થઈ ગયા હતા. મોનિકાએ કબૂલ્યું કે:
- તે ઉપરના માળે પાણી ચઢાવવા મોટરની સ્વીચ પાડવા નીચે ગઈ ત્યારે દીકરી તેની પાસે હતી.
- અચાનક પગ લપસતા દીકરી તેના હાથમાંથી છટકીને સીધી પાણીની ટાંકીમાં પડી ગઈ હતી.
- દીકરીને બહાર કાઢવાને બદલે તે ગભરાઈ ગઈ હતી કે તેના પર આરોપ આવશે.
- પોતાનો ગુનો છુપાવવા તેણે ટાંકીનું ઢાંકણું બંધ કરી દીધું અને તેની ઉપર તગારું મૂકી દીધું જેથી કોઈને ખબર ન પડે.
પતિએ નોંધાવી ફરિયાદ, પત્ની જેલહવાલે
પોતાની જ દીકરીને બચાવવાને બદલે મોતના મોઢામાં ધકેલી દેનાર પત્નીની કરતૂત જાણીને પતિ દીપકે કાયદેસરની કાર્યવાહી કરવાનું નક્કી કર્યું. પત્નીના બદઈરાદા અને બેદરકારીને કારણે બાળકીનું મોત નીપજ્યું હોવાનું જણાતા પોલીસે આકરી કલમો હેઠળ ગુનો દાખલ કરી મોનિકાની ધરપકડ કરી છે.
આ પણ વાંચો :શરૂઆત પહેલા જ CSKને મોટો ઝટકો, સ્નાયુમાં ખેંચાણને કારણે ધોની શરૂઆતની મેચોમાંથી બહાર!
