Gujarat Weather Update: ગુજરાતમાં ચોમાસાની ઋતુએ હવે આક્રમક મિજાજ ધારણ કર્યો છે. રાજ્યના હવામાન વિભાગ દ્વારા આજે ૨૨ જુલાઈએ ખાસ કરીને દક્ષિણ ગુજરાતમાં ‘રેડ એલર્ટ’ જાહેર કરવામાં આવ્યું છે. છેલ્લા કેટલાક કલાકોથી પડી રહેલા મુશળધાર વરસાદને કારણે દક્ષિણ ગુજરાતના અનેક વિસ્તારોમાં પાણી ભરાયા છે અને જનજીવન અસ્તવ્યસ્ત થઈ ગયું છે. ઉપરવાસમાં ભારે વરસાદના પગલે નદીઓ બે કાંઠે વહી રહી છે, જ્યારે તંત્ર દ્વારા લોકોને સાવચેત રહેવા અપીલ કરવામાં આવી છે.
Gujarat Weather Update:૪ ઈંચ વરસાદથી સુરત અને વલસાડમાં જળબંબાકાર
રાજ્યમાં આજે સવારે ૬ વાગ્યાથી ૧૦ વાગ્યા સુધીમાં કુલ ૮૧ તાલુકાઓમાં વરસાદ નોંધાયો છે. જેમાં સૌથી વધુ ૪ ઈંચ વરસાદ વલસાડમાં અને સુરતના પલસાણા તાલુકામાં ખાબક્યો છે. સુરતમાં ભારે વરસાદને કારણે ભેદવાડ ખાડી ઓવરફ્લો થઈ ગઈ છે, જેના પરિણામે નીચાણવાળા વિસ્તારોમાં પાણી ભરાયા છે અને માર્ગો પર જળબંબાકાર જેવી સ્થિતિ સર્જાઈ છે. વિદ્યાર્થીઓની સુરક્ષાને ધ્યાનમાં રાખીને તંત્ર દ્વારા સ્કૂલોમાં રજા જાહેર કરવામાં આવી છે.
બીજી તરફ, છેલ્લા ૨૪ કલાક દરમિયાન રાજ્યના ૧૭૩ તાલુકાઓમાં મેઘરાજાએ મન મૂકીને વરસ્યા છે. સૌથી વધુ કપરાડામાં ૧૬ ઈંચ, વલસાડના નાનાપોંઢામાં ૧૧ ઈંચ, તેમજ ચીખલી અને વાંસદામાં ૧૦ ઈંચ જેટલો અતિભારે વરસાદ નોંધાયો છે. નવસારીની ચીખલીમાં કાવેરી નદી બે કાંઠે વહેવા લાગી છે. વાંસદા તાલુકામાં બોપી-મોળા આંબા કોઝવે પરથી પસાર થઈ રહેલી એક ‘ઇકો’ કાર પાણીના પ્રવાહમાં તણાઈ ગઈ હતી, જોકે સદનસીબે તેમાં સવાર એક વ્યક્તિનો આબાદ બચાવ થયો છે.
Gujarat Weather Update: નવસારી અને વલસાડમાં રેડ એલર્ટ
હવામાન વિભાગની આગાહી મુજબ, આગામી સાત દિવસ સુધી રાજ્યમાં વરસાદી માહોલ યથાવત રહેશે. ખાસ કરીને આજે ૨૨ જુલાઈએ નવસારી અને વલસાડ જિલ્લામાં કેટલાક સ્થળોએ અત્યંત ભારે વરસાદ (રેડ એલર્ટ) ની શક્યતા છે.
- અતિભારે વરસાદની શક્યતા (ઓરેન્જ એલર્ટ): સુરત, ડાંગ, તાપી, દમણ અને દાદરા-નગર હવેલી.
- ભારે વરસાદની શક્યતા: પંચમહાલ, દાહોદ, વડોદરા, છોટા ઉદેપુર, નર્મદા, ભરૂચ તેમજ સૌરાષ્ટ્રના અમરેલી, ભાવનગર, ગીર સોમનાથ અને બોટાદ.
આ દરમિયાન કેટલાક વિસ્તારોમાં ગાજવીજ સાથે ૩૦થી ૪૦ કિલોમીટર પ્રતિ કલાકની ઝડપે પવન ફૂંકાવાની પણ સંભાવના છે.
Gujarat Weather Update: આગામી દિવસોમાં કેવું રહેશે હવામાન?
હવામાન વિભાગના જણાવ્યા અનુસાર, ૨૩ અને ૨૪ જુલાઈ દરમિયાન પણ દક્ષિણ ગુજરાત અને ઉત્તર ગુજરાતમાં વરસાદી માહોલ જળવાઈ રહેશે. ઉત્તર ગુજરાતના મોટાભાગના જિલ્લાઓમાં હળવાથી મધ્યમ વરસાદની સંભાવના છે, જ્યારે દક્ષિણ ગુજરાતમાં સતત વરસાદ વરસી શકે છે. સૌરાષ્ટ્રમાં કેટલાક સ્થળોએ અને કચ્છમાં છૂટાછવાયા સ્થળોએ વરસાદી ઝાપટાં પડી શકે છે.
ભારે વરસાદની સ્થિતિને ધ્યાનમાં રાખીને વહીવટી તંત્ર સજ્જ થઈ ગયું છે અને નાગરિકોને નદી-નાળા કે કોઝવે પાર ન કરવા તેમજ બિનજરૂરી ઘરની બહાર ન નીકળવા સલાહ આપવામાં આવી છે.
આ પણ વાંચો :પૂર્વ અગ્નિવીરો માટે કેન્દ્ર સરકારનો મોટો નિર્ણય, CAPF અને અસમ રાઇફલ્સમાં ભરતીમાં મળશે 50% અનામત
