Patan Crime Update: ગુજરાતમાં નશાના કારોબાર સામે પોલીસે લાલ આંખ કરી છે, ત્યારે પાટણ જિલ્લાના સાંતલપુર તાલુકામાંથી બિનકાયદેસર માદક પદાર્થના વાવેતરનો એક ચોંકાવનારો કિસ્સો સામે આવ્યો છે. સાંતલપુરના ડાલડી ગામે એસ.ઓ.જી. (SOG) અને સ્થાનિક પોલીસની સંયુક્ત ટીમે બાતમીના આધારે દરોડો પાડીને એક ખેતરમાંથી લીલા ગાંજાના છોડ સાથે એક આરોપીને ઝડપી પાડ્યો છે.
Patan Crime Update: ખેતરમાંથી ₹3.92 લાખનો મુદ્દામાલ જપ્ત
મળતી માહિતી મુજબ, ડાલડી ગામની સીમમાં આવેલા એક ખેતરમાં ગેરકાયદેસર રીતે ગાંજાનું વાવેતર કરાયું હોવાની ચોક્કસ બાતમી પોલીસને મળી હતી. જેના આધારે એસ.ઓ.જી. અને સાંતલપુર પોલીસે સંયુક્ત ઓપરેશન હાથ ધરીને ખેતરમાં રેડ કરી હતી. તપાસ દરમિયાન ખેતરમાંથી 7.840 કિલોગ્રામ વજન ધરાવતા લીલા ગાંજાના 5 છોડ મળી આવ્યા હતા. પોલીસે આ લીલા ગાંજાના છોડ અને મોબાઈલ ફોન સહિત કુલ ₹3.92 લાખનો મુદ્દામાલ કબજે કર્યો છે.
Patan Crime Update: કોની થઈ ધરપકડ?
આ ગેરકાયદેસર વાવેતર મામલે પોલીસે ખેતરના માલિક દાનાભાઈ આલાભાઈ ગણેશભાઈ કોલીની સ્થળ પરથી જ ધરપકડ કરી લીધી છે. પકડાયેલા આરોપી પાસે ગાંજાનું વાવેતર કરવા માટે સરકાર કે તંત્ર તરફથી કોઈ પણ પ્રકારનો પાસ કે પરમિટ નહોતી. પ્રાથમિક તપાસ બાદ એફ.એસ.એલ. (FSL) ની ટીમને બોલાવી તપાસ કરાવતા આ છોડ નશીલા પદાર્થ ગાંજાના જ હોવાની સત્તાવાર પુષ્ટિ થઈ હતી.
Patan Crime Update: ગાંજો પીવાની ટેવ હોવાથી કર્યું વાવેતર!
પોલીસની પ્રાથમિક પૂછપરછમાં આરોપી દાનાભાઈ કોલીએ ચોંકાવનારી કબૂલાત કરી છે. તેણે જણાવ્યું કે, તેને પોતે ગાંજો પીવાની (નશો કરવાની) કુટેવ હોવાથી તેણે પોતાના જ ખેતરમાં આ છોડ વાવી દીધા હતા. જોકે, આ પાછળ તેનો ઈરાદો માત્ર પોતાના નશા પૂરતો હતો કે પછી તે આ ગાંજો અન્ય લોકોને વેચવાનો હતો, તે દિશામાં પોલીસે તપાસ તેજ કરી છે.
હાલમાં સાંતલપુર પોલીસે આ મામલે આરોપી વિરૂદ્ધ એન.ડી.પી.એસ. (NDPS) એક્ટ હેઠળ ગુનો નોંધીને કાયદેસરની કાર્યવાહી હાથ ધરી છે અને આ નેટવર્કમાં અન્ય કોઈ સંડોવાયેલું છે કે નહીં તેની વધુ તપાસ શરૂ કરી છે.
વધુ સમાચાર વાંચવા માટે અંહી ક્લિક કરો: ભાવનગરના ગરાજીયા ગામમાં સિંહનો આતંક, માલધારી પર હુમલો કરી અડધો કલાક હાથ જડબામાં રાખ્યો, ગામમાં ફફડાટ
