Amreli Traffic Haltd: અમરેલી જિલ્લામાં ભારે વરસાદ અને કુદરતી પ્રકોપને કારણે જનજીવન અસ્તવ્યસ્ત થઈ ગયું છે. જિલ્લાના મોટાભાગના મુખ્ય માર્ગો પર વાહન વ્યવહાર સંપૂર્ણપણે ઠપ્પ થઈ ગયો છે. સૌથી ચિંતાજનક સ્થિતિ અમરેલી અને સાવરકુંડલા વચ્ચેના નેશનલ હાઈવે પર સર્જાઈ છે, જ્યાં રસ્તાની વચ્ચે એક મસમોટો ભુવો પડી જતાં આ વ્યસ્ત હાઈવે બંધ કરવાની ફરજ પડી છે.
મળતી માહિતી મુજબ, જિલ્લામાં થઈ રહેલા ધોધમાર વરસાદને કારણે નદી-નાળાઓ ઉભરાયા છે. પાણીના ધસમસતા પ્રવાહના કારણે સીમરણ નજીકથી પસાર થતા નેશનલ હાઈવે પર રોડનું ધોવાણ થયું હતું અને જોતજોતામાં હાઈવેની વચ્ચોવચ એક ભયાનક ભુવો પડી ગયો હતો.
Amreli Traffic Haltd: રાત-દિવસ ધમધમતો હાઈવે સૂમસામ બન્યો
અમરેલી-સાવરકુંડલા માર્ગ એ જિલ્લાની જીવાદોરી સમાન છે, જ્યાં રાત-દિવસ નાના-મોટા હજારો વાહનોની અવરજવર રહે છે. પરંતુ હાઈવે પર જ મોટું ગાબડું પડી જતાં તંત્ર દ્વારા તાત્કાલિક ધોરણે વાહનોની અવરજવર રોકી દેવામાં આવી છે. રસ્તાની બંને તરફ વાહનોની લાંબી કતારો લાગી ગઈ છે અને મુસાફરો ભારે મુશ્કેલીમાં મુકાયા છે.
સ્થાનિક વહીવટી તંત્ર અને હાઈવે ઓથોરિટીને આ અંગે જાણ કરવામાં આવી છે. પરંતુ પાણીનો પ્રવાહ હજુ પણ તેજ હોવાના કારણે રસ્તાના સમારકામમાં મુશ્કેલી પડી રહી છે. તંત્ર દ્વારા વાહનચાલકોને વૈકલ્પિક માર્ગોનો ઉપયોગ કરવા અથવા અત્યારે આ માર્ગ પર મુસાફરી ટાળવા અપીલ કરવામાં આવી છે.
વધુ સમાચાર વાંચવા માટે અંહી ક્લિક કરો: VMCની કચરાની ગાડીએ ડિવાઈડર કૂદાવી કારને મારી ટક્કર, ગાડીમાંથી મળી દેશી દારૂની પોટલી!
