ICC Rankings: આંતરરાષ્ટ્રીય ક્રિકેટ કાઉન્સિલ (ICC) દ્વારા જાહેર કરવામાં આવેલી તાજેતરની સાપ્તાહિક રેન્કિંગમાં મોટો ઉલટફેર જોવા મળ્યો છે. અફઘાનિસ્તાન સામેની વનડે શ્રેણીમાં શાનદાર પ્રદર્શન કરનારા ભારતીય કેપ્ટન અને ક્રિકેટ જગતના ‘પ્રિન્સ’ તરીકે જાણીતા શુભમન ગિલે લાંબી છલાંગ લગાવીને વનડે રેન્કિંગમાં બીજું સ્થાન મેળવી લીધું છે. આ સાથે જ તેમણે ઈજાના કારણે બહાર રહેલા ‘કિંગ’ વિરાટ કોહલીને ત્રીજા સ્થાને ધકેલી દીધા છે.
બીજી તરફ, ટેસ્ટ ક્રિકેટમાં ન્યુઝીલેન્ડના ફાસ્ટ બોલર મેટ હેનરીએ જસપ્રીત બુમરાહ સાથે સંયુક્ત રીતે નંબર-1 બનીને 36 વર્ષ જૂનો ઐતિહાસિક રેકોર્ડ તોડ્યો છે.
ICC Rankings: વનડે બેટિંગ રેન્કિંગ: ગિલ નંબર-1ની એકદમ નજીક, કોહલીને નુકસાન
અફઘાનિસ્તાન સામેની વનડે શ્રેણીમાં 238 રન બનાવીને ટોપ સ્કોરર રહેલા શુભમન ગિલ હવે 5મા સ્થાનેથી સીધા બીજા સ્થાને પહોંચી ગયા છે. તેઓ નંબર-1 પર રહેલા ન્યુઝીલેન્ડના ડેરિલ મિચેલથી માત્ર 24 રેટિંગ પોઈન્ટ પાછળ છે.
- વિરાટ કોહલી: હેમસ્ટ્રિંગની ઈજાના કારણે શ્રેણી ન રમી શકતા કોહલી બીજા સ્થાનેથી સરકીને ત્રીજા સ્થાને આવી ગયા છે.
- રોહિત શર્મા: અફઘાનિસ્તાન સામે 143 રન કરનારા રોહિત શર્મા ચોથા સ્થાને યથાવત છે.
- ઈશાન કિશન: ઈશાન કિશને 21 સ્થાનની મોટી છલાંગ લગાવીને 43મું સ્થાન મેળવ્યું છે.
ICC Rankings: વનડે બોલિંગ: ભારતીય ત્રિપુટીનો દબદબો
વનડે બોલિંગ રેન્કિંગમાં અફઘાનિસ્તાનના રાશિદ ખાન ટોચ પર છે, પરંતુ ભારતના ત્રણ બોલરોને આ શ્રેણીથી મોટો ફાયદો થયો છે:
| બોલરનું નામ | મેળવેલો ફાયદો (સ્થાન) | વર્તમાન રેન્કિંગ |
| અર્શદીપ સિંહ | +16 સ્થાન | 22મો નંબર |
| પ્રસિદ્ધ કૃષ્ણા | +34 સ્થાન | 58મો નંબર |
| વોશિંગ્ટન સુંદર | +17 સ્થાન | 71મો નંબર (સંયુક્ત) |
ICC Rankings: ટેસ્ટ રેન્કિંગ: મેટ હેનરીનો ઐતિહાસિક ચમકારો, જો રૂટ ફરી કિંગ
ન્યુઝીલેન્ડના ફાસ્ટ બોલર મેટ હેનરીએ ઇંગ્લેન્ડ સામેની બીજી ટેસ્ટમાં શાનદાર પ્રદર્શન કરીને ટેસ્ટ બોલિંગ રેન્કિંગમાં ભારતના જસપ્રીત બુમરાહ સાથે સંયુક્ત રીતે નંબર-1 નું સ્થાન મેળવી લીધું છે.
36 વર્ષ જૂનો રેકોર્ડ તૂટ્યો: ન્યુઝીલેન્ડનો કોઈ બોલર ટેસ્ટમાં નંબર-1 બન્યો હોય તેવું 36 વર્ષ પછી બન્યું છે. આ પહેલા 1990માં દિગ્ગજ રિચર્ડ હેડલી ટેસ્ટના ટોપ બોલર બન્યા હતા.
ટેસ્ટ બેટિંગમાં જો રૂટ ફરી ટોપ પર:
ઇંગ્લેન્ડના સ્ટેન્ડ-ઇન કેપ્ટન જો રૂટ બે સ્થાન આગળ વધીને ફરી એકવાર ટેસ્ટમાં નંબર-1 બેટર બની ગયા છે. આ યાદીમાં બીજા નંબરે હેરી બ્રૂક અને ત્રીજા નંબરે ઓસ્ટ્રેલિયાના ટ્રેવિસ હેડ છે.
વધુ સમાચાર વાંચવા માટે અંહી ક્લિક કરો
