Chhota Udepur Breaking: છોટાઉદેપુર જિલ્લામાં ફરી એકવાર દીપડાનો આતંક સામે આવ્યો છે. પાવી જેતપુર તાલુકાના રતનપુર ગામે ખેતરમાં બેઠેલી ૧૧ વર્ષની માસૂમ બાળકી પર દીપડાએ જીવલેણ હુમલો કરતા સમગ્ર પંથકમાં ભારે સનસનાટી મચી ગઈ છે. ગંભીર રીતે ઘવાયેલી બાળકીને તત્કાલ સારવાર અર્થે હોસ્પિટલ ખસેડવામાં આવી છે.
Chhota Udepur Breaking: ખેતરમાં ખાટલા પર બેઠી હતી બાળકી ને દીપડો ત્રાટક્યો
મળતી માહિતી મુજબ, ભેસાવહી ગામના વતની રાયસીંગભાઈ રાઠવા પોતાના પરિવાર સાથે પાવી જેતપુરના રતનપુર ગામે ખેતરમાં મજૂરી કામ અર્થે આવ્યા હતા. મોડી સાંજના સમયે તેમની ૧૧ વર્ષની વ્હાલસોયી દીકરી કૃપાલીબેન શૈલેષભાઇ રાઠવા ખેતરમાં રાખેલા ખાટલા પર બેઠી હતી.
દરમિયાન, અંધારાનો લાભ લઈને અચાનક એક હિંસક દીપડો ત્યાં ધસી આવ્યો હતો અને કંઈ પણ સમજે તે પહેલાં જ કૃપાલી પર ત્રાટક્યો હતો. દીપડાએ માસૂમ બાળકીને સીધી ગળાના ભાગેથી પકડી લેતા બાળકીએ બૂમાબૂમ કરી મૂકી હતી.
Chhota Udepur Breaking: પરિવારે મચાવ્યો શોરબકોર, દીપડો નાઠો
બાળકીની ચીસાચીસ સાંભળીને નજીકમાં જ કામ કરી રહેલા પરિવારજનો અને અન્ય મજૂરો લાકડીઓ લઈને દોડી આવ્યા હતા. લોકોનો ભારે શોરબકોર અને પ્રતિકાર જોઈને દીપડો બાળકીને લોહીલુહાણ હાલતમાં છોડીને જંગલ તરફ ભાગી છૂટ્યો હતો.
ઈજાની સ્થિતિ: દીપડાએ ગળાના ભાગે તીક્ષ્ણ નહોર અને દાંત ભરાવી દીધા હોવાથી બાળકીને ગંભીર ઈજાઓ પહોંચી છે. લોહીલુહાણ હાલતમાં કૃપાલીને તાત્કાલિક ૧૦૮ મારફતે નજીકની હોસ્પિટલમાં ખસેડવામાં આવી છે, જ્યાં તેની સારવાર ચાલી રહી છે.
Chhota Udepur Breaking: સ્થાનિકોમાં ફફડાટ અને વન વિભાગ સામે રોષ
આ ઘટનાને પગલે રતનપુર અને આસપાસના ગ્રામ્ય વિસ્તારોમાં ભારે ભયનો માહોલ વ્યાપી ગયો છે. સ્થાનિક ખેડૂતોમાં ફફડાટ છે કે હવે સાંજના સમયે ખેતરોમાં જવું કેવી રીતે? ગ્રામજનો દ્વારા વન વિભાગને આ અંગે જાણ કરવામાં આવી છે અને માનવભક્ષી બનેલા આ દીપડાને પાંજરે પૂરવા માટે તાકીદે પાંજરું ગોઠવવાની માંગ કરવામાં આવી છે.
વધુ સમાચાર વાંચવા માટે અંહી ક્લિક કરો: ગ્રામ્ય વિસ્તારના નાગરિકોને ઘરઆંગણે મળશે આધુનિક આરોગ્ય સેવાઓ જિલ્લા પંચાયત પ્રમુખ ઉપેન્દ્ર રાઠવા અને ઉચ્ચ અધિકારીઓની ગરિમામય ઉપસ્થિતિ.
