Patan Update: હેમચંદ્રાચાર્ય ઉત્તર ગુજરાત યુનિવર્સિટી (HNGU) ખાતે છેલ્લા કેટલાક સમયથી ચાલી રહેલા ફી વધારાના વિવાદમાં આખરે વિદ્યાર્થી શક્તિનો વિજય થયો છે. અખિલ ભારતીય વિદ્યાર્થી પરિષદ (ABVP) દ્વારા કરવામાં આવેલા ઉગ્ર વિરોધ અને આંદોલન સામે નમતું જોખીને યુનિવર્સિટી પ્રશાસને ૧૫% ફી વધારાનો નિર્ણય હાલ પૂરતો સ્થગિત રાખવાની જાહેરાત કરી છે.
Patan Update: શું હતો સમગ્ર મામલો?
HNGU યુનિવર્સિટી દ્વારા તાજેતરમાં વિવિધ કોર્સોમાં ૧૫% જેટલો ફી વધારો ઝીંકવામાં આવ્યો હતો. આ આકરા ફી વધારાના કારણે સામાન્ય અને મધ્યમ વર્ગના વિદ્યાર્થીઓ પર આર્થિક બોજ વધે તેમ હોવાથી વિદ્યાર્થીઓમાં ભારે રોષ જોવા મળી રહ્યો હતો. આ નિર્ણયના વિરોધમાં ABVP મેદાને આવ્યું હતું.
Patan Update: ધરણા પ્રદર્શન અને અલ્ટીમેટમ
ABVP ના કાર્યકરોએ યુનિવર્સિટી કેમ્પસ ખાતે એકઠા થઈને ઉગ્ર સૂત્રોચ્ચાર કર્યા હતા અને ધરણા પ્રદર્શન કરીને પોતાનો વિરોધ નોંધાવ્યો હતો. કાર્યકરોએ યુનિવર્સિટીના કુલપતિ (Vice-Chancellor) ને રૂબરૂ મળીને આવેદનપત્ર સોંપ્યું હતું અને ફી વધારો તાત્કાલિક અસરથી રદ કરવા માટે મક્કમ અલ્ટીમેટમ આપ્યું હતું.
“વિદ્યાર્થીઓના હિત સાથે કોઈ બાંધછોડ કરવામાં નહીં આવે. જો ફી વધારો પાછો ખેંચવામાં નહીં આવે તો આંદોલન વધુ ઉગ્ર બનશે.” – ABVP કાર્યકરો
Patan Update: કુલપતિ અને BOM ની તાત્કાલિક બેઠક
વિદ્યાર્થીઓનો રોષ અને મામલાની ગંભીરતાને જોતાં યુનિવર્સિટી પ્રશાસન એક્શનમાં આવ્યું હતું. યુનિવર્સિટીના કુલપતિ અને બોર્ડ ઓફ મેનેજમેન્ટ (BOM) ના સભ્યો વચ્ચે તાત્કાલિક એક મહત્વની ઓનલાઇન બેઠક યોજાઈ હતી. આ બેઠકમાં ABVP ની માંગણીઓ અને વિદ્યાર્થીઓના હિતને ધ્યાનમાં રાખીને વિગતવાર ચર્ચા કરવામાં આવી હતી.
આખરે ફી વધારો સ્થગિત, કાર્યકરોમાં ખુશીનો માહોલ
લાંબી ચર્ચા-વિચારણાના અંતે, વિદ્યાર્થીઓના હિતમાં મોટો નિર્ણય લેતા બેઠકમાં ૧૫% ફી વધારાના મુદ્દાને હાલ પૂરતો સ્થગિત (Hold) રાખવાનો નિર્ણય કરવામાં આવ્યો છે.
યુનિવર્સિટી દ્વારા ફી વધારો સ્થગિત કરાતા જ ABVP ના કાર્યકરો અને સામાન્ય વિદ્યાર્થીઓમાં ખુશીની લહેર દોડી ગઈ હતી. કાર્યકરોએ આ નિર્ણયને વિદ્યાર્થી સંગઠનની જીત ગણાવીને હર્ષની લાગણી વ્યક્ત કરી હતી.
વધુ સમાચાર વાંચવા માટે અંહી ક્લિક કરો: વડોદરામાં પાલિકાની ઘોર બેદરકારી ખિસકોલી સર્કલ પાસે વરસાદી કાંસમાં ખાબકી ઘોડી, ફાયર બ્રિગેડ અને JCBની મદદથી કરાયું રેસ્ક્યુ
