Surat Hit-and-Run: સુરત શહેરમાં ફરી એકવાર નશાખોર વાહનચાલકે બેફામ બનીને માસૂમ લોકોના જીવ જોખમમાં મૂક્યા હોવાની સનસનાટીભરી ઘટના સામે આવી છે. સરથાણા જકાતનાકા પાસે ફૂલ દારૂના નશામાં ધૂત એક આર્કિટેક્ટે પોતાની ઇલેક્ટ્રિક કાર (EV) મોતની સ્પીડે હંકારી ભયાનક અકસ્માત સર્જ્યો હતો. નશાખોર ચાલકે રસ્તા પર જતા બાઇક, સ્કૂટર અને સાઇડમાં પાર્ક કરેલી ગાડીને અડફેટે લેતા ઘટનાસ્થળે કંપારી છૂટી જાય તેવા દૃશ્યો સર્જાયા હતા. આ દુર્ઘટનામાં બે સગા ભાઈઓ સહિત ચાર લોકોને ગંભીર ઇજાઓ પહોંચી છે. બીજી તરફ, અકસ્માત બાદ રોષે ભરાયેલા લોકોએ ચાલકને પકડીને બરાબરનો મેથીપાક ચખાડ્યો હતો.
Surat Hit-and-Run: ચાલુ ગાડીએ નશો: બોલવાના પણ હોશ નહોતા
મળતી માહિતી અનુસાર, મૂળ ભાવનગર જિલ્લાના તળાજા તાલુકાના કુંડલી ગામનો વતની અને હાલ સુરતના સરથાણા વિસ્તારમાં રહેતો 32 વર્ષીય વિજય શંભુભાઈ ભિખડિયા વ્યવસાયે આર્કિટેક્ટ છે. 3 જૂનના રોજ વિજય પોતાની ઇલેક્ટ્રિક કાર (નંબર: GJ-05-RU-2251) લઈને સરથાણા જકાતનાકા કનૈયા નમકીન પાસેથી પસાર થઈ રહ્યો હતો. તે દારૂના નશામાં એટલો ચૂર હતો કે ગાડી પરથી કાબૂ ગુમાવી બેઠો હતો. અકસ્માત બાદ પોલીસે ગાડીની તલાશી લેતા અંદરથી બિયરની ખાલી બોટલ મળી આવી હતી, જે દર્શાવે છે કે આરોપી ચાલુ ગાડીએ બિયર પી રહ્યો હતો. તેની હાલત એટલી ખરાબ હતી કે તે સરખો ઊભો રહી શકતો નહોતો કે બોલી પણ શકતો નહોતો.
Surat Hit-and-Run: બે સગા ભાઈ અને બે મહિલાઓના હાથ-પગ કચડાયા
કાબૂ બહાર ગયેલી કાળમુખી ઇવી કારે રસ્તા પરથી પસાર થઈ રહેલા નિર્દોષ લોકોને અડફેટે લીધા હતા, જેમાં નીચે મુજબના લોકો ગંભીર રીતે ઘાયલ થયા છે:
- રોહિત સરખવાડા (ઉ.વ. 24) અને અજય સરખવાડા (ઉ.વ. 20): બાઇક સવાર આ બંને સગા ભાઈઓ (રહે. પુણાગામ)ને કારે જોરદાર ટક્કર મારી હતી.
- રેખાબેન પ્રાગજીભાઈ લાખાણી (ઉ.વ. 53) અને હીનાબેન સવાણી (ઉ.વ. 37): સ્કૂટર પર જઈ રહેલી આ બંને મહિલાઓ (રહે. સરથાણા) પણ કારની અડફેટે આવી કચડાઈ ગઈ હતી.
કારે આ બંને વાહનોને ઉડાવ્યા બાદ રોડ સાઇડમાં પાર્ક કરેલી અન્ય એક કારને પણ જોરદાર ટક્કર મારી હતી. ટક્કર એટલી પ્રચંડ હતી કે બાઇક અને કારનો કચ્ચરઘાણ વળી ગયો હતો.
લોહીના ખાબોચિયા ભરાયા: અકસ્માત એટલો ભયાનક હતો કે રોડ પર લોહીના ખાબોચિયા ભરાઈ ગયા હતા અને ચીસાચીસ મચી ગઈ હતી. ઇજાગ્રસ્તોના હાથ-પગ કચડાઈ ગયા હોવાથી સ્થાનિક લોકોએ તાત્કાલિક તેમને નજીકની ખાનગી હોસ્પિટલમાં સારવાર અર્થે ખસેડ્યા છે, જ્યાં તમામની સ્થિતિ ગંભીર હોવાનું જાણવા મળી રહ્યું છે.
Surat Hit-and-Run: રોષે ભરાયેલા લોકોએ કાર તોડી, ચાલકને ધોઈ નાખ્યો
અકસ્માત સર્જાતા જ આસપાસના સેંકડો લોકો ઘટનાસ્થળે દોડી આવ્યા હતા. લોકોએ કાર ચાલક વિજય ભિખડિયાને બહાર ખેંચી કાઢ્યો હતો. ચાલકને નશામાં ધૂત જોઈને લોકોનો ગુસ્સો સાતમા આસમાને પહોંચ્યો હતો અને ટોળાએ તેને પકડીને બરાબરનો પાઠ ભણાવ્યો હતો. આ સાથે જ ઉશ્કેરાયેલા લોકોએ નશાખોરની ઇલેક્ટ્રિક કાર પર પથ્થરમારો કરીને તેના કાચ પણ તોડી નાખ્યા હતા.
Surat Hit-and-Run: પોલીસે આરોપીની અટકાયત કરી
ઘટનાની જાણ થતાં જ સરથાણા પોલીસનો કાફલો તાત્કાલિક ઘટનાસ્થળે દોડી આવ્યો હતો અને રોષે ભરાયેલા ટોળામાંથી આરોપી વિજયને બચાવી પોલીસ સ્ટેશન ભેગો કર્યો હતો. સરથાણા પોલીસે આરોપી આર્કિટેક્ટ વિજય ભિખડિયા સામે દારૂ પીને બેફામ ગાડી ચલાવવા અંગે ગુનો નોંધી આગળની કાયદેસરની કાર્યવાહી હાથ ધરી છે.
વધુ સમાચાર વાંચવા માટે અંહી ક્લિક કરો
