SBI Alert: જો તમારે સ્ટેટ બેંક ઓફ ઇન્ડિયા (SBI) માં કોઈ અગત્યનું કામ હોય, તો આજે જ (22 મે, શુક્રવાર) પતાવી લેજો. આવતીકાલ એટલે કે 23 મે થી લઈને 28 મે, 2026 સુધી દેશની સૌથી મોટી સરકારી બેંક SBI માં કામકાજ ખોરવાઈ શકે છે અથવા શાખાઓ સંપૂર્ણ બંધ રહી શકે છે. વીકએન્ડ, કર્મચારીઓની બે દિવસની પ્રસ્તાવિત હડતાળ અને બકરી ઈદ (ઈદ-ઉલ-અઝહા)ની રજાઓના કારણે સતત 6 દિવસ સુધી બેંકિંગ સેવાઓ પ્રભાવિત થશે.
SBI Alert: જાણો કયા દિવસે કયા કારણે બેંક બંધ રહેશે?
બેંકો સતત બંધ રહેવા પાછળ અલગ-અલગ કારણો છે, જેનું વિગતવાર શિડ્યુલ નીચે મુજબ છે:
- 23 મે (ચોથો શનિવાર): મહિનાનો ચોથો શનિવાર હોવાથી દેશભરની તમામ બેંકોમાં નિયમ મુજબ રજા રહેશે.
- 24 મે (રવિવાર): સાપ્તાહિક રજા.
- 25 મે (સોમવાર): ઓલ ઇન્ડિયા સ્ટેટ બેંક ઓફ ઇન્ડિયા સ્ટાફ ફેડરેશનની દેશવ્યાપી હડતાળ.
- 26 મે (મંગળવાર): સ્ટાફ ફેડરેશનની હડતાળનો બીજો દિવસ.
- 27 મે (બુધવાર): બકરી ઈદ નિમિત્તે દેશના મોટાભાગના વિસ્તારોમાં RBIની જાહેર રજા.
- 28 મે (ગુરૂવાર): દેશના બાકીના વિસ્તારોમાં બકરી ઈદની રજા (જ્યારે જમ્મુ-કાશ્મીરમાં 27 અને 28 મે બંને દિવસ રજા રહેશે).
SBI Alert: ગ્રાહકોને શું અસર થશે?
આ હડતાળ ‘વર્કમેન કેટેગરી’ (ક્લાર્ક અને અન્ય સ્ટાફ) દ્વારા પાડવામાં આવી હોવાથી ચેક ક્લિયરિંગ, કેશ ડિપોઝિટ/વિથડ્રોઅલ અને પાસબુક અપડેટ જેવા શાખા આધારિત કામો સંપૂર્ણપણે અટકી શકે છે. જોકે, ડિજિટલ બેંકિંગ, નેટ બેંકિંગ અને ATM સેવાઓ ચાલુ રહેવાની સંભાવના છે.
SBI Alert: શા માટે SBI કર્મચારીઓ હડતાળ પર જઈ રહ્યા છે?
ઓલ ઇન્ડિયા સ્ટેટ બેંક ઓફ ઇન્ડિયા સ્ટાફ ફેડરેશન (AISBISF) એ કર્મચારીઓના અધિકારો અને બેંકિંગ વ્યવસ્થામાં સુધારા માટે 16 મુખ્ય માંગણીઓ સાથે આ હડતાળનું એલાન કર્યું છે. કર્મચારીઓની મુખ્ય માંગણીઓ નીચે મુજબ છે:
- નવી ભરતીઓ: વર્ગ ચાર (મેસેન્જર્સ) અને સશસ્ત્ર ગાર્ડ્સ (Armed Guards) ની ખાલી જગ્યાઓ પર તાત્કાલિક કાયમી ભરતી કરવામાં આવે.
- આઉટસોર્સિંગ પર રોક: કાયમી સ્વરૂપના કામો બહારની એજન્સીઓને આપવાનું બંધ થાય.
- વેતન અને પ્રમોશનમાં સમાનતા: કર્મચારીઓ વચ્ચે વેતન વિસંગતતાઓ દૂર થાય અને કરિયર પ્રોગ્રેશન સ્કીમની સમીક્ષા કરાય.
- NPS અને પેન્શન સુધારો: નેશનલ પેન્શન સિસ્ટમ (NPS)માં કર્મચારીઓને ફંડ મેનેજર પસંદ કરવાનો વિકલ્પ મળે અને પેન્શન ગણતરીમાં તમામ ભથ્થાં ઉમેરાય.
- મિસ-સેલિંગ પર અંકુશ: ‘ક્રોસ-સેલિંગ’ (વીમો, મ્યુચ્યુઅલ ફંડ વગેરે) ના નામે કર્મચારીઓ પર અયોગ્ય દબાણ લાવી ગ્રાહકોને ખોટી પ્રોડક્ટ્સ વેચવાનું બંધ કરવામાં આવે.
લાંબી રજાઓ અને હડતાળના કારણે નાણાકીય વ્યવહારો ખોરવાય નહીં તે માટે ગ્રાહકોને આજે જ પોતાના બેંકિંગ કાર્યો આટોપી લેવા સલાહ આપવામાં આવી છે.
વધુ સમાચાર વાંચવા માટે અંહી ક્લિક કરો
ગુજરાત સહિત 10 રાજ્યોની 24 રાજ્યસભા બેઠકો માટે ચૂંટણી જાહેર, 18 જૂને મતદાન અને પરિણામ
