Job Fraud in Ahmedabad: શિક્ષણ જગતને શર્મસાર કરતી એક ઘટના અમદાવાદની પ્રતિષ્ઠિત ગુજરાત કોલેજમાંથી સામે આવી છે. અહીં વિદ્યાર્થીઓને રમતગમત કોટા (Sports Quota) હેઠળ ભારતીય સેના અને એરફોર્સમાં નોકરી અપાવવાનું કૌભાંડ આચરવામાં આવ્યું છે. કોલેજના જ એક આસિસ્ટન્ટ પ્રોફેસરે પોતાના જ 30 જેટલા વિદ્યાર્થીઓ પાસેથી લાખો રૂપિયા પડાવીને ફોન સ્વીચ ઓફ કરી પલાયન થઈ ગયો છે.
Job Fraud in Ahmedabad: શું છે સમગ્ર ઘટના?
ગુજરાત યુનિવર્સિટી દ્વારા થોડા સમય પહેલા જ ભરત પ્રજ્ઞેશ હનુભા નામના વ્યક્તિની ગુજરાત કોલેજમાં સ્પોર્ટ્સ આસિસ્ટન્ટ પ્રોફેસર તરીકે કોન્ટ્રાક્ટ પર ભરતી કરવામાં આવી હતી. આ પ્રોફેસરનું કામ વિદ્યાર્થીઓને રમતગમતમાં તાલીમ આપવાનું હતું, પરંતુ તેણે વિદ્યાર્થીઓની કારકિર્દી સાથે ખેલ ખેલવાનું શરૂ કર્યું.
- લાલચ: એરફોર્સ અને આર્મીમાં સ્પોર્ટ્સ ક્વોટામાં નોકરી અપાવવાની ખાતરી આપી.
- મોડસ ઓપરેન્ડી: ટ્રેનિંગના નામે વિદ્યાર્થીઓ પાસેથી રૂ. 30,000 થી લઈ 1 લાખ સુધીની રકમની માંગણી કરી. વિશ્વાસ જીતવા માટે એવું પણ વચન આપ્યું કે ટ્રેનિંગ પૂરી થયા બાદ પૈસા પરત આપી દેવામાં આવશે.
- વિદ્યાર્થીઓની હાલત: નોકરીની આશાએ મધ્યમવર્ગીય વિદ્યાર્થીઓએ સગા-સંબંધીઓ પાસેથી ઉછીના અને વ્યાજે પૈસા લાવીને પ્રોફેસરને ઓનલાઈન ટ્રાન્સફર કર્યા હતા.
Job Fraud in Ahmedabad: 8 લાખની છેતરપિંડી અને પ્રોફેસર ફરાર
જ્યારે લાંબો સમય વીતવા છતાં નોકરી ન મળી અને વિદ્યાર્થીઓએ પ્રોફેસરનો સંપર્ક કરવાનો પ્રયાસ કર્યો, ત્યારે ખબર પડી કે ભરત પ્રજ્ઞેશ હનુભા પોતાનો ફોન સ્વીચ ઓફ કરીને ગાયબ થઈ ગયો છે. અંદાજે 30 થી 40 વિદ્યાર્થીઓ પાસેથી કુલ 8 લાખથી વધુની રકમ પડાવી લેવામાં આવી હોવાનું સામે આવ્યું છે.
NSUI દ્વારા ઉગ્ર વિરોધ અને ન્યાયની માંગ
આ ઘટનાને પગલે NSUI અને પીડિત વિદ્યાર્થીઓએ ગુજરાત કોલેજમાં પહોંચીને ભારે સૂત્રોચ્ચાર કર્યા હતા. વિદ્યાર્થીઓનો આક્ષેપ છે કે:
- કોલેજ તંત્ર આ મામલે ગંભીર નથી અને જવાબ આપવાનું ટાળી રહ્યું છે.
- પ્રિન્સિપાલ પોતે આ મામલે ફરિયાદી બને અને પ્રોફેસર વિરુદ્ધ કડક કાર્યવાહી કરાવે.
- ગરીબ વિદ્યાર્થીઓએ વ્યાજે લાવેલા પૈસા તેમને પરત અપાવવામાં આવે.
હાલમાં વિદ્યાર્થીઓએ પોલીસ સ્ટેશનમાં અરજી આપી છે, પરંતુ પ્રોફેસર ફરાર હોવાથી તપાસ ચાલુ છે. આ કિસ્સાએ શૈક્ષણિક સંસ્થાઓમાં થતી કોન્ટ્રાક્ટ આધારિત ભરતીઓ સામે પણ અનેક સવાલો ઉભા કર્યા છે.
વધુ સમાચાર વાંચવા માટે અંહી ક્લિક કરો: શેરબજારમાં જોરદાર તેજી, સેન્સેક્સ 790 પોઈન્ટ ઉછળીને 75,000ને પાર, નિફ્ટીમાં પણ 277 પોઈન્ટનો ઉછાળો
