Surat Fire Tragedy:ડાયમંડ સિટી સુરતના લિંબાયત વિસ્તારમાં આજે એક અત્યંત કરુણ ઘટના સામે આવી છે. લિંબાયતની મીઠી ખાડી પાસે આવેલા એક રહેણાંક મકાનમાં ભીષણ આગ ફાટી નીકળતા એક જ પરિવારના 5 સભ્યોના મોત નીપજ્યા છે. મકાનમાં રાખવામાં આવેલા સાડીના જથ્થા અને કેમિકલયુક્ત ફોર્મ શીટને કારણે લાગેલી આગમાં ગૂંગળામણને લીધે 4 મહિલાઓ અને એક માસૂમ બાળકનું કરુણ મૃત્યુ થયું છે.
Surat Fire Tragedy:શોર્ટ સર્કિટ બાદ ધુમાડાના ગોટા ઉઠ્યા
પ્રાપ્ત વિગતો અનુસાર, લિંબાયતના આ મકાનમાં સાડીઓનું પેકિંગ અને કામકાજ ચાલતું હતું. ઘરમાં આશરે 8 ટન સાડીનું મટિરિયલ અને પેકિંગ માટે વપરાતી ફોર્મ શીટનો મોટો જથ્થો પડ્યો હતો. ઇલેક્ટ્રિક સ્વીચ બોર્ડમાં અચાનક શોર્ટ સર્કિટ થતા તણખા ઝર્યા હતા, જે સીધા ફોર્મ શીટ પર પડ્યા હતા. ફોર્મ શીટમાં આગ લાગતા તેમાંથી ઝેરી કેમિકલયુક્ત ધુમાડો નીકળવા લાગ્યો હતો. જોતજોતામાં આખો રૂમ ધુમાડાથી ભરાઈ ગયો હતો, જેના કારણે ઘરમાં રહેલા લોકોને બહાર નીકળવાની તક પણ મળી ન હતી.
Surat Fire Tragedy:એક જ પરિવારના 5 સભ્યોના મોત
આ દુર્ઘટનામાં ગૂંગળામણના કારણે મૃત્યુ પામેલા કમનસીબ સભ્યોની યાદી નીચે મુજબ છે:
- શહેનાઝ બેગમ અબ્દુલ કલામ અંસારી (ઉં.વ. 65)
- શબીનાં રમઝાન અલી અંસારી (ઉં.વ. 28)
- પરવીન અબ્દુલ કલામ અંસારી (ઉં.વ. 19)
- હુસા બેગમ અબ્દુલ કલામ અંસારી (ઉં.વ. 18)
- શુભાન રમઝાન અલી અંસારી (માસૂમ બાળક, ઉં.વ. 4)
ફાયર બ્રિગેડની કામગીરી અને ભયનો માહોલ
ઘટનાની જાણ થતા જ સુરત ફાયર વિભાગની અનેક ગાડીઓ અને એમ્બ્યુલન્સ ઘટનાસ્થળે દોડી આવી હતી. મકાનમાં બે ગેસના બાટલા પણ હોવાથી મોટી હોનારતનો ડર હતો, પરંતુ ફાયર જવાનોએ સમયસૂચકતા વાપરી આગ પર કાબૂ મેળવ્યો હતો. જોકે, ઝેરી ધુમાડાને કારણે પરિવારના પાંચ સભ્યોને બચાવી શકાયા ન હતા. આ ઘટનાને પગલે સમગ્ર લિંબાયત વિસ્તારમાં શોકનું મોજું ફરી વળ્યું છે અને આસપાસના રહિશોમાં ભયનો માહોલ જોવા મળી રહ્યો છે.
આ પણ વાંચો :બહુચરાજી મેળામાં માતમ: પૂરપાટ ઝડપે આવતી ટ્રકે પદયાત્રીઓના સંઘને કચડ્યો, 2ના મોત અને 7 ગંભીર
