From Gas to Stoves:યુદ્ધની વૈશ્વિક પરિસ્થિતિની સીધી અસર હવે ગુજરાતના રસોડા સુધી પહોંચી છે. રાજ્યભરમાં કોમર્શિયલ ગેસ સિલિન્ડરનો સપ્લાય ખોરવાતા હોટલ-રેસ્ટોરન્ટ અને હોસ્ટેલની મેસ ચલાવતા સંચાલકો મુશ્કેલીમાં મુકાયા છે. સ્થિતિ એટલી ગંભીર છે કે જ્યાં ગેસ મળે છે ત્યાં ભાવ ₹4000 સુધી પહોંચ્યા છે, જેના વિકલ્પ તરીકે લોકો હવે ઇન્ડક્શન અને કોલસાની સગડી તરફ વળ્યા છે.
From Gas to Stoves: L.D. એન્જિનિયરિંગમાં સળગ્યા લાકડાના ચૂલા
રાજ્યની પ્રતિષ્ઠિત એલ.ડી. એન્જિનિયરિંગ કોલેજની હોસ્ટેલમાં 700 જેટલા વિદ્યાર્થીઓના ભોજન માટે મેસ સંચાલકોએ પરંપરાગત દેશી ચૂલા શરૂ કર્યા છે.
- નવો પડકાર: મેસ સંચાલક નરેશ જોશીએ જણાવ્યું કે, “ગેસ મળતો નથી, એટલે હવે રસોઈ બનાવવા માટે સવારે 7 ને બદલે 5 વાગ્યે જાગવું પડે છે જેથી સમયસર જમવાનું મળી રહે.”
- વિદ્યાર્થીઓની ચિંતા: જો આ સ્થિતિ લાંબી ચાલે અને મેસ બંધ થાય તો બહાર જમવાનો ખર્ચ વધી શકે છે, જેની અસર વિદ્યાર્થીઓના અભ્યાસ અને બજેટ પર પડશે.
From Gas to Stoves:કોલસાની સગડી માટે 15 દિવસનું વેઇટિંગ
રાજકોટમાં કોમર્શિયલ ગેસના વિકલ્પ તરીકે હોટલ અને રેસ્ટોરન્ટ ધારકો કોલસાની સગડી ખરીદવા ઉમટી પડ્યા છે.
- માંગમાં ઉછાળો: જે દુકાનેથી રોજની 10-15 સગડી વેચાતી હતી, ત્યાં હવે 80 થી વધુ ગ્રાહકો આવે છે.
- વેઇટિંગ: સગડી બનાવવામાં સમય લાગતો હોવાથી 15 થી 20 દિવસનું વેઇટિંગ ચાલી રહ્યું છે.
- ભાવ વધારો: સગડીના મટીરિયલ અને મજૂરી ખર્ચ વધતા જે સગડી ₹1000 માં મળતી હતી, તે હવે ₹2000 માં વેચાઈ રહી છે.
From Gas to Stoves: ઇન્ડક્શન સ્ટવ ‘આઉટ ઓફ સ્ટોક‘
સુરત અને વડોદરામાં ગેસના જોડાણ સામે લોકો ઇલેક્ટ્રિક ઇન્ડક્શન સ્ટવ લેવા દોડી રહ્યા છે.
- સુરત: અહીં ઇન્ડક્શન લેવા માટે 10 દિવસનું એડવાન્સ બુકિંગ થઈ રહ્યું છે. વેપારીઓ પાસે સ્ટોક શૂન્ય થઈ ગયો છે.
- વડોદરા: ઇન્ડક્શનની માંગમાં 30% થી વધુનો ઉછાળો આવ્યો છે. લોકો ઓનલાઇન પણ મટીરિયલ શોધી રહ્યા છે પરંતુ કંપનીઓ પુરવઠો પહોંચાડી શકતી નથી.
From Gas to Stoves: બજારની વર્તમાન સ્થિતિ એક નજરે
| શહેર | વસ્તુ | સ્થિતિ |
| રાજકોટ | કોલસાની સગડી | 15 દિવસનું વેઇટિંગ, ભાવ બમણા |
| સુરત | ઇન્ડક્શન સ્ટવ | 10 દિવસનું વેઇટિંગ, સ્ટોક શૂન્ય |
| અમદાવાદ | ગેસ સિલિન્ડર | ₹3000 થી ₹4000 માં કાળાબજારી |
| વડોદરા | ઇન્ડક્શન સ્ટવ | માંગમાં 10 ગણો ઉછાળો |
વધુ સમાચાર વાંચવા માટે અંહી ક્લિક કરો : રાજકોટ AIIMSના ઇન્ટર્ન ડૉક્ટરનો ટ્રેન નીચે પડતું મૂકી આપઘાત: સુસાઈડ નોટમાં ‘મેન્ટલી ડિસ્ટર્બ’ હોવાનો ઉલ્લેખ
