Mehsana news : રાધનપુર ચોકડી પર ગત બુધવારે રાત્રે બનેલી એક કમકમાટીભરી ઘટનાએ સમગ્ર પંથકમાં ચકચાર મચાવી દીધી છે. શરૂઆતમાં જે ઘટનાને હિટ એન્ડ રનનો અકસ્માત માનવામાં આવતો હતો, તે ખરેખર એક આયોજિત આત્મહત્યા હોવાનું સીસીટીવી (CCTV) ફૂટેજમાં બહાર આવ્યું છે. ઉત્તર પ્રદેશના યુવકે ચાલતા ટ્રેલરના ટાયર નીચે પડતું મૂકીને જીવ આપી દીધો હતો.
Mehsana news : CCTV ફૂટેજ જોઈ પોલીસ પણ ચોંકી ઉઠી
મહેસાણા બી ડિવિઝન પોલીસે જ્યારે ઘટનાસ્થળના સીસીટીવી તપાસ્યા ત્યારે સત્ય સામે આવ્યું. ફૂટેજમાં જોવા મળે છે કે:
- યુવક રાત્રિના સમયે રોડની વચ્ચોવચ બિન્ધાસ્ત ચાલી રહ્યો હતો.
- જેવું એક ભારેભરખમ ટ્રેલર તેની નજીક આવ્યું, યુવકે જરા પણ ખચકાયા વગર સીધું જ તેના પાછળના ટાયર નીચે પડતું મૂક્યું.
- ટ્રેલરનું ટાયર શરીર પર ફરી વળતા અને અંદાજે 5 ફૂટ જેટલા ઢસડાવાને કારણે યુવકના કમરના ભાગનો છૂંદો થઈ ગયો હતો.
Mehsana news : કોણ હતો આ યુવક?
મૃતક યુવકની ઓળખ સત્યપાલ બાબુરામ તરીકે થઈ છે, જે ઉત્તર પ્રદેશના બદાયુ જિલ્લાનો વતની હતો. તે ઘરેથી કામધંધાની શોધમાં નીકળ્યો હોવાનું તેના પરિવારે જણાવ્યું છે. સત્યપાલના મોતના સમાચાર મળતા જ પરિવાર મહેસાણા દોડી આવ્યો હતો, પરંતુ યુવકે આટલું મોટું અને ખોફનાક પગલું કેમ ભર્યું તે હજુ સુધી રહસ્ય જ છે.
અકસ્માતની થિયરી નકામી સાબિત થઈ
શરૂઆતમાં પોલીસ અને સ્થાનિકોને એમ લાગ્યું હતું કે ટ્રેલર ચાલકની ભૂલને કારણે અકસ્માત થયો છે. જોકે, સીસીટીવીમાં સ્પષ્ટ દેખાય છે કે યુવક સામે ચાલીને ટાયરમાં જતો રહ્યો હતો. આ પુરાવાને આધારે પોલીસે હવે આ કેસને અકસ્માતને બદલે આત્મહત્યા તરીકે નોંધીને વધુ તપાસ હાથ ધરી છે.
આ પણ વાંચો : ગુજરાતમાં કુદરતનો ટ્રિપલ મિજાજ: આજે 6 જિલ્લામાં ‘યલો એલર્ટ’, કમોસમી વરસાદથી ખેડૂતોના જીવ અધ્ધર
