Vadodara Tragedy: વડોદરા શહેરના મકરપુરા વિસ્તારમાં એક હૃદયદ્રાવક બનાવ સામે આવ્યો છે, જ્યાં 20 વર્ષીય યુવતીએ એપાર્ટમેન્ટ પરથી કૂદીને આપઘાત કરતાં વિસ્તારમાં ચકચાર મચી ગઈ છે. ઘટનાની જાણ થતાં મકરપુરા પોલીસે સ્થળ પર પહોંચીને તપાસ શરૂ કરી છે. આ ઘટનાના CCTV દૃશ્યો પણ સામે આવ્યા છે, જ્યારે આપઘાત પાછળનું ચોક્કસ કારણ હજુ અકબંધ છે.
પ્રાપ્ત માહિતી મુજબ, મકરપુરા વિસ્તારમાં આવેલા હવેલી રેસકોમ એપાર્ટમેન્ટમાં રહેતી ભૂમિબેન ભદાણી 31 જાન્યુઆરીના રોજ પોતાના ઘરે હાજર હતી. દરમિયાન અચાનક એપાર્ટમેન્ટના ચોથા માળેથી પડતા જ જોરદાર અવાજ થયો હતો. અવાજ સાંભળીને સોસાયટીના રહેવાસીઓ દોડી આવ્યા હતા અને તાત્કાલિક 108 એમ્બ્યુલન્સ તેમજ પોલીસને જાણ કરવામાં આવી હતી.
Vadodara Tragedy: હોસ્પિટલ પહોંચતા પહેલા જ મોત
108ની ટીમ તાત્કાલિક ઘટના સ્થળે પહોંચી યુવતીને સારવાર માટે નજીકની હોસ્પિટલમાં ખસેડી હતી. જોકે ડોક્ટરે તપાસ બાદ યુવતીને મૃત જાહેર કરી હતી. આ ઘટનાથી સોસાયટી તેમજ પરિવારજનોમાં શોકની લાગણી છવાઈ ગઈ છે.
Vadodara Tragedy: કારણ જાણવા પોલીસ તપાસમાં
ઘટનાની જાણ થતાં મકરપુરા પોલીસ પણ સ્થળ પર પહોંચી હતી. યુવતીના મૃતદેહને સયાજી હોસ્પિટલમાં પોસ્ટમોર્ટમ માટે મોકલવામાં આવ્યો હતો. હાલ પોલીસ યુવતીએ આ અતિશય પગલું શા માટે ભર્યું તેની તપાસ કરી રહી છે. મૃતક યુવતીના પરિવારજનો, પાડોશીઓ અને મિત્રોની પૂછપરછ હાથ ધરવામાં આવી છે.
પોલીસ તપાસમાં જાણવા મળ્યું છે કે ભૂમિબેનએ ધોરણ 10 સુધીનો અભ્યાસ કર્યો હતો અને ત્યારબાદ તે ઘરે રહેતી હતી. યુવતીના અચાનક આપઘાતથી પરિવારજનો પણ ગહન આઘાતમાં છે.
મકરપુરા પોલીસ સ્ટેશનના પીઆઈ એ.એમ. ગોહિલે જણાવ્યું હતું કે, યુવતીના મૃતદેહનું પોસ્ટમોર્ટમ કરવામાં આવ્યું છે અને આપઘાત પાછળના કારણો જાણવા માટે તપાસ ચાલુ છે.
આ પણ વાંચો : ગુજરાતના મહેસૂલ વિભાગનો મોટો નિર્ણય: દસ્તાવેજ નોંધણીના નિયમોમાં ફેરફાર, હવે વધારાની ફી ભરવી પડશે
