Himachal Pradesh Bus Accident :હિમાચલ પ્રદેશના સિરમૌર જિલ્લામાં શુક્રવારે એક કાળજું કંપાવી દે તેવી ભયાનક માર્ગ દુર્ઘટના સર્જાઈ છે. કુપવીથી શિમલા જઈ રહેલી એક ખાનગી બસ હરિપુરધાર પાસે અચાનક નિયંત્રણ ગુમાવતા ઊંડી ખીણમાં ખાબકી હતી. આ કરુણ અકસ્માતમાં અત્યાર સુધીમાં 9 લોકોના મોત થયાની પુષ્ટિ કરવામાં આવી છે, જ્યારે અનેક મુસાફરો ગંભીર રીતે ઈજાગ્રસ્ત થયા છે.
Himachal Pradesh Bus Accident :બસમાં 30થી 35 મુસાફરો સવાર હતા
પ્રાપ્ત માહિતી અનુસાર, અકસ્માત સમયે બસમાં અંદાજે 30થી 35 મુસાફરો સવાર હતા. પહાડી માર્ગ પર બસ નિયંત્રણ બહાર જતાં સીધી ખાઈમાં પટકાઈ હતી. અકસ્માત એટલો ભયાનક હતો કે બસના પરખચ્ચા ઉડી ગયા હતા અને ઘટનાસ્થળે ચીસાચીસ મચી ગઈ હતી. મૃત્યુઆંક વધવાની આશંકા પણ વ્યક્ત કરવામાં આવી રહી છે.
Himachal Pradesh Bus Accident :સ્થાનિકો સૌપ્રથમ બચાવમાં દોડી આવ્યા
અકસ્માતની જાણ થતાં જ આસપાસના ગ્રામજનો તાત્કાલિક ઘટનાસ્થળે પહોંચ્યા હતા. સ્થાનિક લોકોએ પોલીસ અને બચાવ ટીમો પહોંચે તે પહેલાં જ ઈજાગ્રસ્ત મુસાફરોને ખાઈમાંથી બહાર કાઢી સડક સુધી પહોંચાડવામાં મદદ કરી હતી. ત્યારબાદ પોલીસ, ફાયર અને અન્ય બચાવ ટુકડીઓએ રાહત કામગીરી હાથ ધરી હતી.
Himachal Pradesh Bus Accident :ગંભીર ઈજાગ્રસ્તોને વિવિધ હોસ્પિટલમાં ખસેડાયા
સિરમૌરના એસપી નિશ્ચિંત સિંહ નેગીએ જણાવ્યું હતું કે, પોલીસ અને બચાવ ટીમો હાલ યુદ્ધના ધોરણે કામગીરી કરી રહી છે. ગંભીર રીતે ઈજાગ્રસ્ત પાંચ લોકોને વધુ સારવાર માટે સંગડાહ, દદાહૂ અને નાહન મેડિકલ કોલેજમાં ખસેડવામાં આવ્યા છે. અન્ય ઈજાગ્રસ્તોને નજીકની હોસ્પિટલોમાં પ્રાથમિક સારવાર આપવામાં આવી રહી છે.
મુખ્યમંત્રીએ શોક વ્યક્ત કર્યો, સહાયના આદેશ
હિમાચલ પ્રદેશના મુખ્યમંત્રી સુખવિંદર સિંહ સુક્ખૂએ આ ભયાનક દુર્ઘટના પર ઊંડો શોક વ્યક્ત કર્યો છે. તેમણે જિલ્લા વહીવટીતંત્રને મૃતકોના પરિવારજનોને તમામ શક્ય સહાય પૂરી પાડવા અને ઈજાગ્રસ્તોને શ્રેષ્ઠ તબીબી સારવાર મળે તે સુનિશ્ચિત કરવા સૂચના આપી છે. સાથે જ ઉદ્યોગ મંત્રી હર્ષવર્ધન ચૌહાણ અને કોંગ્રેસ પ્રદેશ અધ્યક્ષ વિનય કુમારે પણ ઘટનાને લઈ દુઃખ વ્યક્ત કર્યું છે.
અકસ્માતના કારણોની તપાસ શરૂ
પોલીસ દ્વારા અકસ્માતના ચોક્કસ કારણોની તપાસ શરૂ કરવામાં આવી છે. પ્રાથમિક રીતે પહાડી માર્ગ, તીવ્ર વળાંક અથવા ડ્રાઈવરની ભૂલને કારણે અકસ્માત થયો હોવાની શક્યતા વ્યક્ત કરવામાં આવી રહી છે. સમગ્ર ઘટનાને લઈ વિસ્તારમાં શોકની લાગણી વ્યાપી ગઈ છે.
