Surat Fire: સુરત જિલ્લાના પલસાણા તાલુકાના મખીંગા ગામમાં આવેલી શ્રી બાલાજી કેમિકલ ફેક્ટરીમાં બુધવારે (17 ડિસેમ્બર) વહેલી સવારે ભીષણ આગ લાગવાની ઘટના સામે આવી છે. કેમિકલ ફેક્ટરી હોવાને કારણે આગે ખૂબ જ ઓછા સમયમાં વિકરાળ સ્વરૂપ ધારણ કર્યું હતું, જેના પગલે સમગ્ર વિસ્તારમાં અફરાતફરી મચી ગઈ હતી.
Surat Fire: જ્વલનશીલ કેમિકલના કારણે આગ વિકરાળ
મળતી માહિતી મુજબ, ફેક્ટરીમાં સંગ્રહિત જ્વલનશીલ કેમિકલના કારણે આગ ઝડપથી ફેલાઈ હતી. આગ એટલી તીવ્ર હતી કે દૂર-દૂર સુધી ધૂમાડાના ગોટા ઉડતા નજરે પડ્યા હતા. ઘટનાની ગંભીરતા જોતા સુરત ફાયર વિભાગની 10થી વધુ ગાડીઓ તાત્કાલિક ઘટનાસ્થળે દોડી આવી હતી.
ફાયર વિભાગે હાથ ધર્યું રેસ્ક્યુ ઓપરેશન
આગની જાણ થતાં જ ફાયર વિભાગે તરત જ રેસ્ક્યુ અને આગ બુઝાવવાની કામગીરી શરૂ કરી હતી. આગને કાબૂમાં લેવા માટે સતત પાણીનો મારો કરવામાં આવ્યો હતો. આગ વધુ ન ફેલાય તે માટે સુરક્ષાના ભાગરૂપે આસપાસના વિસ્તારો ખાલી કરાવવામાં આવ્યા હતા.
Surat Fire: જાનહાનિ નહીં, કારણ અકબંધ
રાહતની વાત એ છે કે હાલ સુધી આ આગની ઘટનામાં કોઈ જાનહાનિ કે ઇજાગ્રસ્ત થયાની માહિતી સામે આવી નથી. જોકે, આગ લાગવાનું ચોક્કસ કારણ હજુ અકબંધ છે. આગ પર સંપૂર્ણ કાબૂ મેળવ્યા બાદ ફાયર વિભાગ અને તંત્ર દ્વારા આ મામલે વધુ તપાસ હાથ ધરવામાં આવી છે.
પરિસ્થિતિ પર નજર
હાલ પરિસ્થિતિ નિયંત્રણમાં હોવાનું ફાયર વિભાગ દ્વારા જણાવવામાં આવ્યું છે, જોકે સુરક્ષાના કારણોસર વિસ્તાર પર સતત નજર રાખવામાં આવી રહી છે.
આ પણ વાંચો :IPL 2026:છગ્ગાઓનો તોફાન લાવનાર કાર્તિક શર્મા પર CSKની મોટી બોલી
