Shahrukh Khan Virat Kohli: ભલે વિરાટ કોહલી વર્લ્ડ કપ ફાઇનલમાં સદી ફટકારી શક્યો ન હતો, પરંતુ તે પોતાની અડધી સદીની ઇનિંગ્સથી ચાહકોના દિલ જીતવામાં ચોક્કસ સફળ રહ્યો. જો કે કોહલી 54 રન બનાવીને આઉટ થયો હતો, પરંતુ તેણે પોતાની ઇનિંગ દરમિયાન 4 ચોગ્ગા માર્યા હતા.કોહલીએ 63 બોલમાં 54 રનની ઇનિંગ રમી હતી. તમને જણાવી દઈએ કે, કિંગ ખાન શાહરૂખ ખાન (Shahrukh Khan) પોતાના પરિવાર સાથે અમદાવાદમાં ફાઈનલ મેચ જોવા માટે પહોંચ્યા હતા. આવી સ્થિતિમાં KKR એ તેના સોશિયલ મીડિયા એકાઉન્ટ પર એક તસવીર શેર કરી છે જેને ચાહકો ખૂબ પસંદ કરી રહ્યા છે. IPL ફ્રેન્ચાઇઝી KKR એ સોશિયલ મીડિયા પર પોસ્ટ શેર કરી અને લખ્યું, “જ્યારે કિંગ કોહલી રમે છે, ત્યારે કિંગ ખાન જુએ છે.” કિંગ કોહલી અને કિંગ ખાનના (Shahrukh Khan) ચાહકો આ તસવીર પર સતત કોમેન્ટ કરી રહ્યા છે.
ઉલ્લેખનીય છે કે, વિરાટ કોહલી એવો બેટ્સમેન છે જેણે આ વર્લ્ડ કપમાં સૌથી વધુ રન બનાવ્યા છે. કોહલીએ 11 મેચમાં કુલ 745 રન બનાવ્યા છે. કોહલી ODI વર્લ્ડ કપની એક આવૃત્તિમાં 700 થી વધુ રન બનાવનાર પ્રથમ બેટ્સમેન બની ગયો છે. કોહલીએ પોતાની ODI કરિયરની 72મી અડધી સદી પૂરી કરી હતી.
પોતાની અડધી સદીની ઇનિંગ દરમિયાન તેણે બે ખાસ રેકોર્ડ પોતાના નામે કર્યા. ODI વર્લ્ડ કપમાં કોહલીનો આ સતત પાંચમો 50+ સ્કોર છે. આ સિવાય વિરાટ કોહલી વર્લ્ડ કપની સેમીફાઈનલમાં સદી અને ફાઈનલમાં અડધી સદી ફટકારનાર વિશ્વનો સાતમો બેટ્સમેન બની ગયો છે. આમ કરીને કોહલીએ માઈક બ્રેરલી (1979), ડેવિડ બૂન (1987), જાવેદ મિયાંદાદ (1992), અરવિંદા ડી સિલ્વા (1996), ગ્રાન્ટ ઈલિયટ (2015) અને સ્ટીવ સ્મિથ (2015)ની બરાબરી કરી લીધી છે.
આ પહેલા ભારત સામે ઓસ્ટ્રેલિયાના કેપ્ટન પેટ કમિન્સે ટોસ જીતીને પ્રથમ બોલિંગ કરવાનો નિર્ણય લીધો હતો. રોહિત શર્મા ફરી એકવાર ફાઇનલમાં મોટો સ્કોર કરી શક્યો ન હતો અને 47 રન બનાવીને આઉટ થયો હતો.
