Sanand Murder Case: અમદાવાદ જિલ્લાના સાણંદ તાલુકાના ગણાસર ગામમાં ગત ૧૦ એપ્રિલના રોજ થયેલા ૩૦ વર્ષીય યુવકના મોતના કેસે નવો વળાંક લીધો છે. શરૂઆતમાં જે મોત કુદરતી કે અકસ્માત લાગતું હતું, તે ખરેખર એક પૂર્વ આયોજિત હત્યા હોવાનું બહાર આવ્યું છે. આડા સંબંધોમાં અંધ બનેલી પત્નીએ જ પોતાના પ્રેમી સાથે મળીને પતિને મોતના ઘાટ ઉતાર્યો હોવાનો પર્દાફાશ સાણંદ પોલીસે કર્યો છે.
Sanand Murder Case: શું હતી સમગ્ર ઘટના?
ગણાસર ગામના ઈન્દિરા આવાસમાં રહેતા ૩૦ વર્ષીય સંજય ઠાકોર ૧૦ એપ્રિલની સવારે પોતાના ઘરમાં ખાટલા પર મૃત હાલતમાં મળી આવ્યા હતા. તે સમયે શંકાસ્પદ મોત ગણીને પોલીસે મૃતદેહને પોસ્ટમોર્ટમ (PM) માટે મોકલ્યો હતો. જો કે, જેવી પીએમની વિગતો સામે આવી કે પોલીસ પણ ચોંકી ઉઠી હતી. રિપોર્ટમાં સ્પષ્ટ થયું કે સંજયનું મોત ગળું દબાવવાના કારણે (Strangulation) થયું છે.
Sanand Murder Case: હત્યા પાછળનું કારણ: આડા સંબંધો
તપાસ દરમિયાન જાણવા મળ્યું કે સંજયની ૨૫ વર્ષીય પત્ની પાયલને ગામમાં જ રહેતા ૨૩ વર્ષીય રાહુલ ઠાકોર સાથે પ્રેમ સંબંધ હતો. ઘટનાની રાત્રે પતિ-પત્ની વચ્ચે ઝઘડો થતા પાયલે તેના પ્રેમીને ઘરે બોલાવ્યો હતો. આ પછી બંનેએ મળીને સંજયની હત્યા કરવાનો પ્લાન બનાવ્યો.
- કઈ રીતે કરી હત્યા? રાહુલે સંજયના બંને હાથ પકડી રાખ્યા હતા અને પાયલે ટુવાલ તથા ઓશિકા વડે સંજયનું મોઢું અને ગળું દબાવી તેને રૂંધાવી નાખ્યો હતો.
- પુરાવા છુપાવવાનો પ્રયાસ: પતિના મોત બાદ બંને આરોપીઓ દરવાજો બહારથી બંધ કરીને ગામ છોડી નાસી ગયા હતા, જેથી કોઈને શંકા ન જાય.
Sanand Murder Case: પોલીસે ગણતરીના કલાકોમાં ભેદ ઉકેલ્યો
મૃતકના પિતાએ પત્ની પાયલ અને રાહુલ ગાયબ હોવાથી તેમના પર શંકા વ્યક્ત કરી હતી. સાણંદ પોલીસે ટેકનિકલ સોર્સ અને બાતમીદારોની મદદથી ગણતરીના કલાકોમાં જ બંને આરોપીઓને ઝડપી પાડ્યા છે. હાલ પોલીસે બંનેની ધરપકડ કરી કાયદેસરની કાર્યવાહી હાથ ધરી છે.
વધુ સમાચાર વાંચવા માટે અંહી ક્લિક કરો
