NIA દ્વારા મહારાષ્ટ્ર અને કર્ણાટકમાં 41 સ્થળો પર સર્ચ ઓપરેશન, ISISનો ગુજરાત પર મોટા આતંકી હુમલાનો હતો પ્લાન

રાષ્ટ્રીય તપાસ એજન્સી (NIA) ISIS આતંકવાદી ષડયંત્રના કેસમાં કર્ણાટક અને મહારાષ્ટ્રમાં 40 થી વધુ સ્થળો પર દરોડા પાડયા છે. સૂત્રોના જણાવ્યા અનુસાર, NIA દ્વારા સવારથી અત્યાર સુધીમાં કુલ 41 સ્થળોએ દરોડા પાડવામાં આવ્યા છે, જેમાંથી એજન્સીના અધિકારીઓએ કર્ણાટકમાં 1, પુણેમાં 2, થાણે ગ્રામીણમાં 31, થાણે શહેરમાં 9 અને ભાયંદરમાં 1 સ્થાન પર સર્ચ ઓપરેશન કરવામાં આવ્યું છે. પ્રાપ્ત માહિતી અનુસાર, થાણેથી કેટલાક લોકોની અટકાયત પણ કરવામાં આવી છે. 

પ્રાપ્ત માહિતી અનુસાર આતંકવાદ વિરોધી એજન્સીના અધિકારીઓએ મહારાષ્ટ્ર અને કર્ણાટકના પોલીસ દળો સાથે મળીને આ સ્થળો પર દરોડા પાડ્યા. આ કેસ આરોપી વ્યક્તિઓ અને તેમના સહયોગીઓ દ્વારા ઘડવામાં આવેલા ગુનાહિત કાવતરાને લગતો છે, જેમણે પોતાને અલ-કાયદા અને ISIS સહિતના પ્રતિબંધિત આતંકવાદી સંગઠનોની હિંસક ઉગ્રવાદી વિચારધારા માટે પ્રતિજ્ઞા લીધી હતી અને આતંકવાદી ગેંગની રચના કરી હતી.

આતંકવાદી સંગઠનોએ ભારતમાં ઇસ્લામિક શાસન સ્થાપિત કરવા માટે હિંસક જેહાદ ચલાવવાનું શરૂ કર્યું અને આ માટે તેઓ ધાર્મિક વર્ગો ચલાવવા ઉપરાંત, તેઓએ તેમની સાથે સમાન વિચારધારાવાળા યુવાનોને પણ સામેલ કર્યા.

ઉલ્લેખનીય છે કે ગત મહિને ISISના મોટા આતંકી પ્લાનનો પર્દાફાશ થયો હતો, જ્યારે ISIS ના એક ધરપકડ કરાયેલા આતંકીના કબૂલાત દ્વારા ઘણા ખુલાસા થયા હતા. અમદાવાદ અને ગાંધીનગરમાં ISIS ના મોટા વિસ્ફોટોને અંજામ આપવાની તેમની યોજના હતી. તે જ સમયે, ભારતના કેટલાક મહત્વપૂર્ણ સૈન્ય મથકો પણ ISIS ના નિશાના પર હતા. ભારતના મહત્વના સૈન્ય ઠેકાણાઓ પરથી લેવામાં આવેલી તસવીરો પાકિસ્તાન અને સીરિયામાં મોકલવામાં આવી હતી.