Nagpur Tragedy:મહારાષ્ટ્રના નાગપુર જિલ્લાના કાટોલ તાલુકામાંથી એક હૃદયદ્રાવક સમાચાર સામે આવ્યા છે. રાઉલગાંવ સ્થિત એસબીએલ એનર્જી લિમિટેડ (SBL Energy Limited) નામની વિસ્ફોટક બનાવતી કંપનીમાં આજે વહેલી સવારે ભીષણ વિસ્ફોટ થયો હતો. આ દુર્ઘટનામાં અત્યાર સુધીમાં 17 શ્રમિકોના મોત થયાની પુષ્ટિ થઈ છે, જ્યારે 18 જેટલા શ્રમિકો ગંભીર રીતે ઈજાગ્રસ્ત થયા છે.
Nagpur Tragedy:સવારે કામ શરૂ થતા જ સર્જાઈ દુર્ઘટના
પ્રાપ્ત માહિતી અનુસાર, આ ધડાકો આજે સવારે 6 થી 7 વાગ્યાની વચ્ચે થયો હતો. શ્રમિકો જ્યારે સવારની શિફ્ટમાં કામ પર આવ્યા અને વિસ્ફોટક બનાવવાની પ્રક્રિયા શરૂ થઈ, ત્યારે અચાનક એક જોરદાર બ્લાસ્ટ થયો હતો. આ ધડાકો એટલો શક્તિશાળી હતો કે તેનો અવાજ આસપાસના કેટલાક કિલોમીટર સુધી સંભળાયો હતો અને કંપનીના તે યુનિટના ફૂરચા ઉડી ગયા હતા.
Nagpur Tragedy:બચાવ કામગીરી અને ઈજાગ્રસ્તોની સ્થિતિ
નાગપુર ગ્રામીણના એસપી હર્ષ પોદ્દારે ઘટનાની પુષ્ટિ કરતા જણાવ્યું કે:
- વિસ્ફોટ સમયે યુનિટમાં અંદાજે 25 થી 30 શ્રમિકો હાજર હતા.
- 18 ગંભીર રીતે ઘાયલ શ્રમિકોને તાત્કાલિક નાગપુરની વિવિધ હોસ્પિટલોમાં ખસેડવામાં આવ્યા છે.
- હજુ પણ કેટલાક મજૂરો કાટમાળ નીચે ફસાયા હોવાની આશંકાને પગલે રેસ્ક્યુ ઓપરેશન ચાલુ છે.
ભીષણ આગ અને અફરાતફરીનો માહોલ
વિસ્ફોટ બાદ કંપનીમાં ભીષણ આગ ફાટી નીકળી હતી, જેના કારણે આખા વિસ્તારમાં કાળા ધુમાડાના ગોટેગોટા જોવા મળ્યા હતા. સ્થાનિક વહીવટીતંત્ર, ફાયર બ્રિગેડ અને પોલીસની ટીમો ઘટનાસ્થળે પહોંચી ગઈ છે. કંપનીના પરિસરમાં હાજર અન્ય શ્રમિકો અને આસપાસના રહીશોમાં ભારે ફફડાટ વ્યાપી ગયો છે.
એસબીએલ એનર્જી લિમિટેડ વિશે
આ કંપની મુખ્યત્વે ખાણકામ (Mining) અને ઔદ્યોગિક વપરાશ માટેના વિસ્ફોટકો બનાવે છે. પ્રાથમિક તપાસમાં વિસ્ફોટક બનાવવાની પ્રક્રિયા દરમિયાન કોઈ ટેકનિકલ ખામી કે બેદરકારીને કારણે આ દુર્ઘટના ઘટી હોવાનું મનાઈ રહ્યું છે.
આ પણ વાંચો :અમેરિકા-ઈઝરાયલના હુમલામાં સુપ્રીમ લીડર આયાતુલ્લા ખામેનીનું મોત; સમગ્ર દેશમાં 40 દિવસનો શોક
