Maharashtra Politics: મહારાષ્ટ્રના નાયબ મુખ્યમંત્રી અજિત પવારના નિધન બાદ રાજ્યના રાજકારણમાં ભારે હલચલ જોવા મળી રહી છે. તેમના સ્થાને કોણ નાયબ મુખ્યમંત્રી બનશે, NCPનાં બંને જૂથોના વિલિનીકરણ અંગે શું નિર્ણય લેવાશે અને મહત્વના વિભાગોની વહેંચણી કોના હાથમાં જશે—આ તમામ મુદ્દાઓને લઈને રાજકીય ચર્ચાઓ તેજ બની છે.
આ મુદ્દાઓને લઈને NCPનું પ્રતિનિધિમંડળ મુખ્યમંત્રી દેવેન્દ્ર ફડણવીસને મળવા માટે મુંબઈ સ્થિત વર્ષા બંગલે પહોંચ્યું હતું. આ બેઠકમાં NCPના વરિષ્ઠ નેતાઓ પ્રફુલ્લ પટેલ, છગન ભુજબળ અને સુનીલ તટકરે હાજરી આપી હતી.
અજિત પવાર પાસે મહારાષ્ટ્ર સરકારમાં નાણાં, આબકારી અને રમતગમત જેવા મહત્વના વિભાગો ઉપરાંત નાયબ મુખ્યમંત્રીનું પદ પણ હતું. તેમના નિધન બાદ આ વિભાગોની જવાબદારી કોને સોંપવી અને પાર્ટીનું રાષ્ટ્રીય નેતૃત્વ કોના હાથમાં આપવું તે મુદ્દે NCPની અંદર ચર્ચાઓ ચાલી રહી છે.
Maharashtra Politics: પત્ની સુનેત્રા પવારને Dy.CM બનાવવાની માગ
રાજકીય વર્તુળોમાં એવી ચર્ચા પણ છે કે અજિત પવારના સ્થાને તેમની પત્ની સુનેત્રા પવારને નાયબ મુખ્યમંત્રી બનાવવાની માગ ઉઠી રહી છે. સુનેત્રા પવારે તાજેતરમાં અજિત પવારના ચૂંટણી રણનીતિકાર નરેશ અરોરાને બારામતી બોલાવ્યા હોવાનું પણ જાણવા મળ્યું છે. નરેશ અરોરાની સંસ્થા ‘ડિઝાઇનબોક્સ’ NCP માટે રાજકીય વ્યૂહરચના તૈયાર કરતી રહી છે.
Maharashtra Politics: NCPના વિલિનીકરણ પર શરદ પવારનો અંતિમ નિર્ણય
બીજી તરફ, NCPનાં બંને જૂથોના વિલિનીકરણ અંગે પણ ચર્ચાઓ ફરી તેજ બની છે. દાવો કરવામાં આવી રહ્યો છે કે અજિત પવાર આ વિલય માટે સક્રિય રીતે પ્રયાસ કરી રહ્યા હતા, પરંતુ હવે આ મુદ્દે અંતિમ નિર્ણય શરદ પવાર લેશે.
Maharashtra Politics: CM સાથેની બેઠક બાદ પ્રફુલ્લ પટેલનું નિવેદન
મુખ્યમંત્રી દેવેન્દ્ર ફડણવીસ સાથેની બેઠક બાદ NCPના નેતા પ્રફુલ્લ પટેલે મીડિયા સાથે વાતચીત કરતાં જણાવ્યું હતું કે,
“અમે મુખ્યમંત્રીને સ્પષ્ટ કહ્યું છે કે જનભાવનાઓ અને કાર્યકરોની સ્થિતિને ધ્યાનમાં રાખીને જલદી નિર્ણય લેવો જરૂરી છે. અજિત પવારના પોર્ટફોલિયો અને NCP સંબંધિત મુદ્દાઓમાં કોઈ અનિશ્ચિતતા ન રહેવી જોઈએ.”
NCP વિલય અંગે નેતાઓના દાવા
- અજિત પવારના નજીકના કિરણ ગુજરાએ PTIને જણાવ્યું હતું કે અજિત બંને જૂથોને એક કરવા માટે 100 ટકા પ્રતિબદ્ધ હતા અને વિલય માટે એક સ્પષ્ટ રોડમેપ તૈયાર કર્યો હતો.
- NCPના વરિષ્ઠ નેતા જયંત પાટીલએ જણાવ્યું હતું કે વિલિનીકરણ અંગે અજિત પવાર સાથે અનેક બેઠકો થઈ હતી અને તેઓ સકારાત્મક હતા. જિલ્લા પરિષદ ચૂંટણી બાદ અંતિમ નિર્ણય લેવાનો હતો.
- NCP શરદ જૂથના નેતા એકનાથ ખડસેએ ANIને જણાવ્યું હતું કે NCPનાં બંને જૂથો અંતે એકસાથે આવશે.
અજિત પવારના નિધન બાદ ઉભી થયેલી આ પરિસ્થિતિએ મહારાષ્ટ્રના રાજકારણને નવી દિશામાં લઈ જતી ચર્ચાઓને જન્મ આપ્યો છે. હવે સૌની નજર મુખ્યમંત્રી દેવેન્દ્ર ફડણવીસ અને NCPના વરિષ્ઠ નેતૃત્વના આગામી નિર્ણય પર ટકી છે.
આ પણ વાંચો :Indian Railway: રેલવેમાં તત્કાલ ટિકિટ બુકિંગના નવા નિયમો જાહેર, મુસાફરો માટે મહત્વના ફેરફાર
