IPO news :ભારતીય મૂડીબજાર માટે વર્ષ 2025 ઐતિહાસિક સાબિત થયું છે. કંપનીઓએ ઇનિશિયલ પબ્લિક ઑફરિંગ (IPO) મારફતે રેકોર્ડ ભંડોળ એકત્ર કર્યું છે. મોતીલાલ ઓસવાલ ફાઇનાન્સિયલ સર્વિસિસના સ્ટ્રેટેજી રિપોર્ટ અનુસાર, 2025માં 365થી વધુ IPO દ્વારા કુલ ₹1.95 લાખ કરોડ રૂપિયા એકત્ર કરવામાં આવ્યા.
આમાં સૌથી મહત્વપૂર્ણ વાત એ છે કે મેઇનબોર્ડ IPOનું યોગદાન સૌથી વધારે રહ્યું. વર્ષ દરમિયાન આવેલા 106 મેઇનબોર્ડ IPO દ્વારા ₹1.83 લાખ કરોડ રૂપિયા એકત્ર થયા, જે કુલ ભંડોળનો આશરે 94% ભાગ છે.
IPO news :છેલ્લા બે વર્ષમાં IPOનો સુવર્ણકાળ
IPO બજાર માટે 2024 અને 2025 બંને વર્ષો ખૂબ જ મજબૂત રહ્યા છે.
- 2024માં 336 IPO દ્વારા ₹1.90 લાખ કરોડ એકત્ર થયા
- 2025માં 365 IPO દ્વારા ₹1.95 લાખ કરોડ મળ્યા
આ રીતે છેલ્લા બે વર્ષમાં કુલ 701 IPO દ્વારા ₹3.8 લાખ કરોડ એકત્ર કરવામાં આવ્યા છે. આ આંકડો 2019થી 2023ના પાંચ વર્ષ દરમિયાન એકત્ર થયેલા ₹3.2 લાખ કરોડ કરતાં પણ વધુ છે.
IPO news :મેઇનબોર્ડ IPOની દાદાગીરી
છેલ્લા બે વર્ષમાં માત્ર 198 મેઇનબોર્ડ IPO દ્વારા જ ₹3.6 લાખ કરોડનું ભંડોળ મળ્યું છે. આથી સ્પષ્ટ થાય છે કે ભારતના કેપિટલ ફોર્મેશનમાં મોટી કંપનીઓની ભૂમિકા સતત વધી રહી છે.
IPO news :ટાટા કેપિટલનો IPO રહ્યો હાઇલાઇટ
2025માં કેટલાક મોટા IPO ખાસ ચર્ચામાં રહ્યા.
ઓક્ટોબર 2025માં આવેલો ટાટા કેપિટલનો ₹15,500 કરોડનો IPO ભારતના ઇતિહાસમાં ચોથો સૌથી મોટો પબ્લિક ઇશ્યૂ બન્યો.
આ વર્ષે IPO લાવનારી કંપનીઓમાં સ્ટાર્ટઅપ્સ ઉપરાંત ઊર્જા, ઇન્ફ્રાસ્ટ્રક્ચર અને મેન્યુફેક્ચરિંગ સેક્ટરની મોટી કંપનીઓ પણ સામેલ રહી.
IPO news :રિટેલ રોકાણકારોનો વધતો વિશ્વાસ
IPO બજારની સફળતાનું મુખ્ય કારણ રિટેલ રોકાણકારોનો વધતો વિશ્વાસ રહ્યો.
- ડીમેટ એકાઉન્ટ્સની સંખ્યામાં રેકોર્ડ વધારો
- મ્યુચ્યુઅલ ફંડ્સ મારફતે બજારમાં સતત લિક્વિડિટી
ઘણા IPOમાં રિટેલ ક્વોટા થોડા કલાકોમાં જ પૂર્ણ ભરાઈ ગયા, જે બજારમાં સકારાત્મક માહોલ દર્શાવે છે.
લિસ્ટિંગ ગેઇનમાં પણ શાનદાર વર્ષ
2025 માત્ર ભંડોળ એકત્ર કરવાના મામલે નહીં, પરંતુ લિસ્ટિંગ ગેઇન માટે પણ યાદગાર રહ્યું.
ઘણી કંપનીઓના શેરો ઇશ્યૂ પ્રાઇસથી 50%થી 100% સુધી પ્રીમિયમ પર લિસ્ટ થયા, જેના કારણે રોકાણકારોને પહેલો જ દિવસે મજબૂત વળતર મળ્યું.
2026માં IPOનો નવો રેકોર્ડ બનવાની શક્યતા
IPO બજારમાં બનેલો આ રેકોર્ડ વધુ લાંબો સમય ટકશે તેવી શક્યતા નથી. રિપોર્ટ્સ અનુસાર, 2026માં 192 કંપનીઓ IPO દ્વારા ₹2.56 લાખ કરોડ એકત્ર કરી શકે છે.
2025માં જ અત્યાર સુધીમાં લગભગ 100 મેઇનબોર્ડ IPO દ્વારા ₹1.77 લાખ કરોડ એકત્ર થયા છે, જે 2007 પછીનો સૌથી ઊંચો આંકડો છે.
નવા વર્ષમાં NSE, જિયો, ફોનપે જેવી મોટી કંપનીઓના IPO આવી શકે છે, જેના કારણે 2026 IPO બજાર માટે વધુ ઐતિહાસિક બનવાની શક્યતા છે.
આ પણ વાંચો :H1 B Visa:અમેરિકાની નવી પૉલિસીથી H-1B વિઝા રિન્યૂઅલ અટક્યું, ભારતે ઉઠાવ્યો મુદ્દો
