India EU Free Trade Deal:ભારત અને યુરોપિયન યુનિયન (EU) વચ્ચે મુક્ત વેપાર કરાર (Free Trade Agreement – FTA)ને લઈને ઐતિહાસિક જાહેરાત કરવામાં આવી છે. વડાપ્રધાન નરેન્દ્ર મોદીએ આ કરારને “મધર ઓફ ઓલ ડીલ” ગણાવતા જણાવ્યું કે વિશ્વભરમાં તેની વ્યાપક ચર્ચા થઈ રહી છે. આ ડીલથી ભારત અને યુરોપ વચ્ચેના વેપાર સંબંધો વધુ મજબૂત બનશે અને બંને પક્ષોને આર્થિક ફાયદો થશે.
India EU Free Trade Deal:16મી ભારત–EU સમિટમાં જાહેરાત
ભારત–EU ફ્રી ટ્રેડ ડીલની જાહેરાત 16મી ભારત–યુરોપિયન યુનિયન સમિટ દરમિયાન કરવામાં આવી. આ સમિટની સહ-અધ્યક્ષતા યુરોપિયન કમિશનના અધ્યક્ષ ઉર્સુલા વોન ડેર લેયેન અને યુરોપિયન કાઉન્સિલના અધ્યક્ષ એન્ટોનિયો કોસ્ટા દ્વારા કરવામાં આવી. બંને નેતાઓ ભારતની સત્તાવાર મુલાકાતે આવ્યા હતા અને 77મા પ્રજાસત્તાક દિવસની ઉજવણીમાં મુખ્ય અતિથિ તરીકે હાજર રહ્યા હતા.
India–EU Free Trade Deal:વેપાર, સુરક્ષા અને સ્વચ્છ ઉર્જામાં સહયોગ
FTA દ્વારા વેપાર સરળ બનશે, ટેરિફ અને નોન-ટેરિફ અવરોધો ઘટશે તેમજ સુરક્ષા અને સ્વચ્છ ઉર્જા જેવા મહત્વપૂર્ણ ક્ષેત્રોમાં સહયોગ વધશે. MSME ક્ષેત્રને પણ આ ડીલથી મોટો લાભ થવાની શક્યતા છે. GI ટેગ ધરાવતા ઉત્પાદનોને આંતરરાષ્ટ્રીય બજારમાં વધુ સુરક્ષા મળશે.
અમેરિકાનો વિરોધ, યુરોપ પર આરોપ
આ ફ્રી ટ્રેડ ડીલને લઈને અમેરિકા નારાજ હોવાનું સામે આવ્યું છે. અમેરિકાના નાણા મંત્રી સ્કોટ બેસેન્ટે ABC ન્યૂઝને આપેલા ઇન્ટરવ્યુમાં આરોપ લગાવ્યો કે યુરોપિયન દેશો ભારત પાસેથી રિફાઇન્ડ ઓઈલ પ્રોડક્ટ્સ ખરીદી રહ્યા છે, જે રશિયન ક્રૂડમાંથી બને છે, અને આ રીતે રશિયા–યુક્રેન યુદ્ધને આર્થિક રીતે સહારો મળી રહ્યો છે.
યુરોપને થનારા ફાયદા
- યુરોપિયન દારૂ અને વાઇન પરના કરમાં ઘટાડો થતાં ભારતમાં તે સસ્તા થઈ શકે છે
- BMW, Mercedes અને Porsche જેવી લક્ઝરી કાર કંપનીઓ માટે ભારતીય બજાર વધુ ખુલ્લું બનશે
- હાલ 110% સુધીના ટેક્સમાં ઘટાડો થઈને તે 40% અને પછી 10% સુધી લાવવામાં આવી શકે છે
- યુરોપિયન IT, એન્જિનિયરિંગ, ટેલિકોમ અને બિઝનેસ સર્વિસ કંપનીઓને ભારતમાં વધુ તકો મળશે
ભારતને થનારા ફાયદા
- કપડાં, ફૂટવેર અને ચામડાના ઉત્પાદનો પરની ડ્યુટી ઘટશે
- ફાર્મા અને કેમિકલ ક્ષેત્રે વેપાર દર વર્ષે 20–30% સુધી વધવાની શક્યતા
- યુરોપના કાર્બન ટેક્સમાંથી રાહત મળવાથી સ્ટીલ, એલ્યુમિનિયમ અને હાઈડ્રોજન ક્ષેત્રને ફાયદો
- ફ્રાન્સ અને જર્મની જેવા દેશો ભારતમાં ડિફેન્સ મેન્યુફેક્ચરિંગ યુનિટ્સ સ્થાપી શકે
હૈદરાબાદ હાઉસમાં મહત્વપૂર્ણ બેઠક
FTA પહેલાં વડાપ્રધાન મોદીએ હૈદરાબાદ હાઉસ ખાતે યુરોપિયન નેતાઓ સાથે દ્વિપક્ષીય બેઠક યોજી હતી. તેમાં ભારત–EU સંબંધો, વેપાર, રોકાણ અને વૈશ્વિક પરિસ્થિતિઓ પર વિસ્તૃત ચર્ચા કરવામાં આવી હતી.
‘ટોલ-ફ્રી ટ્રેડ રોડ’ બનશે FTA
સરળ શબ્દોમાં કહીએ તો, આ ફ્રી ટ્રેડ ડીલ ભારત અને EU વચ્ચે વેપાર માટે એક “ટોલ-ફ્રી રસ્તો” સાબિત થશે. આવનારા વર્ષોમાં આ કરાર ભારતની અર્થવ્યવસ્થા, નિકાસ અને રોજગાર સર્જનમાં મહત્વપૂર્ણ ભૂમિકા ભજવશે.
આ પણ વાંચો :Nationwide Bank Strike: 5 દિવસનું સપ્તાહ અમલમાં મૂકવાની માગ: દેશવ્યાપી બેંક હડતાલથી કામગીરી ખોરવાઈ
