Gujarat Weather Update:વર્ષ 2025ના અંતિમ દિવસે ગુજરાતમાં હવામાનનું રૂપ એકાએક બદલાઈ ગયું છે. સૌરાષ્ટ્રના દરિયાકાંઠાના વિસ્તારોમાં ભર શિયાળે ચોમાસા જેવો માહોલ સર્જાયો છે. વહેલી સવારથી પોરબંદર અને દેવભૂમિ દ્વારકા જિલ્લાના શહેરો તથા ગ્રામ્ય વિસ્તારોમાં ધીમી ધારે કમોસમી વરસાદ પડતાં જનજીવન પ્રભાવિત થયું છે.
Gujarat Weather Update:વહેલી સવારથી વાદળછાયું વાતાવરણ
આજે વહેલી સવારથી જ સમગ્ર પોરબંદર-દ્વારકા પંથકમાં કાળા ડિબાંગ વાદળો છવાયા હતા. ત્યારબાદ પોરબંદર શહેર અને આસપાસના ગ્રામ્ય વિસ્તારોમાં હળવા વરસાદી ઝાપટા પડ્યા. દેવભૂમિ દ્વારકા જિલ્લાના કલ્યાણપુર, જામખંભાળિયા સહિત આસપાસના ગામોમાં પણ ઝરમર વરસાદથી રસ્તાઓ ભીના થયા હતા. માવઠાના કારણે વાતાવરણમાં અચાનક ઠંડક પ્રસરી ગઈ છે.
Gujarat Weather Update:રવિ પાક પર માવઠાનો ખતરો, ખેડૂતોમાં ચિંતા
ભર શિયાળે પડેલા આ કમોસમી વરસાદે ખેડૂતોની ચિંતા વધારી છે. હાલ રવિ પાક તેની મહત્વપૂર્ણ અવસ્થામાં હોવાથી માવઠું નુકસાનકારક સાબિત થઈ શકે છે. ખાસ કરીને જીરું અને ચણાના પાકમાં ફૂગ લાગવાની અને પાક બળી જવાની ભીતિ સેવાઈ રહી છે. તૈયાર થવા આવેલા ધાણા અને ઘઉંના પાકને પણ વરસાદથી નુકસાન થવાની શક્યતા વ્યક્ત કરવામાં આવી છે.
આ ઉપરાંત માર્કેટિંગ યાર્ડમાં ખુલ્લામાં પડેલી ખેડૂતોની જણસ પલળી ન જાય તે માટે સત્તાધીશો દ્વારા તાકીદની સૂચનાઓ આપવામાં આવી છે.
Gujarat Weather Update:હવામાન વિભાગની આગાહી
હવામાન વિભાગના જણાવ્યા અનુસાર વેસ્ટર્ન ડિસ્ટર્બન્સની અસરને કારણે આગામી 24 કલાક દરમિયાન કચ્છ, જામનગર, મોરબી, બનાસકાંઠા અને પાટણ જિલ્લામાં છૂટાછવાયા સ્થળોએ હળવો વરસાદ પડી શકે છે. લોકોને અનાવશ્યક મુસાફરી ટાળવા અને સાવચેતી રાખવાની સલાહ આપવામાં આવી છે.
ઠંડીમાં આંશિક રાહત, લઘુત્તમ તાપમાન ઊંચકાયું
વાદળછાયા વાતાવરણ અને વધેલા ભેજને કારણે રાજ્યના મોટાભાગના શહેરોમાં લઘુત્તમ તાપમાનમાં વધારો નોંધાયો છે. અમદાવાદમાં ગત રાત્રે લઘુત્તમ તાપમાન 14.8 ડિગ્રી નોંધાયું હતું, જે સામાન્ય કરતાં 2.6 ડિગ્રી વધુ છે.
રાજ્યના અન્ય શહેરોમાં નલિયામાં 12.6, અમરેલીમાં 13.2, ગાંધીનગરમાં 14, રાજકોટમાં 14.2, વડોદરામાં 15, ભાવનગરમાં 15.6 અને સુરત તથા ભુજમાં 15.7 ડિગ્રી સરેરાશ લઘુત્તમ તાપમાન નોંધાયું હોવાનું હવામાન વિભાગે જણાવ્યું છે.
