GPSC Exam 2026:ગુજરાતમાં સરકારી નોકરીની તૈયારી કરી રહેલા ઉમેદવારો માટે રાહતભર્યા સમાચાર સામે આવ્યા છે. ગુજરાત જાહેર સેવા આયોગ (GPSC) દ્વારા વર્ષ **2026માં યોજાનારી વિવિધ ભરતી પરીક્ષાઓની પ્રાથમિક કસોટી (Preliminary Exam)**ની તારીખો સત્તાવાર રીતે જાહેર કરી દેવામાં આવી છે. લાંબા સમયથી પરીક્ષા તારીખોની રાહ જોતા ઉમેદવારો માટે આ જાહેરાત મહત્વપૂર્ણ માનવામાં આવી રહી છે.
GPSC Exam 2026:ફેબ્રુઆરીથી એપ્રિલ દરમિયાન યોજાશે પરીક્ષાઓ
GPSC દ્વારા બહાર પાડવામાં આવેલી માહિતી મુજબ, ક્લાસ-1 અને ક્લાસ-2ના કુલ 18 જેટલા અલગ-અલગ સંવર્ગો માટેની પ્રિલીમ પરીક્ષાઓ ફેબ્રુઆરી, માર્ચ અને એપ્રિલ 2026 દરમિયાન લેવામાં આવશે. આ પરીક્ષાઓ વહીવટી, ટેકનિકલ, શિક્ષણ અને અન્ય મહત્વના વિભાગોમાં ભરતી માટે યોજાશે.
આ જાહેરાત બાદ ખાસ કરીને વહીવટી સેવા અને ટેકનિકલ કેડરમાં કારકિર્દી બનાવવાની ઈચ્છા ધરાવતા યુવાઓમાં ઉત્સાહ જોવા મળી રહ્યો છે.
GPSC Exam 2026:કયા પદો માટે લેવાશે પરીક્ષા?
GPSC દ્વારા જાહેર કરાયેલા પદોમાં મુખ્યત્વે નીચેના સંવર્ગોનો સમાવેશ થાય છે:
વહીવટી અને સચિવાલય સેવા
- રહસ્ય સચિવ (ક્લાસ-2)
- મદદનીશ વહીવટી અધિકારી (ક્લાસ-2)
ટેકનિકલ અને વિશેષ સેવા
- MIS મેનેજર (ક્લાસ-1 અને ક્લાસ-2)
- પશુચિકિત્સા અધિકારી (ક્લાસ-2)
- મુખ્ય વૈજ્ઞાનિક અધિકારી
શિક્ષણ અને અન્ય સેવા
- ગુજરાત શિક્ષણ સેવા
- નિયામક ગ્રંથપાલ
- નાયબ માહિતી નિયામક
- મદદનીશ ઉદ્યોગ કમિશનર
અન્ય વિભાગો
- ગુજરાત મત્સ્યોદ્યોગ સેવા
- સામાન્ય રાજ્ય સેવા – વહીવટી અધિકારી (ક્લાસ-2)
GPSC Exam 2026:પરીક્ષા કેન્દ્ર અને સમયની માહિતી ક્યાં મળશે?
GPSC દ્વારા ઉમેદવારોને સલાહ આપવામાં આવી છે કે પરીક્ષા કેન્દ્ર, સમય અને હોલ ટિકિટ સંબંધિત વિગતવાર માહિતી માટે આયોગની સત્તાવાર વેબસાઇટ પર નિયમિત રીતે નજર રાખે.
ભરતી કેલેન્ડર જાન્યુઆરી અંતે જાહેર થશે
GPSCના ચેરમેન દ્વારા ટ્વીટ કરીને જાણકારી આપવામાં આવી છે કે આવતા વર્ષમાં વિવિધ વિભાગોની લેવાનારી ભરતી પરીક્ષાઓનું સંપૂર્ણ કેલેન્ડર જાન્યુઆરી મહિનાના અંત સુધીમાં જાહેર કરવામાં આવશે.
તેમણે જણાવ્યું કે GPSC હાલમાં વિવિધ વિભાગો સાથે પરામર્શ કરી રહી છે અને આ પ્રક્રિયા પૂર્ણ થતાં ભરતી કેલેન્ડર બહાર પાડવામાં આવશે.
આ પણ વાંચો :Digital Census :1 એપ્રિલ 2026થી શરૂ થશે ‘વસતી ગણતરી , નોટિફિકેશન જાહેર
