Chaos in Gujarat ST Bus: દક્ષિણ ગુજરાતના કિમ ચાર રસ્તા પાસે રાજપીપલા-સુરત રૂટની એસ.ટી. બસમાં એક ચોંકાવનારી ઘટના સામે આવી છે. બસમાં ચઢેલા એક કિન્નરે મુસાફરો પાસે પૈસાની માંગણી કરી ઉગ્ર બોલાચાલી બાદ મારપીટ કરી હતી. આ હોબાળાને કારણે મુસાફરોમાં ફફડાટ ફેલાયો હતો અને અંતે બસને પોલીસ મથકે લઈ જવાની ફરજ પડી હતી.
Chaos in Gujarat ST Bus: શું હતી સમગ્ર ઘટના?
રાજપીપલાથી સુરત થઈ ખંગેલા જતી એસ.ટી. બસ જ્યારે કિમ ચાર રસ્તા પાસે ઉભી હતી, ત્યારે એક કિન્નર બસમાં ચઢ્યો હતો. કિન્નરે મુસાફરો પાસેથી પૈસા ઉઘરાવવાનું શરૂ કર્યું હતું. એક મુસાફરે પૈસા આપ્યા હોવા છતાં, કિન્નરે ‘આટલા ઓછા રૂપિયા ન ચાલે’ તેમ કહી વધુ પૈસા માટે દબાણ કર્યું હતું.
જ્યારે મુસાફરે વધુ પૈસા આપવાનો ઇનકાર કર્યો, ત્યારે કિન્નર ઉશ્કેરાઈ ગયો હતો અને મુસાફર સાથે ઝપાઝપી કરી તેને માર મારવા લાગ્યો હતો.
Chaos in Gujarat ST Bus: કંડક્ટરે 112 પર કરી જાણ, બસ પહોંચી પોલીસ ચોકી
બસમાં સર્જાયેલા આ હંગામાને પગલે બસના કંડક્ટર સાવીનભાઈ ડામોરે તાત્કાલિક સતર્કતા દાખવી 112 નંબર પર પોલીસને જાણ કરી હતી.
- પોલીસ કાર્યવાહી: પોલીસ કાફલો તાત્કાલિક સ્થળ પર પહોંચ્યો હતો.
- લોકેશન: બસ અને મુસાફરોને કોસંબા પોલીસ મથકની પાલોદ ચોકી ખાતે લઈ જવામાં આવ્યા હતા.
- પોલીસ સાથે ઘર્ષણ: મળતી માહિતી મુજબ, પોલીસ મથકે પહોંચ્યા બાદ પણ કિન્નરે પોલીસ કર્મીઓ સાથે માથાકૂટ કરી હતી.
મુસાફરો હેરાન, બસ 1.5 કલાક મોડી પડી
આ સમગ્ર હંગામાને કારણે બસમાં સવાર અન્ય મુસાફરોને ભારે હાલાકી ભોગવવી પડી હતી. કંડક્ટરના જણાવ્યા અનુસાર, આ મામલાને લીધે બસ તેના નિર્ધારિત સમય કરતાં લગભગ દોઢ કલાક મોડી પડી હતી. હાલ પોલીસે આ મામલે ગુનો નોંધી કાયદેસરની કાર્યવાહી હાથ ધરી છે.
આ પણ વાંચો :ભારતમાં ‘આવશ્યક ચીજવસ્તુ ધારો’ લાગુ: ઈંધણ સંકટ વચ્ચે કેન્દ્રનો મોટો નિર્ણય, જાણો કોને મળશે પહેલા ગેસ?
