નવા વાહનોની નોંધણી માટે ભાડાકરાર સાથે એફિડેવિટ રજૂ કરવી ફરજીયાત
પબ્લિક નોટરી, જ્યુડિશિયલ મેજિસ્ટ્રેટ સમક્ષ કરાયેલું એફિડેવિટ માન્ય ગણાશે
રાજ્યના વાહન વ્યવહાર વિભાગે ભાડાના ઘરમાં રહેતા લોકોએ નવું વ્હીકલ ખરીદતી વેળા રહેઠાણના પુરાવા તરીકે ભાડાકરારની સાથે એફિડેવિટ ફરજિયાત રજૂ કરવા પરિપત્ર જારી કર્યો છે.હાલ મોટાભાગની પ્રાદેશિક વાહન વ્યવહાર વિભાગની કચેરીઓમાં નવા વ્હીકલના રજિસ્ટ્રેશન માટે પોલીસ દ્વારા વેરિફિકેશન કરાયેલા ભાડાકરારને જ માન્ય રાખવામાં આવતો હતો, પરંતુ હવે ભાડાકરારની સાથે સાથે પબ્લિક નોટરી અથવા એક્ઝિયુકયુટિવ મેજિસ્ટ્રેટ અને ફર્સ્ટ ક્લાસ જ્યુડિશિયલ મેજિસ્ટ્રેટ સમક્ષ કરાયેલું એફિડેવિટ રજૂ કરી શકશે. એફિડેવિટની સાથે લાઈટબિલ, વેરાબિલ, ગેસબિલ સહિતના પુરાવા પણ વધારાના પુરાવા તરીકે રજૂ કરી શકશે.નવા વ્હીકલની નોંધણી વેળા ભાડાકરારની સાથે કયા કયા પુરાવા માન્ય ગણતા તે અંગે મતમંતાર જોવા મળી રહ્યો હતો. જેને પગલે રાજ્યના વાહન વ્યવહાર વિભાગે ૧૭મી ઓક્ટોબરને મંગળવારે એક પરિપત્ર જારી કરી સ્પષ્ટતા કરી હતી. લાંબા સમયથી પોલીસતંત્ર દ્વારા ભાડાકરારને વેરિફિકેશન કરવા માટે ગલ્લાંતલ્લાં કરવામાં આવે છે. ત્યારે પોલીસ વેરિફિકેશન વગર વાહનો રજિસ્ટ્રેશનની પ્રક્રિયા ટલ્લે ચઢી ગઈ હતી. એટલું જ નહીં હવે રાજ્યના ડીલરોને રજિસ્ટ્રેશનની સત્તા આપી દીધા બાદ અસમંજસની પરિસ્થિતિ ઊભી થઈ હતી. કેમ કે, ડીલરો ભાડાકરારની સાથે એફિડેવિટ લઇને રજીસ્ટ્રેશન પ્રક્રિયા પૂર્ણ કરી દેતા હતા જયારે આરટીઓના અધિકારીઓ નોંધણી પ્રક્રિયાના ક્રોસ વેરિફિકેશનના સમયે એફિડેવિટ અને ભાડાકરાર માન્ય રાખવાનો ઇન્કાર કરી રહ્યા હતા. જેને પગલે ભાડાના ઘરમાં રહેતા લોકો માટે વ્હીકલ ખરીદ્યા બાદ રજીસ્ટ્રેશન માટે મોટો પડકાર બની ગયો હતો.કંપનીના નામે વાહન ખરીદતી વેળા ટેક્સનું સર્ટિફિકેટ રજૂ કરવું પડશેઃ હવે કોઈ વ્યક્તિ કંપની કે ફર્મના નામે વ્હીકલ ખરીદી કરશે તો તેવા કિસ્સામાં સરનામાંના પુરાવા તરીકે પ્રોપાઈટરના ઓળખના પુરાવા સાથે સાથે કંપની વધારાના પુરાવા તરીકે પ્રોપર્ટીનો દસ્તાવેજ, GST રજિસ્ટ્રેશન સર્ટિફિકેટ, શોપ એક્ટ રજિસ્ટ્રેશન સર્ટિફિકેટ અથવા પ્રોપર્ટી કાર્ડ રજૂ કરવાનું રહેશે.ત્યારે નવા નવા વાહનોની ખરીદી માટે આ મહત્વનો નિર્ણય લેવામાં આવ્યો છે.
સ્થાનિક સ્વરાજય સંસ્થાના ટેકસની ચોરી થવાની સંભાવના
નવા વ્હીકલના રજીસ્ટ્રેશન સમયે ભાડાકરાર સાથે એફિડેટિવ રજુ કરી હોય તો વ્હીકલની નોંધણી કરી દેવાના નિર્ણયથી સ્થાનિક સ્વરાજયની સંસ્થાઓના ટેકસની મોટા પાયે ચોરી થવાની પ્રબળ સંભાવના છે. કેમ કે, સુરત શહેરમાં રહેતો વ્યકિત પોતાનું કોઇ પરિચિત વ્યકિત ગ્રામ્ય વિસ્તારમાં રહેતુ હોય તો તેના ઘરના સરનામાંનો ઉપયોગ કરી વાહન ખરીદી શકશે. મિત્ર કે પરિચિતના ઘરના સરનામાનો ભાડાકરાર બનાવી પબ્લિક નોટરી પાસે એફિડેવિટ બનાવડાવી રજૂ કરી દેશે. હવે શહેરમાં રહેતો વ્યકિત શહેરની બહાર રહેતો હોવાનું દર્શાવીને સરળતાથી પાલિકા કે નગરપાલિકાના ટેકસની ચોરી કરી શકશે.
વાંચો અહીં બુલેટ ટ્રેન પ્રોજેક્ટ : 435 મીટર લાંબા સ્લેબનું કામ પૂર્ણ
