Tragic Rain Fury in Mahisagar: મહિસાગર જિલ્લામાં છેલ્લા બે દિવસથી પડી રહેલા સતત અને ધોધમાર વરસાદને કારણે સામાન્ય જનજીવન અસ્તવ્યસ્ત બન્યું છે. ભારે વરસાદના કારણે જિલ્લામાં કાચા મકાનોને વ્યાપક નુકસાન પહોંચ્યું છે. આ દરમિયાન વીરપુર તાલુકામાંથી એક અત્યંત હૃદયદ્રાવક અને કાળજું કંપાવનારી દુર્ઘટના સામે આવી છે, જેમાં મકાનની દીવાલ અચાનક તૂટી પડતા તેની નીચે દબાઈ જવાથી બે સગા માસૂમ બાળકોના કરુણ મોત નીપજ્યા છે.
Tragic Rain Fury in Mahisagar: ઘરની અંદર રમી રહેલા બાળકો પર બની કાળ
પ્રાપ્ત વિગતો અનુસાર, વીરપુર તાલુકાના ખાટા ગામે આ દુર્ઘટના સર્જાઈ હતી. ગામમાં સતત વરસી રહેલા વરસાદના કારણે એક રહેણાંક કાચા મકાનની દીવાલ ખૂબ જ નબળી પડી ગઈ હતી. અચાનક જ આ મકાનની દીવાલ ધરાશાયી થઈને બાજુમાં પડી હતી. જે સમયે આ દુર્ઘટના થઈ તે સમયે ઘરની અંદર બે માસૂમ બાળકો રમી રહ્યા હતા. દીવાલ અચાનક તૂટી પડતાં બંને બાળકો કાટમાળ નીચે દબાઈ ગયા હતા.
Tragic Rain Fury in Mahisagar: ૨ અને ૪ વર્ષના માસૂમોએ ગુમાવ્યા પ્રાણ
દીવાલ પડવાને કારણે થયેલા ધડાકા અને અવાજથી પરિવારજનો અને આસપાસના લોકો તાત્કાલિક દોડી આવ્યા હતા. ગ્રામસ્થોની મદદથી કાટમાળ હટાવીને બંને બાળકોને બહાર કાઢવામાં આવ્યા હતા, પરંતુ દુર્ભાગ્યવશ બે વર્ષ અને ચાર વર્ષની નાની વયના બંને માસૂમ બાળકોના ઘટનાસ્થળે જ પ્રાણ પંખેરૂ ઊડી ગયા હતા. આ અચાનક બનેલી આફતથી મૃતક બાળકોના પરિવારમાં ભારે શોકનું મોજું ફરી વળ્યું છે અને સમગ્ર ખાટા ગામમાં શોકનો માહોલ છવાઈ ગયો છે.
Tragic Rain Fury in Mahisagar: તંત્ર અને પોલીસ દ્વારા તપાસ શરૂ
ઘટનાની જાણ થતા જ વીરપુર પોલીસ સ્ટેશનનો કાફલો અને સ્થાનિક વહીવટી તંત્રની ટીમ તાત્કાલિક ઘટના સ્થળે દોડી આવી હતી. પોલીસે મૃતદેહોને કબજે કરી પોસ્ટમોર્ટમ અર્થે મોકલી આપવાની તજવીજ હાથ ધરી છે અને આ દુર્ઘટના અંગે કાયદેસરની વધુ તપાસ શરૂ કરી છે. સતત વરસાદને કારણે કાચા મકાનોમાં રહેતા લોકો માટે જોખમ વધી ગયું છે, ત્યારે તંત્ર દ્વારા લોકોને સુરક્ષિત સ્થળે ખસેડવા અથવા સાવચેત રહેવા અપીલ કરવામાં આવી રહી છે.
વધુ સમાચાર વાંચવા માટે અંહી ક્લિક કરો: સુરત-દિલ્હી મુંબઈ એક્સપ્રેસ-વે પર અનોખો અવરોધ: હાઈવેની વચ્ચે જ ઉભો છે વિશાળ હાઈટેન્શન વીજ ટાવર, વાહનચાલકો પરેશાન
