Heavy Rains in Gujarat: નર્મદા જિલ્લામાં સતત વરસી રહેલા ભારે વરસાદ અને પૂર જેવી પરિસ્થિતિને પગલે વડોદરા રેન્જના આઈજી સંદીપ સિંહ આજે રાજપીપળા ખાતે પહોંચ્યા હતા. તેમણે જિલ્લા પોલીસના ઇન્સ્પેક્શન દરમિયાન વરસાદી સ્થિતિ અને ચાલી રહેલી રાહત-બચાવ કામગીરીની ઉચ્ચ સ્તરીય સમીક્ષા કરી હતી.
Heavy Rains in Gujarat: ઘટનાની મુખ્ય વિગતો અને સમીક્ષા
- વિવિધ જિલ્લાઓની સ્થિતિની સમીક્ષા: રાજપીપળા ખાતે પોલીસ કામગીરીનું નિરીક્ષણ કરતી વખતે આઈજી સંદીપ સિંહે નર્મદા, ભરૂચ, છોટાઉદેપુર અને વડોદરા ગ્રામ્ય વિસ્તારોમાં ભારે વરસાદને કારણે સર્જાયેલી પરિસ્થિતિનો તાગ મેળવ્યો હતો.
- પોલીસ અને સુરક્ષા દળોની સજ્જતા: પોલીસ તંત્ર એનડીઆરએફ (NDRF) અને એસડીઆરએફ (SDRF) ની ટીમો સાથે સતત સંકલન સાધીને ૨૪ કલાક ખડેપગે રાહત અને બચાવ કામગીરી કરી રહ્યું છે.
- લોકોનું સુરક્ષિત સ્થળાંતર: કીમ નદીમાં પૂર જેવી પરિસ્થિતિ સર્જાતા હાંસોટ વિસ્તારમાંથી અંદાજે ૨૫૫ જેટલા લોકોને સુરક્ષિત સ્થળે ખસેડવામાં આવ્યા છે.
- માર્ગો ડાયવર્ટ કરાયા: ભારે વરસાદ અને જળબંબાકારના કારણે વડોદરા, ભરૂચ, નર્મદા અને છોટાઉદેપુર જિલ્લામાં કુલ ૧૧ માર્ગોને ડાયવર્ટ કરવામાં આવ્યા છે, જેથી વાહનવ્યવહાર સુરક્ષિત રહે.
Heavy Rains in Gujarat: તંત્ર દ્વારા આગોતરા પગલાં અને અપીલ
જિલ્લા કલેક્ટર અને જિલ્લા પોલીસ વડા સાથે સતત સંકલન કરીને કામગીરી હાથ ધરવામાં આવી રહી છે. હવામાન વિભાગની ભારે વરસાદની આગામી આગાહીને ધ્યાનમાં રાખીને પોલીસ તંત્ર સંપૂર્ણપણે સજ્જ છે.
રેન્જ આઈજી સંદીપ સિંહનું નિવેદન: “જ્યાં પણ વરસાદી પાણી અથવા પૂર જેવી પરિસ્થિતિ ઊભી થશે, ત્યાં પોલીસ, એનડીઆરએફ અને એસડીઆરએફની ટીમો તાત્કાલિક પહોંચીને નાગરિકોને સુરક્ષા અને મદદ પૂરી પાડશે.”
વધુ સમાચાર વાંચવા માટે અંહી ક્લિક કરો: ખાડીપુરના આકાશી દ્રશ્યો સામે આવ્યા; પર્વતગામ વિસ્તાર બેટમાં ફેરવાયો
