Investment Fraud Crackdown: સુરત શહેર સાયબર ક્રાઇમ સેલે ડિજિટલ છેતરપિંડી આચરતા તત્વો સામે આદરેલી ઝુંબેશ અંતર્ગત “ઓપરેશન મેન્યુઅલ હન્ટ 2.0” હેઠળ વધુ એક મોટી સફળતા મેળવી છે. સાયબર સેલે ટેકનિકલ સર્વેલન્સના આધારે ઇન્વેસ્ટમેન્ટ ફ્રોડના બે અલગ-અલગ ગુનાઓમાં સંડોવાયેલા અને લાંબા સમયથી નાસતા-ફરતા બે મુખ્ય આરોપીઓની ધરપકડ કરી સમગ્ર રેકેટના પર્દાફાશ માટેની તપાસ તેજ કરી દીધી છે.
Investment Fraud Crackdown: કેસ ૧: શેર માર્કેટમાં ૩૯૦% નફાની લાલચ આપી ₹૫.૯૯ લાખની છેતરપિંડી
સાયબર ક્રાઇમ સેલે તપાસના આધારે પંકજકુમાર રામાણી નામના આરોપીની ધરપકડ કરી છે.
- મોડસ ઓપરેન્ડી: ઠગોએ ફરિયાદીના દીકરાને શેર માર્કેટમાં રોકાણ પર ૩૯૦ ટકા જેટલો મસમોટો નફો મેળવવાની લાલચ આપી હતી. આ માટે સોશિયલ મીડિયા પર “BRP Fund104 – Grow Together” નામનું નકલી વોટ્સએપ ગ્રુપ બનાવી સંપર્ક સાધવામાં આવ્યો હતો. ત્યારબાદ “BRD Fund 100 – Day Wealth Leap Program” મારફતે રોકાણ કરાવી એક બનાવટી વેબસાઇટ પર ખોટો નફો દર્શાવીને કુલ રૂપિયા ૫.૯૯ લાખની ઠગાઈ આચરવામાં આવી હતી.
- ખાતામાંથી કરોડોના વ્યવહારો ખુલ્યા: ભોગ બનનારે ૧૯૩૦ નેશનલ હેલ્પલાઇન પર ફરિયાદ નોંધાવતા સાયબર સેલે તપાસ હાથ ધરી હતી. જેમાં ICICI બેંકના એક શંકાસ્પદ ખાતાનો ઉપયોગ થયો હોવાનું જણાયું હતું. આ ખાતું પંકજકુમાર રામાણીનું હતું, જેણે કમિશનની લાલચમાં અન્ય સાયબર ઠગોને વાપરવા આપ્યું હતું. પોલીસ તપાસમાં આ એક જ ખાતામાંથી ૨.૭૨ કરોડ રૂપિયાથી વધુના શંકાસ્પદ વ્યવહારો મળી આવ્યા છે અને તેની સામે દેશભરમાંથી ૩૭ જેટલી સાયબર ફ્રોડની ફરિયાદો નોંધાઈ ચૂકી છે.
Investment Fraud Crackdown: કેસ ૨: ગોલ્ડ ટ્રેડિંગના નામે ઠગાઈ કરનાર આરોપી અમદાવાદથી દબોચાયો
બીજા એક કિસ્સામાં, સાયબર સેલે રૂપિયા ૭.૮૬ લાખના ઓનલાઇન ઇન્વેસ્ટમેન્ટ ફ્રોડ કેસમાં સંડોવાયેલા અન્ય એક આરોપી સંજય મોહનભાઈ મારૂની અમદાવાદ ખાતેથી ધરપકડ કરી છે.
- નકલી વેબસાઇટનો ખેલ: આ કેસમાં સાયબર ગુનેગારોએ ‘એક્યુમેન ઇન્વેસ્ટમેન્ટ કંપની’ના નામે બનાવટી વેબસાઇટ બનાવી હતી અને રોકાણકારોને ગોલ્ડ ટ્રેડિંગમાં ઊંચા વળતરની લાલચ આપી અલગ-અલગ બેંક ખાતાઓમાં લાખો રૂપિયા ટ્રાન્સફર કરાવ્યા હતા.
- દિલ્હી સુધી લિંક: પકડાયેલા આરોપી સંજય મારૂએ કમિશન મેળવીને પોતાનું બેંક ખાતું સાયબર ઠગોને ઉપલબ્ધ કરાવ્યું હતું અને તે પોતે દિલ્હી જઈને આ ખાતું અન્ય મુખ્ય સાયબર માફિયાઓને સોંપી આવ્યો હતો.
અગાઉની ધરપકડમાં મોટો ખુલાસો: ડીસીપી સાયબર બીશાખા જૈનના જણાવ્યા અનુસાર, આ જ ગુનામાં અગાઉ મહેન્દ્ર શંકરભાઈ સોલંકી નામના આરોપીની પણ ધરપકડ થઈ ચૂકી છે. મહેન્દ્રના બેંક ખાતાની તપાસ કરતા ચોંકાવનારી વિગતો સામે આવી હતી કે તેનું ખાતું દેશભરમાં આશરે ૨૦ જેટલા સાયબર ફ્રોડના કેસોમાં સંડોવાયેલું છે, જેમાં કુલ ૫.૬૭ કરોડ રૂપિયાથી વધુની છેતરપિંડી આચરવામાં આવી હોવાનું ખુલ્યું છે.
Investment Fraud Crackdown: વધુ ધરપકડની શક્યતા
સુરત શહેર સાયબર ક્રાઇમ સેલ હાલમાં પકડાયેલા બંને આરોપીઓની સઘન પૂછપરછ કરી રહી છે. આ આંતરરાજ્ય ગેંગ સાથે સંકળાયેલા અન્ય મુખ્ય સૂત્રધારો, વચેટીયાઓ અને નાણાકીય વ્યવહારોની કડીઓ (મની ટ્રેઇલ) શોધવા માટે કાયદાકીય તપાસ લંબાવવામાં આવી છે. પોલીસના જણાવ્યા મુજબ, આગામી દિવસોમાં “ઓપરેશન મેન્યુઅલ હન્ટ 2.0” હેઠળ આ રેકેટમાં વધુ મોટા માથાઓની ધરપકડ થઈ શકે છે.
વધુ સમાચાર વાંચવા માટે અંહી ક્લિક કરો
