Pakistan Airstrike on Afghanistan: પાકિસ્તાન અને અફઘાનિસ્તાન વચ્ચેના સરહદી તણાવે ફરી એકવાર હિંસક સ્વરૂપ ધારણ કર્યું છે. બુધવારે વહેલી સવારે પાકિસ્તાની વાયુસેનાના ફાઇટર જેટ્સે અફઘાનિસ્તાનની સરહદમાં ઘૂસીને ભયાનક એરસ્ટ્રાઈક કરી છે. આ ઘાતક હુમલામાં ઊંઘી રહેલા ૧૧ નિર્દોષ બાળકો, એક મહિલા અને એક વૃદ્ધ સહિત કુલ ૧૩ લોકોના કમકમાટીભર્યા મોત નીપજ્યા છે, જ્યારે ૧૪ મહિલાઓ અને બાળકો ગંભીર રીતે ઘાયલ થયા હોવાના અહેવાલ છે. કાબુલના તાલિબાન શાસકોએ આ હુમલાને માનવીય અપરાધ ગણાવીને પાકિસ્તાનને ગંભીર પરિણામોની ચેતવણી આપી છે.
Pakistan Airstrike on Afghanistan: રાત્રિના અંધકારમાં નાગરિકોના ઘરો પર બોમ્બમારો
અફઘાન સરકારના સત્તાવાર સૂત્રોના જણાવ્યા અનુસાર, પાકિસ્તાની સૈન્ય વિમાનોએ રાત્રિના સમયે અફઘાનિસ્તાનની હવાઈ સીમાનું ખુલ્લું ઉલ્લંઘન કર્યું હતું. પાકિસ્તાની સેનાએ અફઘાનિસ્તાનના સરહદી વિસ્તાર એવા કુનાર, ખોસ્ત અને પક્તિકા પ્રાંતોમાં સામાન્ય નાગરિકોના રહેણાંક મકાનોને નિશાન બનાવીને ભારે બોમ્બમારો કર્યો હતો. તાલિબાન સરકારના મુખ્ય પ્રવક્તા ઝબીઉલ્લાહ મુજાહિદે આ હરકતની આકરા શબ્દોમાં નિંદા કરતા કહ્યું કે, “પાકિસ્તાને અફઘાનિસ્તાનની સાર્વભૌમત્વ પર સીધો હુમલો કર્યો છે.”
Pakistan Airstrike on Afghanistan: આતંકવાદના નામે નિર્દોષોનો શિકાર: તાલિબાનનો આરોપ
જો કે આ હુમલા અંગે પાકિસ્તાન તરફથી હજુ સુધી કોઈ સત્તાવાર નિવેદન બહાર પાડવામાં આવ્યું નથી, પરંતુ પાકિસ્તાન લાંબા સમયથી આરોપ લગાવતું આવ્યું છે કે ‘પાકિસ્તાની તાલિબાન’ (TTP) ના આતંકવાદીઓ અફઘાનિસ્તાનની ધરતીનો ઉપયોગ કરીને પાકિસ્તાનમાં આત્મઘાતી હુમલા કરી રહ્યા છે.
બીજી તરફ, તાલિબાને પાકિસ્તાનના આ દાવાઓને સદંતર ફગાવી દીધા છે. અફઘાન તાલિબાનનું કહેવું છે કે પાકિસ્તાન પોતાની આંતરિક સુરક્ષા અને રાજકીય નિષ્ફળતાઓ પરથી જનતાનું ધ્યાન ભટકાવવા માટે નિર્દોષ અફઘાન નાગરિકો અને બાળકો પર અત્યાચાર ગુજારી રહ્યું છે.
Pakistan Airstrike on Afghanistan: ૨૦૨૬માં બંને દેશો વચ્ચે યુદ્ધ જેવી સ્થિતિ
આ વર્ષે ફેબ્રુઆરી ૨૦૨૬થી જ બંને દેશો વચ્ચેના સંબંધો અત્યંત વણસેલા છે:
- ફેબ્રુઆરી ૨૦૨૬: પાકિસ્તાને પક્તિકા અને નંગરહાર પ્રાંતોમાં આતંકી ઠેકાણાઓ હોવાનો દાવો કરીને હુમલો કર્યો હતો, જેમાં અનેક નાગરિકો માર્યા ગયા હતા. આ ઘટના બાદ બંને દેશોની સેનાઓ વચ્ચે ડુરંડ લાઇન (આંતરરાષ્ટ્રીય સરહદ) પર ભારે ગોળીબાર થયો હતો.
- માર્ચ ૨૦૨૬ (કાબુલ હોસ્પિટલ હુમલો): ૧૬ માર્ચના રોજ પાકિસ્તાને અફઘાનિસ્તાનની રાજધાની કાબુલમાં આવેલી ‘ઓમિડ ડ્રગ રિહેબિલિટેશન હોસ્પિટલ’ (નશા મુક્તિ કેન્દ્ર) પર ભયાનક હવાઈ હુમલો કર્યો હતો. સંયુક્ત રાષ્ટ્ર (UNAMA)ના અહેવાલ મુજબ આ હુમલામાં ૨૬૯ નાગરિકોના મોત થયા હતા, જ્યારે તાલિબાને મૃત્યુઆંક ૪૦૦થી વધુ હોવાનો દાવો કર્યો હતો.
તાજેતરના આ એરસ્ટ્રાઈક બાદ બંને પાડોશી દેશો વચ્ચે સરહદ પર તણાવ ચરમસીમાએ પહોંચી ગયો છે અને ગમે ત્યારે મોટી સૈન્ય અથડામણ થવાની આશંકા સેવાઈ રહી છે.
વધુ સમાચાર વાંચવા માટે અંહી ક્લિક કરો
