Ahmedabad Airport Drug Bust: અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર એર ઈન્ટેલિજન્સ યુનિટ (AIU) એ મોટી કાર્યવાહી કરીને આંતરરાષ્ટ્રીય ડ્રગ્સ હેરાફેરીના નેટવર્કનો પર્દાફાશ કર્યો છે. થાઈલેન્ડના બેંગકોકથી ફ્લાઈટમાં આવેલા એક પેસેન્જર પાસેથી 6.540 કિલોગ્રામ ઉચ્ચ ગુણવત્તાનો ગાંજો જપ્ત કરવામાં આવ્યો છે. પકડાયેલા આરોપી સામે NDPS એક્ટ હેઠળ ગુનો નોંધીને એજન્સીઓએ તપાસનો ધમધમાટ શરૂ કર્યો છે.
Ahmedabad Airport Drug Bust: ટ્રોલી બેગમાં ‘વેક્યુમ પેક’ કરી છુપાવ્યો હતો જથ્થો
AIU ની ટીમને અગાઉથી જ ચોક્કસ બાતમી મળી હતી કે બેંગકોકથી આવી રહેલી ફ્લાઈટમાં ડ્રગ્સનો જથ્થો લાવવામાં આવી રહ્યો છે.
- આ રીતે ઓપરેશન પાર પડાયું: થાઈ એરવેઝ ઈન્ટરનેશનલની ફ્લાઈટ (TG-343) અમદાવાદ એરપોર્ટ પર લેન્ડ થતાં જ ટીમે વોચ ગોઠવી દીધી હતી.
- ચેકિંગમાં ખુલી પોલ: શંકાસ્પદ પેસેન્જરને અટકાવીને તેની ટ્રોલી બેગનું સ્કેનિંગ અને તપાસ કરવામાં આવતા એજન્સીઓ પણ ચોંકી ઉઠી હતી. બેગમાંથી 6 વેક્યુમ સીલ કરેલા પેકેટો મળી આવ્યા હતા, જેમાં લીલા રંગનો સૂકો ગાંજો ભરેલો હતો. એરપોર્ટ પર જ કરાયેલા પ્રાથમિક કેમિકલ ટેસ્ટમાં ડ્રગ્સ કન્ફર્મ થયું હતું.
Ahmedabad Airport Drug Bust: પહેલી જ વિદેશ યાત્રામાં બન્યો ‘ડ્રગ કેરિયર’
પકડાયેલા આરોપીની પૂછપરછમાં અત્યંત ચોંકાવનારો ખુલાસો થયો છે. આરોપી મૂળ છત્તીસગઢના રાયપુરનો રહેવાસી છે.
મોટી કમાણીની લાલચ ડૂબાડી ગઈ: પકડાયેલા શખસની આ આખી જિંદગીની પહેલી જ વિદેશ યાત્રા (International Trip) હતી. પ્રથમ પ્રવાસમાં જ તે ટૂંકા રસ્તે અઢળક પૈસા કમાવવાની લાલચે ડ્રગ માફિયાઓના સકંજામાં આવી ગયો હતો અને આંતરરાષ્ટ્રીય ગેંગ માટે ‘ડ્રગ કેરિયર’ (કુરિયર) તરીકે કામ કરવા તૈયાર થયો હતો.
Ahmedabad Airport Drug Bust: આંતરરાષ્ટ્રીય ડ્રગ સિન્ડિકેટના મૂળ સુધી પહોંચવા પોલીસની કવાયત
અમદાવાદ એરપોર્ટ સુરક્ષા એજન્સીઓ અને સ્થાનિક પોલીસ હવે આ રેકેટના મૂળ સુધી પહોંચવા તપાસ કરી રહી છે:
- બેંગકોકથી આ ડ્રગ્સનો જથ્થો કોણે આપ્યો હતો?
- અમદાવાદ કે ભારતના અન્ય કયા શહેરોમાં આ ડ્રગ્સ ડિલિવર કરવાનું હતું?
- આ નેટવર્ક પાછળ કઈ આંતરરાષ્ટ્રીય ડ્રગ કાર્ટેલ સક્રિય છે? આ તમામ સવાલોના જવાબ મેળવવા આરોપીની સઘન પૂછપરછ શરૂ કરવામાં આવી છે.
વધુ સમાચાર વાંચવા માટે અંહી ક્લિક કરો
