Public Outrage in Jamnagar: જામનગર મહાનગરપાલિકાની ચૂંટણીનો જંગ જામ્યો છે, ત્યારે શહેરના વોર્ડ નંબર 10 માં આવતા ગોમતીપુર વિસ્તારમાં સ્થાનિકોનો રોષ ફાટી નીકળ્યો છે. લાંબા સમયથી સફાઈની સમસ્યાથી પીડાતા નાગરિકોએ એકસૂરે ‘ચૂંટણી બહિષ્કાર’ ના બેનરો લગાવી રાજકીય પક્ષોની ઊંઘ હરામ કરી દીધી છે.
Public Outrage in Jamnagar: ગંદકીના ગંજથી સ્થાનિકો ત્રસ્ત
સ્થાનિક રહેવાસીઓના જણાવ્યા અનુસાર, ગોમતીપુર વિસ્તારમાં ગંદકી અને કચરાના ઢગલાઓનું સામ્રાજ્ય છવાયેલું રહે છે. નિયમિત સફાઈ ન થવાને કારણે મચ્છરોનો ત્રાસ અને રોગચાળો ફેલાવવાનો ભય સતત સતાવી રહ્યો છે. વારંવાર રજૂઆતો કરવા છતાં તંત્ર દ્વારા કોઈ નક્કર પગલાં લેવામાં આવ્યા નથી, જેના પરિણામે જનતામાં ભારે અસંતોષ જોવા મળી રહ્યો છે.
Public Outrage in Jamnagar: ‘માત્ર ચૂંટણી સમયે જ સફાઈ કેમ?’
સ્થાનિકોએ ગંભીર આક્ષેપ કરતા જણાવ્યું હતું કે:
“નેતાઓ અને તંત્ર માત્ર ચૂંટણી આવે ત્યારે જ પ્રચાર માટે વિસ્તારમાં સફાઈ કરાવે છે. ચૂંટણી પત્યા પછી કોઈ ડોકાતું પણ નથી. અમને કાયમી ઉકેલ જોઈએ છે, લોલીપોપ નહીં.”
Public Outrage in Jamnagar: રાજકીય ગરમાવો: ઉમેદવારોમાં ફફડાટ
વિસ્તારમાં ઠેર-ઠેર લાગેલા બહિષ્કારના બેનરોને કારણે ભાજપ, કોંગ્રેસ અને અન્ય પક્ષોના ઉમેદવારોની ચિંતા વધી છે. મતો માંગવા માટે વિસ્તારમાં જતાં પહેલાં હવે ઉમેદવારોએ સો વાર વિચાર કરવો પડી રહ્યો છે. આ વિરોધ પ્રદર્શને સાબિત કરી દીધું છે કે જનતા હવે પાયાની સુવિધાઓ મુદ્દે કોઈ બાંધછોડ કરવા તૈયાર નથી.
તંત્ર માટે ચેતવણી સમાન ઘટના
એકબાજુ તંત્ર દ્વારા વધુમાં વધુ મતદાન થાય તે માટે પ્રયાસો કરવામાં આવે છે, ત્યારે બીજી બાજુ પ્રાથમિક સુવિધાઓના અભાવે લોકો લોકશાહીના પર્વથી વિમુખ થઈ રહ્યા છે. ગોમતીપુરની આ ઘટનાએ મ્યુનિસિપલ કોર્પોરેશનની કામગીરી સામે મોટા સવાલો ઊભા કર્યા છે.
વધુ સમાચાર વાંચવા માટે અંહી ક્લિક કરો
બિહારના મુખ્યમંત્રી સમ્રાટ ચૌધરીને જાનથી મારી નાખવાની ધમકી આપનાર શખ્સ સાણંદથી ઝડપાયો
