CCS Meeting : મધ્ય પૂર્વમાં વધતા Iran–Israel યુદ્ધના ભણકારાઓ વચ્ચે ભારત સરકાર સતર્ક થઈ ગઈ છે. વૈશ્વિક સ્તરે વધતી અસ્થિરતા અને તેની સંભવિત અસરને ધ્યાનમાં રાખીને વડાપ્રધાન નરેન્દ્ર મોદીએ આજે રાત્રે 10 વાગે કેબિનેટ કમિટી ઓન સિક્યોરિટી (CCS)ની તાત્કાલિક બેઠક બોલાવી છે.
CCS Meeting : રેસ્ક્યુ ઓપરેશન પર થઇ શકે છે ચર્ચા
સૂત્રો મુજબ બેઠકમાં દેશની સુરક્ષા સ્થિતિ, ઊર્જા પુરવઠો, ભારતીય નાગરિકોની સુરક્ષા અને આર્થિક અસર જેવા મુદ્દાઓ પર વિસ્તૃત ચર્ચા થશે. ખાસ કરીને મધ્ય પૂર્વના દેશોમાં વસતા અને કાર્યરત ભારતીય નાગરિકોની સલામતીને પ્રાથમિકતા આપવામાં આવશે. જરૂર પડે તો તેમને સુરક્ષિત પરત લાવવા માટેની શક્યતાઓ પર પણ વિચારણા થશે.
CCS Meeting : મીટીંગમાં કોણ આપશે હાજરી
માહિતી મુજબ CCSની બેઠકમાં રક્ષા મંત્રી, ગૃહ મંત્રી, વિદેશ મંત્રી, નાણાં મંત્રી અને રાષ્ટ્રીય સુરક્ષા સલાહકાર સહિત ટોચના અધિકારીઓ હાજર રહેશે. રક્ષા દળોની તૈયારીઓ, સમુદ્રી માર્ગોની સુરક્ષા અને ભારતીય દૂતાવાસોની સતર્કતા અંગે પણ સમીક્ષા થશે.
CCS Meeting : તેલની આયાત પર થઇ શકે છે ચર્ચા
યુદ્ધના પગલે વૈશ્વિક બજારોમાં ઉથલપાથલ જોવા મળી રહી છે. કાચા તેલના ભાવમાં વધારો થવાની શક્યતા વચ્ચે ભારતના ઊર્જા આયાત બિલ પર તેની અસર પડી શકે છે. ભારત તેની જરૂરિયાતનું મોટું પ્રમાણ મધ્ય પૂર્વમાંથી આયાત કરે છે, જેના કારણે પરિસ્થિતિ પર નજીકથી નજર રાખવામાં આવી રહી છે.
વિદેશ મંત્રાલયે અગાઉ જ મધ્ય પૂર્વના વિસ્તારોમાં રહેલા ભારતીયોને સાવચેત રહેવા અને સ્થાનિક સત્તાવાળાઓની સૂચનાઓનું પાલન કરવા અપીલ કરી છે. જો પરિસ્થિતિ વધુ વિકટ બને તો વિશેષ ફ્લાઇટ અથવા નેવી દ્વારા રેસ્ક્યૂ ઓપરેશન હાથ ધરવાની તૈયારી અંગે પણ ચર્ચા થવાની શક્યતા છે.
આ બેઠકને રાષ્ટ્રીય સુરક્ષા દૃષ્ટિએ અત્યંત મહત્વપૂર્ણ માનવામાં આવી રહી છે. આંતરરાષ્ટ્રીય સ્તરે વધી રહેલા તણાવના માહોલ વચ્ચે ભારતની વ્યૂહરચના અને આગળના પગલાં અંગે સ્પષ્ટ દિશા નક્કી થવાની સંભાવના છે.
દેશ અને વિશ્વની નજર હવે આ બેઠક પર ટકેલી છે. યુદ્ધના માહોલમાં ભારત પોતાની સુરક્ષા, આર્થિક સ્થિરતા અને નાગરિકોની સલામતીને પ્રાથમિકતા આપી યોગ્ય પગલાં ભરે તેવી અપેક્ષા વ્યક્ત થઈ રહી છે.
વધારે સમાચાર વાંચવા અહી ક્લિક કરો
